DILI, 17 setembru 2021 (TATOLI)—Ministériu Transporte Komunikasaun (MTK) liuhosi Autoridade Nasionál Komunikasaun (ANC, sigla portugés), ofisiálmente atribui sertifikadu lisensa espektru frekuénsia ba operadór telekomunikasaun Telkomcel no Telemor.
“Telkomcel ita aloka frekuénsia iha banda 2.300 MHz, ho ninia alokasaun 20 MHz, ba durasaun lisensa ba tinan 15, enkuantu ba Telemor, ita atribui lisensa espektru iha banda 2.600 MHz, ho ninia alokasaun 60 MHz, ba durasaun lisensa tinan lima,” Ministru Transporte no Komunikasaun, José Agostinho da Silva, hateten durante intervensaun iha seremónia entrega lisensa, iha salaun ANC, Caicoli, sesta ne’e.
Atribuisaun sertifikadu lisensa ne’e hosi Ministériu Trasporte Komunikasaun, José Agostinho da Silva, akompaña hosi Prezidente ANC, João Olívio Freitas no entidade relevante, ba Diretór Exekutivu Telkomcel, Yogi Rizian Bahar no Diretór Ezekutivu Telemor, Tran Vang Bang.
Notísia relevante: Komete infrasaun, operadór rua selu multa $223.200 ba ANC
Ho nune’e, Telkomcel sei selu taxa ho montante $2.637.980,50, enkuantu Telemor selu $791.394,76.
“Lisensa espektru frekuénsia ne’ebé maka Telkomcel hetan, bele aplika iha Dili de’it, sai hosi hosi área ne’e hanesan bá Liquiçáa, tenke aplika ba lisensa ketak no tenke selu taxa ketak. Kondisaun hanesan ANC aplika mós ba Telemor,” Ministru esplika.
Iha fatin, Diretór Ezekutivu Telkomcel iha Timor-Leste, Yogi Rizkian Bahar, apresia no kontente ba atribuisaun sertifikadu lisensa ne’e no promote sei hadi’a di’ak liutan banda internet iha Timor-Leste.
“Ami rekoñese katak daudaun ne’e ema sempre kestiona kona-ba kapasidade banda internet Telkomcel iha situasaun COVID-19 to’o agora, maibé ho alokasaun frekuénsia iha banda 2.300 MHz, ami sei mellora di’ak liután ami-nia asisténsia liña internet iha Timor-Leste,” nia promete.
Antes ne’e, reuniaun Konsellu Ministru iha 27 janeiru 2021, Ministru José Agustinho, aprezenta opsaun polítiku-lejizlativa kona-ba alterasaun dahuluk Dekretu-Lei Númeru15/2012, loron 28 marsu, kona-ba Regulamentasaun Setór Telekomunikasaun no ba kriasaun regulamentu hosi atus regulasaun administrativa iha setór telekomunikasaun.
Opsaun hirak ne’e ho objetivu atu altera ka reformula solusaun anteriór balun ne’ebé eziste ona no klarifika konseitu tékniku no jurídiku balun inklui tipu prosedimentu regulatóriu sira, ne’ebé klasifika asaun ka omisaun sira ne’ebé sai nu’udar konduta, proibida no esklarese ninia sansaun administrativa sira.
Liuhosi Dekretu-Lei Númeru 15/2012 loron 28 abríl, Governu harii ANC ho knaar atu regula telekomunikasaun, rádiu komunikasaun, radiudifuzaun, inklui Internet hosi operadór fornesedór.
Entretantu, nu’udar reguladór, ANC mós iha poder rekolla reseita hosi setór telekomunkasaun liuhosi jestaun rekursu rádiu-spektru, numerasaun (fixu, mobile, IP address, no domain name) inklui lisensa operasaun.
ANC iha mós dever atu kontribui filafali ba komunidade iha setór dezenvolvimentu liuhosi Universal Service Obligation (USO).
Jornalista : Natalino Costa
Editora : Julia Chatarina