Ministru Asuntu Kombatente Libertasaun Nasionál, Julio Sarmento da Costa "Meta Malik". Imajen Tatoli/Francisco Sony.

DILI, 12 maiu 2022 (TATOLI)—Ministru Asuntu Kombatente Libertasaun Nasionál (MAKLN), Júlio Sarmento da Costa, hateten junu nia rohan, MAKLN sei taka sai lista bolsa estudu ba veteranu nia oan sira-ne’ebé atu asesu ba eskola.

Notísia Relevante: Benefisiáriu ‘Bolsa Estudu’ ba veteranu nia oan sira tenke eskola

“Maizumenus iha fulan-juñu nia rohan, ami tenke finaliza no taka sai ona naran para ema hotu bele haree,” Júlio Sarmento da Costa hateten ba TATOLI, iha Parlamentu Nasional, kuarta ne’e.

Tanba, iha tinan hirak liubá Ministériu Asuntu Kombatente Libertasaun Nasionál (MAKLN) loke de’it ba mártires nia oan sira hodi la fó prioridade ba kombatente moris nia oan sira maibé iha tinan ida-ne’e se loke ba sira.

“Bolsa estudu uluk ita loke de’it ba mártires nia oan no ba kombatente moris nia oan sira-ne’e laiha. Tanba ne’e, tinan ne’e, ita foin loke no ekipa tun ba baze hodi rekolla dadus durante fulan ida-nia laran no kada munisípiu sei prenxe ema 100,” nia dehan.

Tuir lei, bolsa estudu ba veteranu nia oan sira-ne’e sei asesu edukasaun hahú hosi ensinu báziku to’o ensinu superiór, maibé MAKLN sei halo limitasaun ba ensinu báziku tanba idade sei kiik, sei fó opurtunidade barak liu mak ba ensinu superiór, ensinu pre-sekundária no sekundária sei fó naton de’it.

“Bolsu estudu ba tinan ne’e ita prefere liu ba hala’o estudu iha rai-laran ba rai-li’ur seidauk, tanba moras barak mak la’o ba-mai, situasaun la’o la normál entaun labele kria konfuzu ba estudante sira,” nia hateten.

Primeira alterasaun dekretu-lei nú. 8/2009, 15 janeiru, kona-ba rejime atribuisaun bolsa estudu ba Kombatenete Libertasaun Nasionál nia oan.

Tanba ne’e Governu planu atu implementa sistema atribuisaun bolsa estudu ba martir sira ho Kombatente Libertasaun Nasionál sira-nia oan, hodi abranje ka kobre nívél eskolaridade tomak ne’ebé hahú hosi ensinu báziku to’o ensinu superiór.

Governu aloka osan miliaun $1,111 ba programa bolsa estudu ba veteranu nia oan hamutuk 1,300 iha munisípiu 12 inklui Rejiaun Administrativa Espesiál Oé-Cusse Ambeno (RAEOA) no kada munisípiu iha ema na’in-100.

Notísia Relevante: Tinan 2022: MAKLN atribui bolsa estudu ba veteranu nia oan 1.300

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here