Imajen Espesiál.

DILI, 13 maiu 2022 (TATOLI)—Vise Bankada Opozisaun CNRT iha Parlamentu Nasionál, Patrocinio Fernandes, hateten desde uluk partidu CNRT nia kompromisu fó importánsia ba proposta alterasaun lei pensaun vitalísia ne’ebé suspende hela iha PN atu bele tau iha ajendamentu hodi debate.

Deputadu CNRT ne’e husu ba bankada Governu, nune’e iha kinta lejislatura ne’e reprezentante povu iha uma fukun Parlamentu Nasionál bele halo diskusaun no aprova.

Notísia Relevante: Kaleidoskópiu 2021: PN kontinua suspende proposta alterasaun lei pensaun vitalísia

“Ha’u hanesan menbru komisaun A haree lei ne’e seidauk tama iha komisaun A trata asuntu Justisa no Konstituisional no seida’uk iha deputadu ida halo inisiativa hosi bankada fó apoiu Governu sira mak lidera meza komisaun, entaun ajenda prioridade depende ba konjuntura halo oinsá nia vontade. Tanba ne’e, husu ba bankada Governu atu bele tau prioridade ba proposta lei pensaun vitalísia ne’ebé pendent iha PN ne’e hodi bele halo diskusaun,” Ptrocínio Fernandes hateten ba Agência Tatoli iha Parlamentu Nasionál, sesta ne’e.

Nia informa, prosesu istória lei ne’e nu’udar produtu bankada Fretilin nia Governasaun primeiru no CNRT desde nia existénsia ho kompromisu ida atu hanoin haree kona-ba lei pensaun vitalísia ne’e rasik.

Nune’e, CNRT nia tempu lidera Parlamentu Nasionál no Governu ba daruak halo ona alterasaun dala rua ba lei pensaun vitalísia hosi primeiru hatun ba 80% no segundu redús ba 60%, ne’ebé antes ne’e eis titulár hanesan deputadu ka membru Governu iha direitu sai nafatin simu pensaun hosi sálariu báziku $1,500 kada fulan 100%.

CNRT nia kompromisu agora depende hela ba vontade hosi partidu polítiku hotu ne’ebé hetan asentu iha Parlamentu Nasionál atu haree ida-ne’e sai ajenda importante ba ajenda ka lae ne’e, depende ba vontade hosi partidu sira iha asentu parlamentár.

Notísia Relevante: Komisaun A suspende proposta-alterasaun ba lei pensaun vitalísia

“Lei pensaun vitalisa ne’e regula kona-ba ema-nia direitu adkiridu ne’ebé konstituisaun mós prevee, entaun ne’e presiza bainhira mínimu atu halakon karik tenke presiza forsa polítika ida maiória iha Parlamentu Nasionál katak partidu ida mesak kaer Governu, hanoin bele,” nia dehan.

Vise Bankada ne’e defende katak CNRT nafatin atu haree oinsá bele hatuur Estadu ne’e ho didi’ak hodi lori sustentabilidade dezenvolvimentu nasaun no kapasidade finanseiru atu nafatin iha hodi sustenta mákina Estadu ba jerasaun tuir mai.

Deputadu UDT, Francisco David, konsidera lei pensaun vitalísia lori desvantajen ba povu nune’e presiza halo alterasaun.

“Pensaun vitalisa la nesesáriu maibé karik bele pensaun vitalisa ne’e bele transformasaun subsídiu rekuñesimentu ba ema-ne’ebé mandatu deputadu no membru Governu tinan hirak liu ba ne’e no pensaun vitalisia rasik benefisiu ladun di’ak, tanba ema-ne’ebé kompleta tinan lima mandatu hetan direitu ba nia moris tomak,” nia hateten.

Tanba ne’e, se bele labele fó montante maibé iha rekuñesimentu ba nia mandatu deputadu no membru Governu fó de’it subsídiu reintegrasaun lalika nia moris tomak simu fali pensaun vitalísia.

“UDT kontra pensaun vitalísia no ha’u hanesan membru komisaun A lei sira-ne’e to’o agora seidauk iha inisitiva ajenda iha komisaun ne’ebé bainhira mai ona maiória hakarak iha komisaun deside mak automatikamente sei haree hafoin liuhosi votasaun iha plenária,” nia dehan.

Notísia Relevante: Aniceto Guterres: “Ha’u sei la budu alterasaun Lei Pensaun Vitalísia”

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here