Vise-Ministru Turizmu, Komérsiu no Indústria, Domingos Lopes Antunes. Imajen TATOLI/Egas Cristóvão

DILI, 12 abril 2022 (TATOLI)—Empreza lokál hamutuk 23 sai ona benefisiáriu ba programa fasilidade garantia kréditu suave ho juru 3% kada tinan, ne’ebé introdús hosi Ministériu Turizmu Komérsiu no Indústria (MTKI) ho apoiu hosi Programa Nasaun Unida ba Dezenvolvimentu (PNUD).

Programa ne’e lansa iha 21 setembru 2021 ba mikro, pekena no médiu empreza ne’ebé foin hahú atividade negósiu ka eziste ona iha área produtivu.

“Hahú lansamentu to’o agora, iha aplikasaun hamutuk 90 atu asesu ba kréditu, maibé na’in-23 mak sai benefisiáriu, na’in-sia prosesu hela iha BNCTL, no devolve filafali ba na’in hamutuk 11 tanba la prienxe rekezitu,” Vise-Ministru Turizmu Komérsiu no Indústria, Domingos Lopes Antunes, hateten ba Agência TATOLI, iha ninia knaar fatin, Bebora, tersa ne’e.

Notísia relevante: Governu lansa garantia kréditu ba empreza sosiál ho funan porsentu tolu

Banku Nasionál Komérsiu Timor-Leste (BNCTL, sigla portugés) fó ona kréditu ba benefisiáriu 23 ne’ebé halo atividade negósiu iha área turizmu, agrikultura, indústria, no komérsiu, ho totál kréditu $371.990, ne’ebé fó ona serbisu ba timor-oan 174.

Objetivu Governu prevee fundu fasilidade garantia kréditu suave iha BNCTL atu fó kobertura ba empreza ho risku a’as no iha limitasaun, nune’e bele finansia espansaun negósiu inklui rekupera finanseiru hosi krize pandemia COVID-19.

“Governu hanoin diversifika ekonomia rai-laran, entaun medida introdús hodi apoiu setór privadu sira ativa negósiu iha área produtiva sira, liuliu iha área agrikultura, peska, turizmu, indústria kiik no turizmu komunitária, inklui setór seluk hanesan água, floresta no pekuária ne’ebé iha potensialidade boot tebes,” Vise-Ministru akresenta.

Aleinde ne’e, objetivu seluk hosi programa kria empregu no rendimentu ba povu liuliu iha área rurál no foku enkoraja joven sira ne’ebé iha área rurál atu partisipa iha programa kréditu ho funan kiik.

Governu no PNUD disponibiliza fundu

Governu disponibiliza fundu hamutuk $1.380.330 no PNUD $500.000 hodi implementa programa kréditu suave.

“Ita bolu kréditu suave tanba nia funan ne’e kiik liu, kompara ho kréditu seluk ho funan boot. Programa ne’e iha vantajen di’ak ba empreza ne’ebé asesu tanba benefisiáriu la selu 3% iha períodu grasa hosi fulan-tolu to’o neen,” governante ne’e informa.

Durasaun kréditu hahú hosi tinan ida to’o tolu iha BNCTL no empreza bele asesu kréditu hahú hosi $1.000 to’o $25.000.

“Ida-ne’e sei hadi’a ita-nia moris no ita la tane liman ba ema, ba futuru ami komprometidu programa ne’e sei kontinua nafatin no tinan ne’e loke tan hodi ita tau osan hamutuk millaun $5, nune’e joven sira ne’ebé dedika-an halo négosiu ba mikro, pekena no médiu empreza bele asesu ba programa ne’e,” nia salienta.

Notísia relevante: MTKI-BNCTL asina akordu ho benefisiáriu garantia kréditu sosiál

Kritériu atu sai benefisiáriu ba programa maka tenke rejistradu hanesan entidade formál ida iha Servisu Rejistrasaun no Verifikasaun Emprezariál Instututu Públiku (SERVE) no tenke iha planu negósiu, iha kartaun eleitorál, billete identidade no seluk tan.

Komisaun responsável ba programa fasilidade garantia kréditu suave no sei halo avaliasaun no verifikasaun prosesu asesu kréditu mak MTKI, BNCTL, Kámara Komérsiu Indústria Timor-Leste (CCI-TL, sigla portugés) no Institutu Apoiu Dezenvolvimentu Emprezariál (IADE).

 Jornalista : Arminda Fonseca

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here