Xefe suku sira hato’o preokupasaun ba Governu iha diálogu ne’ebé Primeiru-Ministru, Taur Matan Ruak, realiza iha Salaun Sentru Konvensaun Dili (CCD, Sigla portugés), sesta (14/01). Imajen Tatoli/Francisco Sony.

DILI, 11 maiu 2022 (TATOLI)–Ministru Administrasaun Estatál (MAE), Miguel da Costa, hateten xefe suku sira iha territóriu nasionál sei simu sira-nia saláriu $250 tuir Parlamentu Nasionál aprova iha fulan-maiu 2022.

Notísia Relevante: Xefe suku Motael triste saláriu seidauk aumenta

“Ita-nia xefe suku sira iha territóriu nasionál hahú simu osan insentivu ka saláriu $250 iha maiu 2022. Nune’e mós, xefe suku sira mós sei simu sira-nia osan retroativu hosi janeiru-to’o abríl nian,” Governante ne’e hateten ba jornalista sira, hafoin partisipa diskusaun proposta Orsamentu Retifikativu (OR), iha Parlamentu Nasionál, Dili, kuarta ne’e.

Tuir nia, lei aprova ona iha tinan kotuk atu halo mudansa ba insentivu xefe suku sira-nian hahú janeiru maibé dekretu-lei tenke altera para atu garante montante hanesan antes ne’e saláriu $140 hasa’e ba $250 kada fulan tuir saida mak Parlamentu Nasionál aprova ona.

“Ida-ne’e ha’u orienta ona ba Prezidente Autoridade Munisipál (PAM) ho Administradór Munisípiu sira selu tuir no temi iha dekretu-lei foun, uluk xefe suku ho osan $140 no sa’e ba $250 no xefe aldeia $100 no sa’e ba $150,” nia dehan.

Antes ne’e, iha 09 dezembru 2021, Parlamentu Nasionál aprova proposta lei Orsamentu Jerál Estadu 2022 iha espesialidade ho montante $2,770.680 hodi aumenta subsídiu kada fulan ba membru konsellu suku kompostu hosi xefe suku, xefe aldeia, pesoál apoiu administrasaun suku, delegadu no delegada ho lia-na’in sira.

Proposta ho númeru 55 ne’ebé propoin $2,770.680 atu aumenta subsídiu membru konsellu suku iha territóriu nasional ne’e ho rezultadu votasaun a-favór 49, kontra 0 no abstensaun 11.

Ho nune’e, xefe suku sira-ne’ebé antes ne’e ho saláriu kada fulan ida $140 hasa’e ba $250, xefe aldeia antes ne’e ho saláriu kada fulan ida $100 hasa’e ba $150, pesoál apoiu servisu administrasaun suku antes ne’e ho saláriu kada fulan ida $115 hasa’e ba $140, delegadu no delegada ho lia-na’in sira antes ne’e ho saláriu ho $30 hasa’e ba $40 kada fulan.

“Proposta númeru 55 bele dehan agora valoriza ita-nia lidér komunitária sira dezde 2003 instala konsellu to’o ohin loron dala barak ita sente sira mak hamutuk ho povu no kualker Governu ida tun sira mak atende, nune’e merese tau duni osan subsídiu aumenta ho valorizasaun oinsá hakbiit servisu di’ak liután,” Deputadu proponente, Antoninho Bianco, hateten iha plenária PN.

Proposta ne’e ho títulu (Servisu/órgaun) Ministéiru Administrasaun Estatál (MAE), kategória despeza transferénsia públika ho programa kódiku 025 kona-ba dezentralizasaun administrativa no podér lokál, dotasaun inisiál $21,118.045 ho alterasaun aumenta $2,770.680, nune’e dotasaun finál sa’e ba $23,88.725, ho adisionál alterasaun aumenta $2,770.680 sei kobre ba subsídiu autoridade lokál no aumenta subsídiu mensál.

Iha territóriu nasionál, xefe suku sira hamutuk 452 hosi suku 452, xefe aldeia 2,233, pesoál apoiu administrasaun suku 452, delegadu ka delegada no lia-na’in 5,822 iha territóriu tomak inklui Rejiaun Administrativa Espesial Oé-Cusse Ambeno (RAEOA).

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here