Semáforu iha Supermerkadu Leader nia oin la funsiona. Imajen Tatoli/Natalino Costa.

DILI, 10 maiu 2022 (TATOLI)–Ministru Transporte no Komunikasaun (MTK), José Agustinho da Silva, orienta ona responsável aprovizionamentu aselera prosesu konkursu manutensaun ba semáforu sira ne’ebé daudaun avaria.

“Prosesu konkursu la’o iha diresaun nasionál hela no diretór relata hela mai ha’u katak sira aselera hela prosesu. Ha’u mós orienta ona ba kargu xefia sira katak empreza sira maski hakarak valór boot maibé orsamentu ne’ebé prevee ba verba ne’e ho valór oituan de’it, entaun husu sira (empreza) atubele kontribui ba situasaun agora,” Ministru José hateten iha resintu Parlamentu Nasionál, tersa ne’e.

Notísia relevante: Governu loke ona konkursu manutensaun semáforu maibé seidauk iha aplikante

Governante ne’e rekoñese, bainhira laiha semárfuru bele iha risku ba dezastre tráfegu tanba laiha sinál tránzitu atubele organiza movimentu transporte rodaviária, nune’e mós haree ba daudaun Governu iha faze prepara eventu boot rua ne’ebé sei partisipa hosi bainaka internasionál sira.

“Semáforu fahe ba kategoria, parte ida monta foun hanesan iha diresaun Kuluhun no Elemloi ne’ebé prosesu la’o hela, iha nanis maibé ho kondisaun a’at. Ida-ne’e ami loke ona konkursu maibé tanba orsamentu kiik entaun ema la interese konkorre. Ho ida-ne’e ministériu halo desizaun adjudika ba empreza sira ne’ebé durante ne’e asegura no prosesu oras ne’e iha hela diresaun nasionál aprovizionamentu,” nia akresenta.

Maski nune’e, Ministru la fó sai montante orsamentu ne’ebé prevee ba manutensaun semáforu.

“Semárfuru iha diresaun Aitarak-laran kleur ona avaria, maibé hafoin ha’u buka informasaun hosi Diresaun Nasionál Transporte Terrestre (DNTT) katak ita-nia semáforu ne’e ninia voltajen la hanesan uza iha sidade sira seluk hanesan iha Kupang-Indonézia, entaun ninia stoke kuaze laiha no buat ne’e halo iha Jogja, atu hameno ne’e labele ida de’it tenki pakote,” nia esplika.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here