Semáforu iha Supermerkadu Leader nia oin la funsiona. Imajen Tatoli/Natalino Costa.

DILI, 11 maiu 2022 (TATOLI)—Diretór Dirasaun Nasionál Transporte no Terrestre (DNTT), António da Costa, informa DNTT daudaun ne’e hahú halo ona manutensaun ba semáforu ne’ebé avaria iha dalan protokolu iha kapitál Dili.

Notísia RelevanteMinistru José Agustinho orienta responsável aselera konkursu manutensaun semáforu

“Ligadu ho semáforu iha kapitál Dili, horisehik ami bolu ona kompañia atu hadi’a. Hori kalan iha área Palásiu Prezidente hahú hadi’a ona. Maibé, iha parte Bairru Pite tun ba mak seidauk hadi’a, enkuantu parte hosi Dirasaun Comoro mai Palásiu Governu no hosi tasi ibun sa’e mai ne’e sira hadi’a ona. Nune’e, ha’u garantia katak semana ida tan, ita-nia semáforu iha Dili laran bele hadi’a hotu ona,” António da Costa hateten ba Agência Tatoli, iha nia knar fatin, Dili, kuarta ne’e.

Iha área seluk, nia esplika, ba semáforu ne’ebé avaria iha kapitál Dili, empreza halo ona manutensaun ba ida-idak tanba ema limitadu, tanba ne’, kompañia sei book uluk iha Palásiu Prezidente hotu ona, sei mai fali Colmera.

“Semáforu iha Dili laran avaria, inklui semáforu iha Vila Verde sira sei hadi’a hotu,” nia dehan.

Enkuantu, ba ekipamentu semáforu ni’an, kompañia mak kompra hosi ne’e sira mak monta ba semáforu sira-ne’ebé avaria.

Kona-ba konkursu laiha aplikante maibé kompañia hahú halo manutensaun, nia hatán, ida-ne’e Ministru Transporte no Komunikasaun (MTK) José Agustinho da Silva nia kompeténsia atu halo ajudikasaun direta. Tanba ne’e Ministru ajudika ona Empreza Malsam Savio Unipesoál, Lda, hodi halo manutensaun ba semáforu hirak ne’e.

“Ministru nia kompeténsia atu ajudikasaun direta. Buat ajudikasaun direta ne’e hatudu direta ba empreza balun ne’ebé hakarak hadi’a, bele hadia. Tanba ne’e, kompañia hahú hadi’a ona semáforu sira-ne’e,” nia dehan.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here