Membru Asosiasaun Defisiente Timor-Leste (ADTL), tuir konferensia imprensa kona-ba apresiasaun planu asaun nasionál defísiensia periodu 2021-2023. Iha salaun ADTL Maskarinas Dili, kuarta (13/10). Imajen Tatoli/Francisco Sony

DILI, 04 maiu 2022 (TATOLI)-Governu liuhosi reuniaun Konsellu-Ministru, kuarta ne’e, aprova ona projetu rezolusaun ba ratifikasaun adezaun kona-ba konvensaun internasional diretu ema ho defisiénsia.

“Projetu Proposta Rezolusaun rua ne’e ba Parlamentu Nasionál, kona-ba ratifikasaun ba adezaun Konvensaun kona-ba Direitu Ema ho Defisiénsia no ratifikasaun ba adezaun ba Protokolu Opsionál ba Konvensaun kona-ba Direitu Ema ho Defisiénsia,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu.

Notísia relevante : Governu Esforsu Hodi Aprezenta Proposta Lei Konvensaun Direitu Ema Ho Defisiénsia

Proposta rezolusaun ne’e aprezenta husi Ministra Negósiu Estranjeirus no Kooperasaun, Adaljiza Albertina Xavier Reis Magno.

Governante ne’e dehan, konvensaun ne’e hanesan instrumentu direitu internasionál ne’ebé ho objetivu hodi promove, proteze no garante katak ema ho defisiénsia bele hetan diretu umanu no liberdade fundamentál hothotu ho forma hanesan hodi promove respeitu ba ninia dignidade rasik.

“Espera katak ho aprovasaun ne’ebé Konsellu-Ministru halo no ratifikasaun hira ne’ebé sei tuir mai, konvensaun rua ne’e sei sai hanesan matadalan ba ita atu halo esforsu ne’ebé di’ak liután hodi bele dignifika no fó protesaun ba ema ho difisiénsia iha ita-nia rain, nune’e mós bele partisipa pro-ativu iha prosesu tomak dezenvolvimentu nian,” Portavoz Governu ne’e hateten.

Nia konsidera ho aprovasaun ne’e nu’udar pasu boot ida ne’ebé maka governu halo ona hodi adere ba konvensaun ne’e, nune’e espera katak órgaun sira hotu governu nian sei halo servisu maka’as hodi implementa kompromisu sira ne’ebé hatuur ona iha konvensaun ne’e rasik.

Entertantu, Konstituisaun RDTL artigu 21  garante ona diretu sidadaun ne’ebé moris ho defisiénsia ne’ebé hakerek iha númeru;

  1. Sidadaun ne’ebé iha defisiénsia fíziku eh mentál iha direitu no mós obrigasaun hanesan sidadaun sira seluk, maibé sira sei la hala’o knaar hirak ne’ebé sira labele hala’o tanba de’it sira-nia defisiénsia.
  2. Estadu, uainhira bele, promove protesaun ba sidadaun sira-ne’ebé iha defisiénsia, tuir lei haruka.

Nune’e mós Governu da-ualu hamosu ona  rezolusaun, númeru 14/2012,  iha 09 fulan-maiu kona-ba polítika nasionál ba inkluzaun no promosaun diretu  ema ho defisiénsia.

No Governu mós  simu ona rekomendasaun Parlamentu Nasionál (PN) tuir rezolusaun númeru 21/2019, 13  fulan-outubru, ne’ebé rekomenda atu adopta medida ba protesaun ema ho defisiénsia.

Tuir dadus sensu uma-kain 2015,  totál ema ho defisiénsia iha Timor-Leste na’in 38.118, defisiénsia matan 14.838, defisiénsia tilun 12.511, defisiénsia fíziku 7.416, defisiénsia intelektuál 3.313.

Dadus hosi Organizasaun Saúde Mundiál (WHO-sigla Inglés) relata purvolta porsentu 15 populasaun  iha mundu maka iha dizabilidade no estimasaun ONU nian katak 80% hosi ema hirak ne’e hela iha nasaun dezenvolvidu inklui Timor-Leste.

Notísia relevante : ADTL Husu Estadu TL Ratifika Konvensaun Ba Ema Ho Defisiénsia

Jornalista : Antónia Gusmão.

Editór     : Agapito dos Santos

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here