Diretór Nasionál Empregu Exteriór SEFOPE, Filomeno Soares. Imajen Tatoli/Francisco Sony

DILI, 09 maiu 2022 (TATOLI)–Sekretaria Estadu Formasaun Profisionál no Empregu (SEFOPE) liuhosi Diresaun Nasionál Empregu Exteriór (DNEE), segunda ne’e haruka tan traballadór timor-oan ba serbisu iha Austrália liuhosi programa Pacific Australia Labour Mobility (PALM), iha kompañia Ashbern Farm.

“Governu Timor-Leste liuhosi SEFOPE marka tán história ida, haruka traballadór timor-oan na’in-24 serbisu iha Austrália ho durasaun kontratu fulan-sia,” Diretór Nasionál Empregu Exteriór, Filomeno Soares, hateten, liuhosi nota ne’ebé Agência Tatoli asesu, segunda ne’e.

Notísia relevante: SEFOPE despede traballadór timor-oan na’in-69 desloka aban bá Austrália

Nia dehan, durante pandemia COVID-19 Governu Austrália la simu traballadór hosi nasaun hotu ba servisu iha Austrália, maibé iha tinan 2022, Austrália hahú simu filafali traballadór, nune’e daudaun ne’e Timor-Leste konsege haruka ona timor-oan ba serbisu iha Austrália hamutuk 568, kompostu hosi mane 432 no feto 136.

Nune’e, nia apela ba traballadór timor-oan sira ne’ebé hetan ona oportunidade ba serbisu iha Australia, atu hatudu komportamentu di’ak, labele halai ses hosi sistema, hodi nune’e empregadór sira bele fó tan serbisu ba joven timor-oan barak ne’ebé agora hein hela oportunidade atu ba serbisu.

“Ha’u husu ba kandidatu traballadór timor-oan sira hotu ne’ebé naran iha ona sistema work ready pool SEFOPE nian, buka nafatin aprende lian inglés hodi bele komunika ho empregadór sira karik iha entrevista no kuidadu saúde, tanba iha tinan ida-ne’e demanda hosi Austrália tama maka’as,” nia hameno.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

1 KOMENTÁRIU

  1. Rekomenda Ba agenjia tatoli .
    Atu husu tok informasaun sobre oportunidade ida ne.
    Tamba sa 2018 ho 2019 barak maka seidauk hetan oportunidade..maibe foku los deit ba 2020 nian ne.

    Rajaun tamba saida!?

    Obrigado ba servisu i Bom trabalho ba ekipa tatoli🤝🙏

HAKEREK NO HATÁN

Please enter your comment!
Please enter your name here