DILI, 02 maiu 2022 (TATOLI) – Eis Diretór Servisu Edukasaun Dili, Duarte Braganza rekoñese asina ona diploma estudante finalista hosi eskola 18 nian, maibé seidauk bele entrega. Tanba, to agora seidauk simu renovasaun karta despaxu hosi Ministru Edukasaun Juventude no Desportu. Armindo Maia.
“Agora daudaun iha eskola hamutuk 18 ninia diploma ha’u asina ona. Maibé ha’u hateten ona ba Koordenadór unidade kurríkulu nasionál katak diploma estudante sira nian iha hela ha’u nia liman. Ha’u seidauk bele entrega. Tanba ha’u hein hela despaxu Ministru nian tenke troka ninia kontiudu lia fuan. Se troka ona, hau pronto entrega diploma sira ne’e,” Eis Diretór Duarte Braganza hateten ba Tatoli liu hosi via telefone, segunda ne’e
Nia husu ba Ministériu atu troka lia fuan iha despaxu Ministru nian ne’e. Tanba, hanesan eis Diretór hakarak atu asegura malu. Tanba solusaun ne’e atu evita mosu problema iha tempu tuir mai.
“Ha’u hakarak dehan karta despaxu Ministru nian haruka mai ha’u atu husu asina diploma estudante finalista sira nian ne’e labele hakerek kona ba Plu (delega). No, Ministru Edukasaun mos ko’alia ho ibun de’it bainhira ha’u ba hasoru nia (Ministru) iha Ministériu,” tenik Duarte.
Nia esplika bainhira dokumentu formál ida maka hakerek fali lia fuan Plu, mak ne’e susar ona. Tuir nia dokumentu orijinál labele iha lia fuan ne’e. Nia dehan lia fuan ne’e bele hakerek de’it iha karta baibain ka konvite ruma.Nune’e mós kuandu karta formal ruma labele hateten delega tanba Diretór atuál iha ona. Karik husu atribuisaun kompeténsia ne’e laiha poblema.
“Sé karta ne’e maka hakerek atribuisaun kompeténsia ba ha’u laiha problema, nu’udar eis Diretór Edukasaun Munisípiu Dili, ha’u bele kontribui. Maibe ha’u kestiona maka karta despaxu ne’e delega fali ne’e,” tenik nia.
Duarte Braganza relata katak karta formál ne’ebé fó kompeténsia ba nia atu asina, mezmu Diretór Servisu Edukasaun Dili hasai ona hosi ninia pozisaun, maibé administrativamente, MEJD kontinua delega kompeténsia ba nia nu’udar eis Diretór atu bele kompleta ninia kna’ar durante fulan rua entre novembru no dezembru 2021 hodi bele asina diploma estudante finalista sira nian.
Nia husu ona ba Koordenadór Unidade Kurríkulu Nasional atu responde ninia ejijénsia sira ne’e iha tempu besik atu labele prejudika estudante sira nia estudu. Tanba oras ne’e daudaun estudante barak maka hein hela sira nia diploma atu garante sira nia kontinuasaun estudu iha ensinu superiór.
Enkuantu Ministru MEJD, Armindo Maia rekoñese wainhira hatún despaxu Ministeriál hodi delega eis diretór Edukasaun Dili asina diploma estudante finalista sira nian hetan ona paresér legal katak bele. Konteúdu karta despaxu ne’e husu eis Diretór edukasaun Dili atu asina diploma estudante finalista sira ne’ebe delega (Plu) hela ba Diretór. Tanba ne’e iha baze legál.
Jornalista: Tomé Amado
Editóra : Armandina Moniz
