Diretór Servisu Edukasaun Munisípiu Viqueque, Emídio Amaral. Imajen Tatoli/Vitorino Lopes da Costa.

VIQUEQUE, 26 abril 2022 (TATOLI)–Diretór Servisu Edukasaun munisípiu Viqueque, Emídio Amaral, informa, iha ona alokasaun orsamentu ba realizasaun programa merenda eskolár iha munisípiu ne’e.

“Proposta kona-ba merenda eskolár nian ne’ebé ami hato’o ba Autoridade munisípiu Viqueque hetan ona aprovasaun, nune’e munisípiu aloka ona orsamentu hamutuk $91.000 ba implementasaun merenda eskolár iha eskola 18,” Diretór hateten ba Agência Tatoli, iha ninia knaar fatin, tersa ne’e.

Programa merenda eskolár ba alunu hotu iha Ensinu Báziku hanesan insentivu atu aumenta alunu nia prezensa iha eskola, hasa’e alunu nia asesu ba hahán nutritivu no fó estímulu ekonomia lokál.

Notísia relevante: Tinan ne’e, Governu prevee kuaze millaun $8 ba programa merenda eskolár

Programa ne’e ho eskala relativamente tuir padraun nasionál, ho objetivu prinsipál atu hasa’e asesu ba edukasaun liuhosi insentiva prezensa iha eskola no hamenus proporsaun ba abandonu eskolár.

Objetivu seluk mak hadi’a no hasa’e nutritivu ba estudante sira, fornese enerjia ba estudante sira hodi konsentra ba eskola, dezenvolve ekonomia lokál, no envolve komunidade hodi jere programa edukasionál sira hamutuk ho eskola sira.

Eskola ida-idak hetan ninia alokasaun orsamentu rasik, ne’ebé kada estudante iha kada loron eskolár efetivu hetan $0,25.

“Orsamentu aprova ona no ami sei implementa programa merenda eskolár iha semana oin,” nia hato’o

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here