Votante sira forma tuir liña molok ezerse sira-nia deréitu votu iha elisaun prezidensiál segunda vola, iha sentru votasaun eskola No 5 Comoro, tersa (19/04). Imajen Tatoli/Francisco Sony.

DILI, 20 abríl 2022 (TATOLI)—PLaureadu Nobel da Páz, José Ramos Horta, agradese ba  povu Timor-Leste ne’ebé fó konfiansa ba nia iha eleisaun prezidensiál 2022 ne’ebé hetan votu barak liu kompara ho kandidatu Prezidente Repúblika ho numéru sorteiu rua (2), Francisco Guterres Lú Olo, iha eleisaun segunda volta ne’e.

Notísia Relevante: Manán iha Elpres, Ramos Horta fó prioridade restaura ordem konstitusional estadu

“Ho rezultadu provizóriu hosi STAE mezmu seidauk ofisiál hosi Tribunál Rekursu ne’e, ha’u la uza liafuan vitória maibé kontente tebes mandatu mai hosi povu no todan insentivu atu servisu di’ak liután,” Kandidatu Prezidente Repúblika períodu 2022-2027 ho númeru sorteiu ida (1), José Ramos Horta, hateten liu hosi konferénsia imprensa ba jornalista iha sede kandidatu Hudi Laran, kuarta ne’e.

Kandidadu hosi partidu CNRT ne’e, kongratula povu tomak nia partisipasaun iha prosesu demokrátiku ne’e no agradese ba ekipa susesu hahú hosi baze to’o nasionál ne’ebé servisu makaas ba apoiu nia kandidatura.

Agradese mós ba órgaun eleitorál STAE no CNE ne’ebé organiza prosesu eleisaun lao di’ak, ho Polisía Nasionál Timor-Leste (PNTL), FALINTIL Forsa Defeza Timor-Leste (F-FDTL) hala’o servisu di’ak hodi garante pás no estabilidade seguransa durante prosesu eleitorál jeralmente la’o di’ak.

Ramos Horta kompromete hodi kumpre kompromisu ne’ebé iha restaura orden konstituisionál, hadi’a demokrásia, buka Governu ida konsensuál bele responde krize umanitária, sosiál, ekonómiku iha nasaun ne’e

Prezidente Repúblika eleitu mós sei ko’alia ho partidu sira iha asentu Parlamentár no sira-ne’ebé laiha asentu, igreja, akadémiku ho parte seluk hodi hala’o diálogu hetan vizaun komun estratéjiku uniku tinan lima mai, oinsá situasaun hakmatek no hakle’an pás ho hadi’a ekonomia urjente tanba krize ekonómiku mundiál impaktu boot iha rai barak.

Entertantu, rezultadu provizóriu iha kuarta ne’e (20/04) to’o iha tuku 13h53 ne’e hosi Sekretáriadu Tékniku Administrasaun Eleitorál (STAE) hatudu katak kandidatu númeru sorteiu ida (1), José Ramos Horta, ho totál votante 338,081 (61%) no kandidatu PR númeru sorteiu rua (2), Francisco Guterres Lú Olo, hetan votu 215,698 (39%), ho totál akta 1200, dizita ka kontajen ona 1098 no seidauk 120.

Totál eleitór iha nivél nasionál no diáspora hamutuk 859,925, no hosi númeru ne’e eleitór ne’ebé partisipa eleisaun 559,814 (65,10%) ne’ebé kompostu hosi mane 289,758 (51,76%) no feto 270,056 (48,24%).

Notísia Relevante: Provizoriamente, Ramos Horta nafatin lidera númeru votu

Jornalista : Nelson de Sousa

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here