Komisaun Nasionál Eleisaun (CNE,sigla portugés), kinta ne’e submete ona relatóriu husi rezultadu eleisaun prezidensiál segunda volta ba Tribunál Rekursu hodi halo validasaun.Imajen/Tatoli,Natalino da Costa.

DILI, 28 abríl 2022 (TATOLI)-Komisaun Nasionál Eleisaun (CNE,sigla portugés), kinta ne’e, submete ona  rezultadu eleisaun prezidensiál segunda volta ne’ebé hala’o iha loron 19 fulan-abríl 2022 ba Tribunál Rekursu hodi halo validasaun.

Prezidente CNE, José Agostinho da Costa Belo, akompañia husi Komisáriu na’in haat hodi entrega dokumentu ne’e ba iha ekipa Sekretariadu Tribunál Rekursu nian iha Caicoli Dili,  iha tuku 15:00 otl.

Notísia Relevante :CNE konklui apuramentu nasionál no deside votu 1.200 sai válidu

“Hafoin CNE halo tiha apuramentu nasionál durante loron tolu, ka oras  72  sei verifika akta sira ne’e hodi haree didiak, no ami iha tan oras 24 ba reprezenta kandidatu Prezidente Repúblika na’in atu halo reklamasaun karik iha, maibé laiha reklamasaun, maka ami ohin lori mai ona,” nia dehan ba jornalista sira.

Tuir lei Tribunál Rekursu sei halo validasaun ba akta eleisaun prezidensiál segunda volta ne’e durante oras 72 ka loron tolu depois maka fó sai ba públiku.

“Depois ida ne’e maka Tribunál sei proklama rezultadu  Prezidensiál segunda vota nian,” Prezidente CNE ne’e hateten.

Entertantu rezultadu apuramentu nasionál ne’ebé halo hosi CNE,  kandidatu prezidente repúblika, José Ramos Horta ho votu hamutuk 398.028 ekivale ba (62,1%), enkuantu kandidatu prezidente Repúblika Francisco Guterres Lú Olo ho votu 242. 239 ekivale ba (37,9 %).

Enkuantu, totál eleitór hamutuk 859.925, ema ne’ebé tuir vota hamutuk 646.389, votu validu 640.967 (99,16), votu branco 1.643 ( 0,25%), votu nulu 3.734 ( 0,58%) votu rejeitadu 28 (0,00%) no votu abandonadu iha 15.

Notísia Relevante :Ramos Horta agradese ba povu nia konfiansa

Jornalista: Natalin Costa

Editór      :Agapito dos Santos

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here