Primeiru-Ministru, Taur Matan Ruak, akompaña ho membru Governu, defende Proposta Orsamentu Retifikativu tinan 2022 durante diskusaun iha faze jeneralidade ho membru Parlamentu Nasionál, iha sala planária, segunda (09/05). Imajen Tatoli/António Daciparu

DILI, 09 maiu 2022 (TATOLI)—Parlamentu Nasionál, liuhosi sesaun plenária, segunda ne’e, aprova proposta Orsamentu Retifikativu 2022 iha faze jeneralidade ho montante billiaun $1,129,857,250 ho votu a-favór 36, kontra 24 no abstensaun 5.

“Proposta Lei númeiuru 38/v (4­­­­­­­a) Primeira alterasaun  lei númeiru 1/2022 de janeiru, Orsamentu Jerál Estadu (OJE) 2022 , segundu alterasaun lei númeiru 8/2008 juñu, kona-ba kria tributária no kriasaun fundu ba kombatente libertasaun nasionál ho montante billiaun $1,129,857,250  aprovadu iha jeneralidade,” Prezidente Parlamentu Nasionál, Deputadu Aniceto Longuinhos Guterres Lopes, hateten iha plenária Parlamentu Nasionál.

Tanba aprovadu ona iha jeneralidade, nune’e iha loron tersa (10/05) no kuarta (11/05) kontinua ba diskusaun iha fase espesialidade.

“Ita tenke la’o tuir giaun diskusaun espesialidade komesa iha aban, tuku 9:00, dader, ba diskusaun espsiálidade iha proposta ne’ebé dadaun tama iha meja Prezidente Parlamentu nian maka 18 proposta hein katak bele admite hotu,” nia afirma.

CNRT konsidera OR la prenxe rekezitu legál 

Bankada Oposizaun  Partidu CNRT iha Parlamentu Nasionál konsidera Orsamentu Retifikativu (OR), la prenxe rekezitu legál Fundu Petroliféru tanba orasamentu ne’e  ho montante ne’ebé bo’ot.

Deputada CNRT, Carmelita Caetano Moniz. Imajen/Dok. TATOLI

“Orsamentu Retifikativu ida ne’e la prense rekezitu legál tuir artigu 8 no 9 hosi lei petroliféru nian, tanba ne’e mak ohin ami haruka  karta ida ba Prezidente Parlamentu Nasionál hodi hato’o ba Governu,” hateten  Deputada Bakada CNRT, Carmelita Moniz, liuhosi nia intervesaun.

Deputada ne’e dehan, antes Governu husu atu preve tan Orsamentu Retifikativu ne’e hato’o relatóriu ba Parlamentu tuir lei jestaun finanseiru artigu 9.

“Governu la mai hato’o relatóriu auditória  kona-bá Redimentu Sustentavél Estimativu tuir artigu 9, maibé Governu hato’o deit ofisiu ida iha proposta lei ba Orsamentu Jerál  hosi Ministru Finansa ba Primeiru Ministru no mai iha Parlamentu Nasionál,” nia lamenta.

Maski, Deputada CNRT konkorda Governu husu OR tanba normál iha kualkér Governu no tuir lei jestaun finanseiru no alterasaun  enkuadramentu finanseira.

“La’ós hanesan agora dadaun Governu ne’e mai husu Osamentu Retifikativu ne’ebé que ita halo programa sira ne’ebé la estipuladu iha OJE 2022, maibé programa sira  ne’ebé maka mosu tanba de’it lista kompra iha kampaña Eleisaun Prezidensiál,” nia afirma.

Nune’e, husu ba Governu Orsamentu Retifikativa karik aprova Governu tau osan hodi normaliza folin sasan ne’ebé sae iha Timor liuhosi fó subsídiu  atu povu bele sente katak bele fó benefisu ba povu no hasae ezekusaun  iha kapitál dezenvolvimentu sira.

“Halo taxa ezekusaun ne’ebé mak di’ak atu ita mós bele hadia ita nian ekonómia tanba ita haree ezekusaun ne’e hakdasak tebes,” nia afirma.

PD husu interven presu sasan

Entretantu, Prezidente Partidu Demokrátiku (PD), Mariano Assanami Sabino, husu Governu tenke foti asaun ida hodi rezolve krize ekonómiku halo intervesaun merkadu tanba folin presu mundiál ne’ebé sae makas afeta ba povu Timor-Leste.

Deputadu PD, Mariano Assanami Sabino. Imajen TATOLI/Egas Cristóvão

Tanba ne’e,  nia husu Governu tenke utuliza Orsamentu Retifikativu hodi haree ona medida ruma halo intervensaun hodi rezolve ketaun ne’e atu labele afeta ba povu ki’ik nia moris.

“Ba ha’u urjensia Governu tenke rezolve maka folin prezu nesesidade bazika ne’ebé sa’e makas hodi halo intervesaun,” Assanami rekomenda.

Bankada PD apresia ho hanoin ida katak importante tebes tenke tau hamutuk enérjia no forsa ita hodi buka solusaun ba kestaun krize ba presu mundiál hodi labele afeta makas ba povu kiik sira nia moris.

PM agradese PN

Primeiru Ministru (PM) Taur Matan Ruak. Imajen Tatoli/Francisco Sony

Entertantu, Primeiru-Ministru, Taur Matan Ruak, apresia no agradese ba deputadu sira iha durante diskusaun jeneralidade, hodi hatutan  Governu rejista preokupasaun deputadu sira nian no prontu hakle’an iha diskusaun espesialidade iha loron tersa no kuarta mai.

Proposta OR ho montante billaun $1,129, ne’ebé prevee ba transferénsia públika $1,837,634.189, bens no servisu $466,877.382, kapitál dezenvolvimentu $390,177.399, saláriu no vensimentu $250,537.130 no kapitál menór $41,914.097.

Orsamentu Retifikativu ne’e mai ho medida  13  mak hanesan;

1) Atribuisaun osan fulan da-13 ba kada família (exeptu funsionáriu públiku sira;

2) Projetu Uma Kbiit Laek Plus; 

3) Bolsu Estudu ba Mellór Graduado Estudante;

4) Kriasaun Fundu Veteranu;

5) Programa Maundobra ba Postu Administrativu (PEMOPA); 6) Harii Sede ba Arte Marsiál no Rituál;

7) Programa Eskola iha uma (home school;

8) Oferese  internet gratuitu ba eskola sira hahú hosi Eskola Infantil to’o Ensinu Superior;

9) Buka Empregu ba mellór alunu universitáriu sira;

10) Estabelesimentu Sekretaria ba Asuntu Traballadór Esteriór no Komunidade Timoroan iha Diáspora;

11) Revitaliza kafé no subsídiu ba kafé Laku-teen;

12) Subsídiu akomodasaun ba PNTL no F-FDTL;

13) Pagamentu  renumerasaun PNTL nian ho rejime salariál foun.

Jornalista : Natalino Costa

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here