Ministru Prezidénsia Konsellu Ministru, Fidelis Manuel Leite Magalhães. Imajen Tatoli/Egas Cristóvão

DILI, 13 maiu 2022 (TATOLI)–Governu liuhosi reuniuan Konsellu Ministru (KM) estraordinária, sesta ne’e, aprova projetu ba proposta rezolusaun Parlamentu Nasionál (PN) ba ratifikasaun adezaun Timor-Leste ba tratadu kona-ba proibisaun totál ensaiu nukleár, ne’ebé aprezenta hosi Ministra Negósiu Estranjeiru no Kooperasaun, Adaljiza Albertina Xavier Magno.

“Tratadu ne’e atu bandu totál ensaiu nukleár (teste nukleár) ba objetivu militár, hanesan forma hodi limita dezenvolvimentu hosi arma nukleár ne’ebé daudaun ne’e iha no aparesimentu hosi tipu arma nukleár foun sira, hanesan medida efikás dezarmamentu nukleár no la proliferasaun arma nukleár sira,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun ezekutivu, iha Palásiu Governu.

Notísia relevante: PN ratifika ona tratadu proibisaun arma nuklear

Portavóz Governu dehan, ho rezolusaun ne’e, Timor-Leste hamutuk ho nasaun sira seluk ne’ebé ratifika ona tratadu ne’e konkorda katak labele kontinua tan ho teste nukleár sira iha mundu.

“Kestaun ne’e sai preokupasaun ba Timor-Leste tanba teste sira ne’e bainhira kontinua nafatin sei kontribui nafatin ba proliferasaun ba arma nukleár sira no teste ne’e rasik bele mós iha risku ba saúde ita-ema no mós ba iha ambiente tanba teste iha fatin balun tuir istória hatudu katak iha ne’ebé maka koko teste sira dala barak iha kálkulu sira ne’ebé mak sala kona-ba diresaun anin no kona-ba reziduu sira no rezultadu hosi teste ne’e rasik maka ba fali afeta populasaun ka nasaun viziñu sira,” nia esplika.

Tuir Ministru, inisiativa ne’e ho hanoin ida katak atu redús no evita funu nukleár iha mundu bele akontese, alende ne’e atu evita arma nuklear labele prolifera iha mundu no atu evita katak ho teste sira ne’e la lori risku ba vida umana no ba ambiente, tanba teste sira sei lori impaktu ladi’ak ba saúde umana no ambiente tanba radiu atividade rezultadu hosi teste hiraka ne’e.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here