Parlamentu Nasionál, kuarta (1/05) ne’e, aprova ona proposta Orsamentu Retifikativu ho montante biliaun $1,5 iha finál global. Imajen Tatoli/António Daciparu.

DILI, 11 maiu 2022 (TATOLI)—Parlamentu Nasionál (PN), kuarta ne’e, aprova ona proposta Orsamentu Retifikativu ho totál $1,241,210.748 iha finál globál ho votu a-favór 36, kontra 22 no abstensaun lima (5).

Notisia Relevante: PN aprova proposta Orsamentu Retifikativu iha Jeneralidade

“Nune’e Proposta lei númeru 38/V(4a) 1/2022, primeiru alterasaun lei númeru 1/2022, 3 janeiru, OJE 2022, segundu alterasaun lei númeru 8/2008, 30 juñu, Lei Tributária, no kriasaun Fundu Kombantete Libertasaun Nasionál, aprovadu iha finál globál,” Prezidente Parlamentu Nasionál, Aniceto Longuinhos Guterres Lopes, anunsíu iha plenária, kuarta ne’e.

Enkuantu Proposta OR ne’ebé antes ne’e Governu aprezenta ho montante $1,129 maibé durante diskusaun espesialidade deputadu sira aprezenta tan proposta adisionál kuaze millaun $100-resin, nune’e proposta OR aumenta ba $1,241,210.748.

Ho aprovasaun OJE Retifikativu 2022 ne’e, lori mudansa iha dotasaun orsamentál, ezemplu, Reseita Globál Konsolidada sa’e ba $3,348,070.979 no Despesa Globál Konsolidada $3,347,457.179.

Orsamentu Órgaun no Servisus Administrasaun Sentrál hetan aumentu $1,241,210.747 no ninia totál agora sa’e ba $3,100,688.695, ne’ebé fahe tuir kategoria klasifikasaun ekonómiku hanesan Transférensia Públika ho montante $1,950,982.687; Bens no Servisu ho montante $467,077.382; Kapitál Dezenvolvimentu $390,177.399; Saláriu no Vensimentu $250,537.130; no Kapitál Menór $41,914.097.

Ho aprovasaun ne’e sei Komisaun C ne’ebé trata asuntu Finansa Públika sei halo redasaun finál ho nia alterasaun iha proposta lei OJE hafoin sei enkamiña ba Prezidente Repúblika hodi bele promulga ka veta tuir konpeténsia Xefe Estadu nian.

Antes ne’e, proposta OR ho montante biliaun $1,129, ne’ebé prevee ba transferénsia públika $1,837,634.189, bens no servisu $466,877.382, kapitál dezenvolvimentu $390,177.399, saláriu no vensimentu $250,537.130 no kapitál menór $41,914.097.

Orsamentu Retifikativu ne’e mai ho medida 13 mak hanesan;

1) Atribuisaun osan fulan da-13 ba kada família (exeptu funsionáriu públiku sira;

2) Projetu Uma Kbiit Laek Plus; 

3) Bolsu Estudu ba Mellór Graduadu Estudante;

4) Kriasaun Fundu Veteranu;

5) Programa Maundobra ba Postu Administrativu (PEMOPA); 6) Harii Sede ba Arte Marsiál no Rituál;

7) Programa Eskola iha uma (home school;

8) Oferese internet gratuitu ba eskola sira hahú hosi Eskola Infantil to’o Ensinu Superior;

9) Buka Empregu ba mellór alunu universitáriu sira;

10) Estabelesimentu Sekretária ba Asuntu Traballadór Esteriór no Komunidade Timoroan iha Diáspora;

11) Revitaliza kafé no subsídiu ba kafé Laku-teen;

12) Subsídiu akomodasaun ba PNTL no F-FDTL;

13) Pagamentu renumerasaun PNTL nian ho rejime salariál foun.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here