Prezidente ANC, João Olívio Freitas. Imajen Tatoli/Francisco Sony

DILI, 09 maiu 2022 (TATOLI)—Autoridade Nasionál Komunikasaun (ANC, sigla portugés) foin lalais ne’e fó sansaun koima ba operadór telekomunikasaun ne’ebé opera iha Timor-Leste tanba la kumpre implementasaun Dekretu Governu númeru 9/2008 kona-ba regula prestasaun servisu telekomunikasaun iha rede móvel.

Tuir Prezidente ANC, João Olívio Freitas, desizaun ne’e bazeia ba kompeténsia autoridade ne’ebé hatuur ona iha Dekretu-Lei 15/2012 kona-ba regulamentu ba setór telekomunikasaun, ne’ebé atu regula, superviziona, fó sansaun, no reprezenta Governu iha plataforma setór telekomunikasaun iha rejionál no internasionál.

“Iha fulan-ida liubá ANC loke prosesu administrativu ida hasoru operadór servisu telekomunikasaun balun tanba sira la kumpre ka implementa Dekretu Governu númeru 9/2008, ne’ebé fó sansaun koima ba sira hamutuk $70.000, tanba sira komete infrasaun la rejista kartaun sim (pre-pagu) ne’ebé mak sira fa’an ba konsumidór sira,” Prezidente ANC informa iha salaun Ministériu Transporte no Komunikasaun, Caicoli.

Notísia relevante: ANC atribui sertifikadu lisensa espektru frekuénsia ba Telkomcel no Telemor

Maski nune’e, Prezidente ANC rejeita mensiona naran operadór telekomunikasaun rua ne’ebé komete infrasaun tanba kestaun ne’e liga ho asuntu komersiál.

Lejizlasaun ne’ebé autoridade aplika atu regula prestasaun servisu telekomunikasaun iha rede móvel, ligadu ho rejistrasaun nesesária molok asesu servisu telekomunikasaun.

Tanba ne’e, ANC divulga informasaun kle’an ba dirijente operadór telekomunikasaun sira kona-ba rejistrasaun kartaun pre-pagu, nune’e bele hatene rekezitu sira.

Dekretu-Lei ne’e mensiona katak atu asesu servisu telekomunikasaun liuhosi kartaun sim ne’ebé fa’an hosi operadór sira tenke rejistradu molok konsumidór ida utiliza no bainhira konsumidór ba sosa kartaun sim la rejistu uluk maibé utiliza ona, entaun operadór iha dever tomak atu asegura katak konsumidór ne’ebé uza kartaun la rejistu labele asesu ba telekomunikasaun hanesan telefone, manda mensajen no seluk tan.

“Hafoin ANC halo fiskalizasaun, ita hetan prova balun iha terrenu katak akontese duni utiliza simcard ne’ebé la rejistradu bele asesu telekomunikasaun, hafoin ita rekolla prova sira ne’e, ita lori mai Konsellu Administrasaun no loke prosesu ida halo notifikasaun ba operadór sira durante loron-15 hodi halo defeza, hafoin ANC tetu ita iha direitu no kompeténsia atu halo sansaun liuhosi administrativa hanesan suspende sira-nia lisensa,” nia tenik.

Nune’e, operadór telekomunikasaun sira iha obrigasaun atu kumpre regulamentu saida de’it mak Governu fó, maibé bainhira la kumpre ANC iha kompeténsia tomak fó sansaun tanba Dekretu-Lei 15/2012 fó kompeténsia ba ANC foti desizaun.

Iha programa VIII Governu konstituisionál hanesan meta ne’ebé ezekutivu siara hakerek atu reforsa no kapasita ANC, nune’e Konsellu Administrasaun nafatin esforsu hamosu programa kapasitasaun nesesária ba kuadru sira ANC nian.

“Programa kapasitasaun ne’e bele liuhosi partisipasaun iha treinamentu sira ne’ebé oferese hosi Uniaun Internasionál ba Telekomunikasaun ne’ebé Prezidente ANC mós partisipa, ses hosi partisipasaun programa kapasitasaun sira ne’e, sira mós halo protokolu kooperasaun ida ho orgaun reguladór hosi nasaun seluk mak Autoridade Nasionál Komunikasaun Portugal (ANACOM, sigla portugés).

“Ita asina ona protokolu kooperasaun ho ANACOM Portugal iha loron 22 abril 2022, iha Cabo Verde, bainhira delegasaun ANC ba partisipa iha Asembleia Jerál Artel CPLP nian,” nia informa.

Objetivu hosi kooperasaun atu apoiu di’ak liután dezenvolvimentu órgaun reguladór liuliu ANC iha Timor-Leste.

“Nune’e, iha aspetu ne’ebé ita atu konsentra mak dezenvolimentu kuadru legál, liga ho regulamentu sira hanesan merkadu atu regula di’ak liután, tékniku mak jestaun aspetu ne’e bele kona-ba lisensiamentu, planeamentu no mós ba fiskalizasaun. Protokolu ne’e ita asina ona, faze ne’ebé daudaun ita halo tuir mai mak oinsá atu implementa ho realizasaun protokolu ne’e liuhosi ita-nia kuadru ANC ne’ebé partisipa iha treinamentu nesesária sira iha ANACOM Portugal, iha tempu badak nia laran,” João Olívio esplika.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

1 KOMENTÁRIU

  1. Atu informa Tan dt, relasiona ho ANC fo sansaun koima nbe kapas los no sujere ba ANC, sebele Sira loke Sira Nia plaza municipio htu ingklui MOS iha Postu Sira, cliente nbe presiza atu hola simcard karik bele direita ba plaza Sira nian atu nune bele faselita comunidade Sira Diak Liu Tan.

HAKEREK NO HATÁN

Please enter your comment!
Please enter your name here