Médiku sira iha Sentru Saude Vera-Cruz halo hela atendementu ba labarik sira ne’ebé hetan moras dengue, Kuarta 9/2/2022. Imajen Tatoli/Antonio Dasiparu

DILI, 10 maiu 2022 (TATOLI)—Diresaun Nasionál Saúde Públika liuliu Departamentu Vijilánsia Epidemolojia  iha Ministériu Saúde (MS), relata hahú fulan-janeiru too horisehik, óbitu sa’e ba na’in-54 no pasiente dengue 4.721,   hosi númeru ne’e maioria labarik. 

“Situasaun kazu dengue iha Timor-Leste hosi janeiru mai too horiseik hamutuk kazu 4.721 no kumulativu óbitu na’in-54,” refere nota ne’ebé Agência TATOLI, tersa ne’e. 

Maioria kazu ne’e deteta husi Munisípiu Dili ho totál 3.254, Baucau  306 Manatuto 173, Covalima 146, Ermera ho kazu 118, Manufahi 180, Viqueque 79, Ainaro 45, Liquiça 118, Aileu  87, Bobonaro 56, Lautem 155 no RAEOA  na’in-neen.

Munisípiu Dili nafatin rejista kazu  a’as hamutuk 3.254, kompostu hosi postu administrativu Dom-Aleixo iha 1.934, Cristo-Rei 497, Vera-Cruz 354 no Nain-Feto 400.

Fasilidade saúde iha munisípiu Dili hanesan Hospitál Nasionál Guido Valadares (HNGV) rejista ona kazu dengue hamutuk 562, Klínika Fatumeta 287, sentru saúde Comoro 1205 sentru saúde Vera-Cruz 236, sentru saúde Formoza 586, sentru saúde Becora 256, Klínika Madre Eliza ida, Sentru Saúde Atauro  11, Sentru Saúde Metinaro 46, Klínika Bairru-Pité na’in-59, Klínika Motael na’in-rua no Klínika Moris Foun na’in-ida.

Nune’e, Ministériu Saúde kontinua apela ba populasaun iha Dili laran no mós iha Munisípiu sira seluk, atu aprezenta-an iha fasilidade públiku saúde (Sentru Saúde ka Ospitál) ne’ebé besik, bainhira sente isin-manas, ka senti laran sa’e,liman-ain no sikun moras hodi bele hetan atendimentu husi profisionál saúde sira.

Apela mós Autoridade Munisipál no Autoridade Lokál atubele orienta komunidade halo limpeza jerál iha suku no bairru sira liuliu fase tanke, bidon ka balde tau bee semana ida dal aida.

Hamoos sasán ka limpeza hanesan roda aat, vazu ai-funan atu susuk labele tau tolun, haloot ropa ho di’ak iha ita nia uma laran,uza ropa ne’ebé liman naruk karik toba iha tempu loron, uza aimoruk hanesan repelente ka autan, uza moskiteru karik toba iha tempu loron, so’e lixu iha nia fatin.

Notísia relevante:   Surtu dengue: óbitu na’in-53 no pasiente sa’e ba 4.640

Jornalista : Felicidade Ximenes

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here