Pesoál saúde hala’o hela atendimentu ba labarik sira-ne’ebé hetan moras dengue. Imajen Tatoli/Antonio Dasiparu.

DILI,12 maiu 2022 (TATOLI)— Diretór Nasionál Saúde Públika, Ministériu Saúde, Frederico Bosco, informa, Ministériu saúde rejista pasiente dengue ne’ebé konsege rekuperadu iha territóriu nasionál hamutuk 4.733.

“Ita nia fasilidade saúde sira fó asisténsia saúde ba pasiente dengue hamutuk 4.733 no konsege rekuperadu no fila ba uma,” Diretór Nasionál ne’e hateten ba  Agência TATOLI iha Palásiu Sinzas-Caicoli, sesta ne’e.

Daudaun ne’e, númeru pasiente dengue hahú menus ona kompara ho fulan janeiru too abríl ne’ebé kazu dengue sa’e makaas.

MS konsege halo redusaun ba númeru pasiente dengue ho fatór rua hanesan halo intervesaun iha área promosaun no edukasaun saúde ba komunidade atu konsénsia hamoos lixu no la soe fo’er arbiru no halo intervesaun médiku liuhosi fumigasaun no abate ba área risku sira.

“Kazu dengue iha tinan ne’e hanesan esperénsia ida mai ami atu ba oin sei servisu maka’as hodi kombate dengue iha komunidade no sei reativa ekipa task force iha munisípiu ne’ebé lídera husi Prezidente Autoridade sira atu mobiliza komunidade halo limpeza jerál” nia afirma.

 MS mós hahú halo preparasaun liuhosi meiu konvensionál atu molok udan monu rai hahú fahe ona abate no halo fumigasaun  inklui  alerta sistema vizilánsia hodi prevene labarik sira sai vitíma ba surtu ne’e.

Nune’e, Ministériu Saúde kontinua apela ba populasaun iha Dili laran no mós iha Munisípiu sira seluk, atu aprezenta-an iha fasilidade públiku saúde (Sentru Saúde ka Ospitál) ne’ebé besik, bainhira sente isin-manas, ka senti laran sa’e,liman-ain no sikun moras hodi bele hetan atendimentu husi profisionál saúde sira.

Apela mós Autoridade Munisipál no Autoridade Lokál atubele orienta komunidade halo limpeza jerál iha suku no bairru sira liuliu fase tanke, bidon ka balde tau bee semana ida dal aida.

Hamoos sasán ka limpeza hanesan roda aat, vazu ai-funan atu susuk labele tau tolun, haloot ropa ho di’ak iha ita nia uma laran,uza ropa ne’ebé liman naruk karik toba iha tempu loron, uza aimoruk hanesan repelente ka autan, uza moskiteru karik toba iha tempu loron, so’e lixu iha nia fatin.

Tuir dadus, Diresaun Nasionál Saúde Públika liuliu Departamentu Vijilansia Epidemolojia  iha Ministériu Saúde, hahú fulan-janeiru  too horisehik  pasiente dengue sa’e ba 4.733,   hosi númeru ne’e na’in 54 mak mate.

Maioria kazu ne’e deteta husi Munisípiu Dili ho totál 3.262,  Baucau  306 Manatuto 173, Covalima 146, Ermera ho kazu 118, Manufahi 184,Viqueque 79, Ainaro 45, Liquiça 118, Aileu  87 , Bobonaro 56, Lautem 155 no RAEOA  neen.

Munisípiu Dili nafatin rejista kazu ne’ebe a’as totál kazu 3.262, kompostu hosi postu administrativu Dom-Aleixo 1.937, Cristo-Rei 497, Vera-Cruz 357 no Nain-Feto 400.

Fasilidade saúde iha munisípiu Dili hanesan Hospitál Nasionál Guido Valadares (HNGV) rejista ona kazu dengue hamutuk 562, Klínika Fatumeta 289, sentru saúde Comoro 1205 sentru saúde Vera-Cruz 236, sentru saúde Formoza 590, sentru saúde Becora 256, Klínika Madre Eliza ida, sentru saúde Atauro 11, sentru saúde Metinaro 46, Klínika Bairru-Pité 59, Klínika Motael na’in-rua no Klínika Moris Foun na’in-ida.

Notísia relevante:   Surtu dengue: óbitu na’in-54 no pasiente sa’e ba 4.721

Jornalista : Felicidade Ximenes

Editór       : Florencio Miranda Ximenes

  

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here