Primeiru-Ministru, Taur Matan Ruak. Imajen Tatoli/Egas Cristóvão.

DILI, 06 maiu 2022 (TATOLI)-Primeiru-Ministru, Taur Matan Ruak, husu ba Traballadór Timoroan ne’ebé maka sei bá servisu iha Korea Súl atu hatudu komportamentu di’ak, buka atu adapta aan ho kultura lokál, no disiplina atu manán esperénsia servisu bainhira to’o iha nasaun ne’ebá.

Taur Matan Ruak, hato’o asuntu ne’e bainhira hamutuk ho Sekretáriu Estadu Formasaun Profisionál no Empregu (SEFOPE), Alarico do Rosário, Embaixadór Korea iha Timor-Leste, Kim Jeong Ho, hodi halo despedida ba traballadór hamutuk na’in 87, kompostu husi feto na’in rua no mane 85 ne’ebé maka tuir planu sei desloka ba Korea iha semana oin.

Notísia relevante : Traballadór Timoroan na’in 60 aranka tan ba Korea

“Ha’u-nia oan joven sira ba hetan rai foun, ema foun hahalok foun, hahán foun, lisan foun situasaun foun, ne’e mudansa ida boot, maibé ita-boot sira nia kolega barak dezde 2009 ba iha ne’ebá to’o agora sira hatudu katak sira bele adapta-an ba mudansa ne’e, ema dehan la’ós ida ne’ebé forte liu no ida ne’ebé matenek liu mak nia bele bá, maibé oin sira ne’ebé hatene adapta-an tuir ambiente sira, ida ne’e mak ba-oin sei moris, ita-boot sira hahú ida ne’e,”Taur hateten iha Timor-Logde, ohin.

Xefe Ezekutivu ne’e deseza susesu ba traballadór Timoroan sira no promete sei kontinua fó apoiu durante servisu iha Korea.

“Imi la mesak, ami hotu besik imi, tau-matan nafatin ba imi, rona imi, akompaña imi-nia situasaun. Embaixadór hateten imi kuandu ba, imi Koreanu ona, ne’e katak, imi-nia hahalok tenke tuir sira, disiplina ne’e importante, halo tuir regra ne’e importante loos,” Taur dehan.

Eis Xefe Estadu ne’e hateten antes ne’e halo ona vizita bá nasaun Korea Súl no observa katak ema Koreanu sira iha disiplina ba tempu, servisu maka’as hodi transforma sira-nia nasaun no vida pesoál.

Tanba ne’e, Timoroan presiza banati tuir ezemplu balun hanesan disiplina tempu, badinas atu servisu nune’e bele hetan osan hodi haruka mai família sira iha Timor-Leste, atu kontribui ba dezenvolvimentu nasionál.

Primeiru-Ministru ne’e mós husu ba inan-aman traballadór sira, atu uza osan ne’ebé oan sira haruka mai ho responsabilidade hodi halo investimentu liliu investe iha área edukasaun hodi haruka labarik sira bá eskola no seluk tan.

“Sira iha moto ida baibain ha’u uza ‘Toba Tarde, Hadeer Sedu, no To’o Uluk no Serbisu Badinas’ tanba ne’e imi labele haluha ami akompaña nafatin imi, imi serbisu iha ne’ebá, liliu Embaixadór no patraun sira iha ne’ebá sei tau-matan ba imi nafatin,”Xefe Governu hateten.

Ikusliu Taur agradese ba Governu Korea, espesiálmente ba Embaixadór Korea ho ninia ekipa ne’ebé trata  asuntu traballadór Timoroan sira hodi bá serbisu iha Korea Súl.

Embaixadór Korea ihaTimor-Leste, Kim Jeong Ho, relata antes ne’e, kada tinan haruka Traballadór Timoroan 500-resin bá servisu iha Korea, maibé iha tinan 2022 foin to’o fulan-maiu de’it haruka ona kuaze na’in-500.

“Maske ho pandemia COVID-19 Korea mós hasoru difikuldade maibé ha’u fiar katak iha tinan ne’e Timoroan 1.000-resin. Ha’u hakarak husu wainhira sama-ain iha Korea konsideradu hanesan ema Korea entaun tenke halo tuir regra, regulamentu ne’ebé iha,” Diplomata Koreanu hateten.

Dezde 2019 to’o agora, liuhosi kooperasaun Governu nasaun rua nian, haruka ona traballadór na’in 4.444 ba Korea, no tinan 2022 nian, hosi fulan-janeiru mai to’o iha maiu hamutuk 567, inklui sira na’in 87 sei aranka iha semana oin.

Notísia relevante : PM Taur konsidera traballadór nu’udar eroi foun iha faze dezenvolvimentu

Jornalista : Antónia Gusmão. 

Editór       : Agapito dos Santos

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here