BOBONARO, 14 maiu 2022 (TATOLI) – Klubu Ex Kodim susesu manán FC Cruz ho rezultadu 2-1 iha abertura kompetisaun Jogu futeból sub-23 Époka 2022 ne’ebé realiza iha kampu Futeból Maliana, munisípiu Bobonaro, sábadu ne’e.
Jogu ne’e abertura ofisialmente hosi Prezidente Federasaun Futeból Timor-Leste (FFTL) Francisco Martins Jerónimo, akompaña hosi Sekretáriu Autoridade Munisípiu Bobonaro João Fátima do Carmo, Sekretáriu Jerál FFTL Gregorio Correia, Prezidente Asosiasaun Futeból Bobonaro (AFB) Domingos Goveia Moniz no Komandante Polísia Nasionál Timor-Leste (PNTL) munisípiu Bobonaro Antoninho Mauluta.
Prezidente FFTL Francisco Jerónimo, apela ba jogadór sira atu hatudu jogu ho disiplina no respeita regra futeból nune’e ba oin bele sai futebolista ne’ebé di’ak atubele hetan oportunidade hodi reprezenta munisípiu Bobonaro ba kompete iha nivél nasionál.
“Ohin loron ita iha selesaun nasionál balu mós mai hosi Bobonaro oan no hosi Suai oan no hosi satin seluk, sira mak ba joga iha rai-li’ur reprezenta ita sira-ne’e, agora ita atu prepara tán eroi foun ne’ebé hosi asosiasaun sira hotu-hotu hanesan iha Bobonaro, ami hein katak Bobonaro uluk koñesidu no famouzu ho tiu João, ha’u hein katak alin sira bele banati tuir nia,” nia hato’o iha intevensaun iha kompetisaun ne’e.
Sekretáriu Autoridade Munisípiu Bobonaro, João Fátima do Carmo, agradese no apresia ba FFTL no Asosiasaun Futeból Bobonaro, ne’ebé iha inisiativa di’ak hodi kontinua loke kompetisaun ba joven sira iha nível postu to’o suku.
“Ami nudar autoridade kontinua apoiu programa sira-ne’ebé governu sentrál fo mai, ha’u fiar katak inisiativa ida-ne’e atu promove ita-nia alin joven sira-nia talentu, atu nune’e sira bele partisipa di’ak liután iha eventu sira iha nivél munisípiu ba nasionál no mós bele to’o iha estranjeiru,” nia fó hanoin.
Jogu primeira parte
Iha inísiu jogu, ekipa rua lansa kedas kontra ataka ba malu, maske ambiente kampu nakonu ho bee no tahu tanba udan-boot, maibé ekipa rua mai ho jogu modelu ofensivu hotu, Ex Kodim ataka iha liña eskerda no FC Cruz halimar iha liña klaran.
Maske nune’e jogu foin la’o de’it menutu 13, oportunidade monu uluk ba EX Kodim tanba defeza Fc Cruz hamonu avansadu Ex Kodim iha área risku, ikus mai árbitru deside fó penalidade.
Oportunidade brillante ne’e jogador avansadu númeru kamizola (11) konsege ezekuta ho susesu hodi muda rezultadu ba 1-0. Ho rezultadu ne’e halo ambiente kampu sai manas liután, tanba avansadu FC Cruz tenta serbisu maka’as iha liña oin hodi fó ameasa ba guarda rede aversáriu ho intensaun atu responde golu ruma, maibé forsa la to’o tanba defeza Ex Kodim metin liu.
Maske nune’e jogu kontinua la’o ekipa rua nafatin halo esforsu maka’as atu prodús golu ba malu, maibé esforsu hirak-ne’e la rezulta golu ruma to’o árbitru deside hakotu jogu parte dahuluk iha menutu 45.
Kontinua ba segunda parte
Kontinua ba segunda parte ka parte daruak, FC Cruz nafatin iha vontade halo ameasa hodi sobu defeza adversáriu tuituir malu iha menutu 50, maibé esforsu hirak-ne’e defeza Ex kodim konsege sátan, jogu kontinua la’o liu de’it mrnutu balun, dezefa FC Cruz hamonu tán jogador Ex Kodim iha área risku, nune’e árbitru deside fó penalidade, maibé triste boot ba adeptu klubu refere tanba jogadór (11) la konsege ezekuta ho susesu tanba bola sees dok hosi baliza.
Ho rezultadu triste ne’e, halo Ex Kodim nafatin iha ambisaun maka’as halo defeze FC Cruz ulun moras tanba ameasa beibeik, iku mai avansadu (9) konsege fura tán golu ida iha minutu 72 hodi muda rezultadu ba 2-0. Maibé liu de’it minutu neen jogadór avansadu (9) FC Cruz konsege fera mantolun hodi muda rezulta ba 2-1.
Maske golu ne’e iha menutu ikus, maibé FC Cruz nafatin serbisu maka’as hodi fó ameasa ba defeza adversáriuu maibé asaun sira-ne’e laiha rezultadu to’o menutu 90, hodi fó vitoria ba Ex Kodim.
Jogu ne’e lidera hosi árbitru Jefrianos Loy Maya dos Santos, asistente árbitru pirmeiru Mateus Marques da Cruz no asistetente segundu Lucas Feliz. Árbitru hirak-ne’e hetan ona serfikadu lisensa (C) no (D) hosi Federasaun Futeból Timor-leste (FFTL) iha tinan 2020.
Iha abertura ne’e, hetan seguransa hosi PNTL munisípiu Bobonaro, FALINTIL-Forsa Defeza Timor-leste (F-FDTL) postu Tunibibi, hetan asistensia primeiru sokorru hosi Cruz Vermelha Timor-Leste munisípiu Bobonaro no hetan partisipasaun másima hosi komunidade Maliana no adeptu hosi klubu rua ne’e.
Jornalista : Sérgio da Cruz
Editór : Evaristo Soares Martins
