Sekertáriu Estadu Formasaun Profisionál no Empregu (SEFOPE), Alarico do Rosário. Imajen TATOLI/Francisco Sony

DILI, 08 marsu 2022 (TATOLI)--Sekretaria Estadu Formasaun Profisionál no Empregu (SEFOPE) liuhosi Diresaun Nasionál Empregu Exteriór (DNEE), tersa ne’e, realiza seremónia despedida ho traballadór na’in-69 no asina deklarasaun ho família, nune’e traballadór sira sei desloka aban bá Austrália.

“Asina deklarasaun hanesan tradisaun ida ba ita bainhira traballadór atu bá serbisu iha Koreia Súl ka Austrália, signifika parte Governu no família sira prontu husik sira-nia oan ba serbisu iha Austrália, nune’e buat ruma akontese, parte rua ne’e prontu hamutuk buka dalan hodi rezolve,” Sekretáriu Formasaun Profisionál no Empregu, Alarico do Rosário, hateten iha salaun DNEE, Becora.

Notísia relevante: Traballadór Timor-oan iha Austrália bele serbisu to’o tinan haat

Nune’e, nia enkoraja  joven traballadór ne’ebé hetan ona oportunidade atu hatudu nafatin komportamentu di’ak, kumpre komprimisu ne’ebé halo ona, hanesan labele ses-an hosi sistema, nune’e empregadór hosi Austrália bele emprega tan joven sira ne’ebé hein hela oportunidade serbisu. 

Iha biban hanesan, Diretór Nasionál Empregu Exteriór, Filomeno Soares, husu ba traballadór sira atu kuidadu-an no rai osan ho di’ak hodi haruka mai família iha Timór, nune’e bele deversifika ekonomia família no nasaun.

Traballadór ne’ebé aban desloka bá Austrália sei bá serbisu liuhosi programa Pacific Labour Scheme (PLS) na’in-hitu, kompostu hosi feto na’in-rua no mane na’in-lima, ba programa Seasonal Worker Programme (SWP) iha ema na’in-62, kompostu hosi mane na’in-45 no feto na’in-17.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here