Xefe Suku Motael, Luis António Viegas. Imajen/Espesiál.

DILI, 09 maiu 2022 (TATOLI)–Xefe Suku Motael, Luis António Viegas, hateten Parlamentu Nasionál aprova proposta lei OJE 2022 iha espesialidade ho montante $2,770.680 hodi aumenta subsídiu kada fulan ba xefe suku sira maibé agora sei simu nafatin saláriu $140 kada fulan.

“Triste tebes, tanba intensivu xefe suku nian ne’ebé fó sai ona ba Jornál Repúblika ne’e loloos implementa ona iha fulan-janeiru tinan ne’e maibé ami simu ona trimestre dahuluk nian no to’o agora ami-nia saláriu intensivu seidauk iha mudansa no seidauk aumenta,” Xefe Suku Motael ne’e hateten ba Agência TATOLI, via telefónika, segunda ne’e.

Nia dehan, ida-ne’e la’ós de’it akontese ba xefe suku sira maibé ba membru konsellu suku hotu-hotu iha territóriu nasionál, liu-liu xefe suku sira hamutuk 452 hosi suku 452, xefe aldeia 2,233, pesoál apoiu administrasaun suku 452, delegadu ka delegada no lia-na’in 5,822 tha territóriu tomak inklui Rejiaun Administrativa Espesial Oé-Cusse Ambeno (RAEOA).

Antes ne’e, iha loron 09 dezembru 2021, Parlamentu Nasionál aprova ona proposta lei Orsamentu Jerál Estadu 2022 iha espesialidade ho montante $2,770.680 hodi aumenta subsídiu kada fulan ba membru konsellu suku kompostu hosi xefe suku, xefe aldeia, pesoál apoiu administrasaun suku, delegadu no delegada ho lia-na’in sira.

Proposta ho númeru 55 ne’ebé propoin $2,770.680 atu aumenta subsídiu ba membru konsellu suku iha territóriu nasionál ne’e ho rezultadu votasaun a-favór 49, kontra 0 no abstensaun 11.

Nune’e, xefe suku ne’ebé antes ne’e ho saláriu kada fulan ida $140 hasa’e ba $250, xefe aldeia antes ne’e ho saláriu kada fulan ida $100 hasa’e ba $150, pesoál apoiu servisu administrasaun suku antes ne’e ho saláriu kada fulan ida $115 hasa’e ba $140, delegadu no delegada ho lia-na’in sira antes ne’e ho saláriu ho $30 hsa’e ba $40 kada fulan.

“Proposta númeru 55 bele dehan agora valoriza ita-nia lidér komunitária sira dezde 2003 instala konsellu to’o ohin loron dalabarak ita sente sira mak hamutuk ho povu no kualker Governu ida tun sira mak atende, nune’e merese tau duni osan subsídiu aumenta ho valorizasaun oinsá hakbiit servisu di’ak liután,” Deputadu proponente, Antoninho Bianco, hateten iha plenária PN.

Nia hatutan, proposta ne’e hametin estrutura baze konsellu suku hodi servisu hamutuk ho Governu lori dezenvolvimentu nasaun nian. Proposta ne’e ho títulu (Servisu/Órgaun) Ministéiru Administrasaun Estatál (MAE), kategória despeza transferénsia públika ho programa kódiku 025 kona-ba dezentralizasaun administrativa no podér lokál, dotasaun inisiál $21,118.045 ho alterasaun aumenta $2,770.680, nune’e dotasaun finál sa’e ba $23,88.725, ho adisionál alterasaun aumenta $2,770.680 sei kobre ba subsídiu autoridade lokál no aumenta subsídiu mensál.

Ministru Administrasaun Estatál (MAE), Miguel Pereira de Carvalho, hateten bainhira membru konsellu suku eleitu iha 2004 hahú ho subsídiu sira ho valór $15, ho alterasaun subsidiu akontese iha 2012 no halo revizaun iha tinan 2014 konsege hasai insentivu subsídiu ba xefe suku sira ho $140 no to’o agora halo ona tinan hitu (7) tempu ona presiza hasa’e insentivu ba lideransa komunitáriu sira.

“Tan ne’e, ha’u hanoin ministéiru konkorda atu hasa’e insentivu xefe suku, xefe aldeia no estrutura suku” nia hateten.

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here