Primeiru-Ministru, Taur Matan Ruak, akompaña ho membru Governu, defende Proposta Orsamentu Retifikativu tinan 2022 durante diskusaun iha faze jeneralidade ho membru Parlamentu Nasionál, iha sala planária, segunda (09/05). Imajen Tatoli/António Daciparu

DILI, 09 maiu 2022 (TATOLI)—Ministru Finansa (MF), Rui Augusto Gomes, klarifika, kriasaun fundu veteranu ne’ebé Governu prevee biliaun $1 hosi Proposta Orsamentu Jerál Estadu (OJE) Retifikativu tinan 2022 sei gasta hosi retornu investimentu.

“Ita sei gasta retornu hosi investimentu fundu ne’e rasik, nune’e sei akontese kontabilistikamente, konserteza bainhira ita foti osan atu kria fundu foun ida sei afeta ba kapitál fundu petrolíferu daudaun ne’e. Karik ita hakarak gasta dala-ida de’it maka sertamente lori dezastre boot mai Timor-Leste. Maibé la’ós intensaun atu gasta dala-ida de’it, gasta bazeia ba retornu no fundu ne’e sei fó fila,” Ministru Rui esplika durante debate Orsamentu Retifikativu 2022 faze jeneralidade iha sala plenária, Parlamentu Nasionál, segunda ne’e.

Notísia relevante: PN aprova debate proposta Orsamentu Retifikativu ho karáter urjénsia

Governante ne’e fundamenta, foin lalais Governu halo segmentasaun ba fundu petrolíferu atu kria likidéz no mós ba kresimentu fundu ne’e rasik, ho intensaun atu evita gasta ho maneira asesiva, nune’e bele utiliza likidéz ne’ebé aloka ona.

Aleinde ne’e, kapitál iha fundu veteranu no kombatente libertasaun nasionál sei la gasta dala-ida de’it.

“Iha proposta temi katak kriasaun fundu ba kombatente libertasaun nasionál. Ida-ne’e parese problema ida ho ninia konsikuénsia sei hamohu fundu petrolíferu lalais de’it. Fundu ne’e la’ós atu gasta dala-ida de’it, konstituisaun fundu ne’e ho baze foti osan hosi fundu petrolíferu no kria fundu foun ida. Hosi fundu petrolíferu maka sei transfere osan ba fundu foun ne’e, signifika kapitál iha fundu rua ne’e sei la altera,” nia akresenta.

Modelu atuál iha dezvantajen

Iha biban hanesan, Primeiru-Ministru, Taur Matan Ruak, rekoñese modelu atuál ne’ebé veteranu sira uza iha desvantajen rua.

“Dahuluk maka fahe veteranu sira, ne’ebé diskrimina tebes, balun simu balun la simu. Ita halo lei atu grupu kiik-oan ida mak simu, daruak mak la sustentável tanba desde tinan 2008 to’o 2022 ita foti hamutuk biliaun $1,2 ba veteranu sira de’it,” Xefe Governu dehan.

Dadaun ne’e Governu halo hela verifikasaun dadus hamutuk 124.000 ne’ebé rejistu iha tinan 2009, ne’ebé hosi númeru ne’e, sorin balun de’it maka kada tinan bele simu to’o millaun $200 resin, ho tan benefisiáriu 26.000 simu kuaze millaun $90, maibé bele atinje to’o millaun $300 kada tinan, ne’ebé durante tinan haat de’it bele ultrapasa biliaun $1,2.

Ho razaun ne’e, Governu kria fundu veteranu ho modelu foun, atu implementa maka foti dala-ida de’it maibé uza de’it juru.

“Kuaze juru 3%, signifika kada tinan millaun $30, kuandu ida-ne’e la diskrimina, katak ema hotu bele iha direitu hahú hosi fulan-neen ba-leten. Kuandu foti dala-ida de’it, ita uza juru no bele jerasionál do que sistema ida agora. Ha’u preokupadu ho modelu atuál,” nia tenik.

Iha Proposta OJE Retifikativu 2022, despeza tuir klasifikasaun ekonómiku, hanesan reseita konsolidada setór públiku administrativu sa’e ba $3.234.522.481, enkuantu despesas konsolidada setór públiku administrativu sa’e ba $3.233.908.681.

Reseita hosi órgaun servisu administrasaun sentrál sa’e ba $2.987.140.197, enkuantu despeza órgaun servisu administrasaun sentrál sa’e ba $2.987.140.197, ne’ebé fahe tuir kategoria klasifikasaun ekonómiku hanesan transférensia públika $1.837.634.189, bens no Servisu $466.877.382, kapitál dezenvolvimentu $390.177.399, saláriu no vensimentu $250.537.130 no kapitál menór $41.914.097. 

Orsamentu Retifikativu finansia medida komplementár 13 ho nia alokasaun orsamentu mak hanesan, Kriasaun Fundu Veteranu ho orsamentu alokadu biliaun $1, atribuisaun pagamentu désimu terseiru $200 ba kada família eseptu funsionáriu públiku sira ho orsamentu alokadu millaun $70, Uma Kbiit Laek Plus (UKL+) ho orsamentu alokadu millaun $25, Bolsa estudu ba mellor graduadu estudante ensinu báziku no sekundáriu ho orsamentu alokadu millaun $7,5.

Programa Mão de Obra ba postu administrativu millaun $7,2, kafé no subsídiu ba kafé Laku-teen ho orsamentu alokadu millaun $6,4, pagamentu ba diferensa remunerasaun Polísia Nasionál Timor-Leste (PNTL) ho rejime salariál foun, ba membru Polísia 4.096 ho orsamentu alokadu millaun $5,1, harii sede arte-marsiál no rituál millaun $2,5, programa eskola iha uma ho orsamentu alokadu millaun $2,1, internet gratuita iha eskola sira millaun $1,1, subsídiu akomodasaun ba PNTL no FALINTIL-Forsa Defeza Timor-Leste (F-FDTL) ho orsamentu alokadu millaun $1,9, estabelesimentu sekretária ba asuntu trabaladór exteriór no komunidade Timor-oan iha diáspora $500.000 no empregu ba mellór alunu universitáriu sira $437.500.

Liuhosi proposta Orsamentu Retifikativu ne’e, Governu propoin ba Parlamentu Nasionál atu halo reforsu finanseiru ba iha títulu Dotasaun Ba Governu Tomak no kria Programa foun hanaran medida orsamentu komplementár no ida-ne’e Governu halo atu labele book ka muda estrutura orsamentu pur programa.

Orsamentu Retifikativu ne’ebé Governu aprezenta ho intensaun atu redús impaktu ekonómiku ba timor-oan sira kauza hosi situasaun ekonómiku internasionál no aumentu substansiál taxa inflasaun ne’ebé sa’e ba beibeik.

Antes propoin Orsamentu Retifikativu, Governu submete tetu OJE 2022 ho montante biliaun $1,675 ba Parlamentu Nasionál, kompostu hosi saláriu no vensimentu millaun $233, bens no servisu millaun $449,98, transferénsia públika millaun $565,9, kapitál menór millaun $24,4 no kapitál dezenvolvimentu millaun $401,7.

Maibé liuhosi debate espesialidade iha proposta adisionál hamutuk 165 hosi deputadu sira no hosi proposta hirak ne’e mak iha adisionál millaun $300 resin, nune’e OJE 2022 sa’e ba biliaun $1,967.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here