Membru PNTL halo hela seguransa bainhira STAE halo distribusaun ba material snsitivu no buletin de votu, kuarta 13 april 2022.Imajen Tatoli/Antonio Daciparu

DILI, 02 maiu 2022 (TATOLI)— Komandante Jerál Polisia Nasionál Timor-Leste (PNTL), Komisáriu Faustino da Costa, hateten PNTL preparadu no prontu asegura seremonia pose ba Prezidente Repúblika eleitu foun no Komemorasaun Restaurasaun Independensia  ba dala-XX.

“Ha’u husu komandante PNTL sira fó seguransa másimu ba seremonia pose Prezidente Repúblika eleitu no komemorasaun loron Restaurasaun Independensia,” Komandante Jerál PNTL ne’e, hateten hafoin enkontru avaliasaun seguransa ba atividade kampaña eleisaun presidensiál dahuluk no segunda volta iha Timor-Plaza, Dili, segunda ne’e.


Komandante Jerál Polisia Nasionál Timor-Leste (PNTL), Komisáriu Faustino da Costa, hamutuk ho estrutura komandu PNTL hala’o reuniaun avaliasaun progresu no dezafiu kampaña no eleisaun prezidensiál. Imajen. Natalino Costa.

PNTL hahú prepara an asegura seguransa ba seremonia iha loron 19, kalan no 20 maiu  ba  selebrasaun Restauraaaun Independesia  Timor-Leste ba dala-XX iha nivél nasionál no mós iha munisípiu sira.

Komandu PNTL sei la tolera kualkér krime ne’ebé halo hosi ema balun atu kria instabilidade iha eventu rua importante ne’e.

Komandu PNTL hakarak asegura seguransa ne’ebé di’ak ba komunidade sira liuliu vizibilidade hahú hosi munisipiu sira no atividade polisiamentu komunitariu nian  hodi asegura atividade rodaviáriu nian.

Hahú janieru too fulan ne’e kazu krime iha territóriu nasionál tun, maibé iha kazu tara aan mak númeru sa’e, nune’e  husu ba  Munisípiu sira  no Ofisiál Polísia Suku (OPS) atu buka problema hun ba kazu tara an ne’e.

Sosa rádiu no instala torre lima

Iha reuniaun ne’e, Komisáriu Faustino dehan avalia servisu seguransa ba eleisaun prezidensiál hodi haree dezafiu no progresu atu nune’e bele hadia ba futuru.

“Ami koalia asutu tolu ida maka Komandante sira aprezenta ninian progresu seguransa ba iha festa demokrásia ninian iha munisípiu sira hotu, tanba ita hotu hatene Komandu hatun hotu kedan efetivu sira, hodi asegura ita nian kampaña  eleisaun prezidensiál,” nia akresenta.

Kona-ba dezafiu ne’ebé maka membru hasoru iha kampaña no eleisaun Prezidensiál 2022 mak  rekursu umanu, rádiu komunikasaun no  transporte.

Nune’e, Komandu hahú halo ona akizasaun ba transporte hodi koloka ba Komandu Munisípiu sira atu ajuda serbisu PNTL nian iha tereñu.

“Ita hola ona karreta 30-resin atu distribui ba Komandu Munisípiu sira atu apoia membru sira ba servisu operasaun nian. Kona-bá rádiu komunikasaun nian hahú prevee ona orsamentu iha Orsamentu Jerál Estadu 2022 millaun $1-resin atu halo instalasaun  ba torre lima  inklui halo mós akizasaun ba rádiu komunikasaun,” nia esplika.

Torre lima ne’e sei konstrui rua iha Atauro, ida iha RAEO no rua seluk fatin sei halo identifikaun, hodi normaliza  komunikasaun  membru PNTL nian bele la’o di’ak  liutan.

Iha biban hanesan, Vise Ministru Interiór António Armindo, afirma problema rekursu umanu, transporte no komunikasaun sai peukupasaun.

“Ha’u haruka ona proposta ida ne’e ba Primeiru Minitru tanba akizasaun ba rádiu Komunikasau ne’e montante milliaun $1-resin.  Daudaun Komisaun Nasionál Aprovizonametu (CNA, sigla portugés) loke ona konkursu. Kona-ba torre Komandu planeia atu instala torre lima ho orsamentu rihun $200,” Nia afirma.

António Armindo, informa hahú planu halo akizasaun karreta hamutuk 61 ba Eskuadra PNTL 39 hodi apoia serbisu operasionál Komandu nian iha nivél postu administrativu.

Tuir dadus PNTL hato’o mai Ministériu Interiór ne’e iha Eskuadra hamutuk 39 ne’ebé nia kondisaun karreta aat hotu, nune’e sei halo akizasaun tan ba karreta hamutuk 61, hodi apoia serbisu operasaun.

“Iha Eskuadra sira ne’ebé mak karreta kondisaun aat ita haree troka tanba naturalmente iha Eskuadra sira ne’e serbisu barak loos liuliu sa’e foho tun foho presiza karreta di’ak,” Vise Ministru ne’e afirma.

Prosesu akizasaun ne’e Ministériu Interiór preve mós milliaun $1-resin iha OJE 2022, nune’e prosesu konkursu públiku hala’o ona hosi CAN.

Jornalita: Natalino Costa

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here