Administradór munisípiu Viqueque, Januário Soares 'Boly'. Imajen Tatoli/Vitorino Lopes da Costa

VIQUEQUE, 10 maiu 2022 (TATOLI)—Munisípiu Viqueque prevee ona orsamentu hamutuk $7.500 hodi komemora loron restaurasaun independénsia Timor-Leste ba da-XX iha loron 20 maiu.

“Orsamentu ita koloka ba postu lima hodi hala’o atividade dada bandeira iha kada postu. Ita aloka orsamentu $3.000 ba postu Ossu, Uatulari, Uatucarbau no Lacluta ne’ebé kada postu sei hetan $750,” Administradór munisípiu Viqueque, Januário Soares ‘Bolly’, informa ba Agência Tatoli, iha ninia knaar fatin, tersa ne’e.

Munisípiu Viqueque sei realiza serimónia hamutuk ho  postu administrativu Viqueque vila, ho alokasaun orsamentu hamutuk $4.500.

“Komisaun organizadora sira sei prepara estudante ba isar bandeira no drum band, enkuantu membru Governu ida mak sei lee diskursu Prezidente Repúblika iha munisípiu ne’e. Agora ha’u seidauk simu informasaun katak ministru ida ne’ebé maka mai Viqueque,” nia akresenta.

Notísia relevante: PNTL preparadu asegura seremonia pose PR eleitu no Restaurasaun Independensia

Molok komemora loron nasionál ne’e, autoridade sei apela komunidade halo limpeza no taka estrada sira ne’ebé bee nalihun hanesan iha parte Beloi.

“Ha’u husu ba Servisu Ministériu Obra Públika (MOP) Viqueque halo koordenasaun ho empreza sira ajuda aterru dalan iha parte Beloi ne’ebé daudaun ne’e tahu nakonu,” nia tenik.

Nune’e mós, administrasaun munisípiu Viqueque sei husu misa ba saudozu sira no kari ai-funan iha parte lokraik iha loron 19 maiu.

Aleinde ne’e, sei iha atividade desportiva maibé autoridade munisípiu Viqueque sei husu apoiu  ba Sekretáriu Estadu Juventude no Desportu (SEJD) atu apoiu orsamentu realiza jogu.

“Atividade desportu komunitáriu la prevee osan. Tanba ne’e maka ita husu apoiu ba SEJD hodi realiza atividade desportiva jogu futeból,” Autoridade munisipál ne’e salienta. 

Jornalista : Vitorino Lopes da Costa

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here