Traballadór sira hala'o marsa la'o-ain hosi edifísiu KSTL mai Palasiu Governu hodi komemora loron mundiál traballadór iha loron 1 Maiu, domingu (01/05). Imajen Tatoli/Francisco Sony.

DILI, 01 maiu 2022 (TATOLI)– Loron 1 fulan-maiu tinan 2022, mundu tomak inklui Timor-Leste selebra loron internasionál Traballadór nian, ne’ebé komunidade Katólika mós selebra nu’udar loron Saun José Operáriu nian, ho objetivu atu rekoñese no valoriza kna’ar Traballadór sira-nian iha sosiedade.

“Traballadór sira nu’udar eroi foun sira iha faze dezenvolvimentu nasionál daudaun ne’e nian no liuhosi sira mak ita harii nasaun ida-ne’ebé forte, riku no seguru”, Primeiru-Ministru (PM), Taur Matan Ruak, hateten liuhosi nota imprensa ne’ebé Agência Tatoli simu, domingu ne’e.

Xefe Governu akresenta, loron Traballadór nian la’ós de’it feriadu ka loron deskansa nian ida, maibé sai nu’udar biban ida-ne’ebé di’ak tebes atu hahí empeñu, méritu, disiplina, profisionalizmu, serbisu iha ekipa, espíritu sakrifísiu nian no kumprimentu devér nian.

Nune’e mós horik nafatin iha traballadór sira, tantu nasionál nune’e mós estranjeiru sira, ne’ebé habelar iha setór oinoin hosi ita-nia ekonomia no administrasaun públika, ne’ebé kontribui maka’as ba produtividade no atu ita-nia País hakat ba oin iha ritmu ne’ebé di’ak.

“Traballadór sai nu’udar bensaun no rikusoin loloos ida hosi família, komunidade, empreza, instituisaun ka nasaun ida, justu duni atu selebra ezemplu di’ak liu sira kona-ba serbisu no exelénsia, hanesan fonte enkorajamentu no inspirasaun nian hodi hasoru dezafiu sira hosi dezenvolvimentu”, Xefe Governu ne’e subliña.

Eis Prezidente Repúblika ne’e afirma, ba Traballadór timoroan no estranjeiru hotu-hotu ne’ebé kontribui ho laran tomak ba Timor-Leste ida-ne’ebé modernu, dezenvolvidu no prósperu liután.

“Ha’u hakarak tebes, hodi ha’u nia nia naran rasik no Governu nia naran, hato’o ami-nia agradesimentu ne’ebé boot tebes”, Eis Xefe Estadu ne’e tenik.

Jornalista   : Antónia Gusmão.

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here