DILI, 27 abril 2022 (TATOLI)—Xefe suku Hera, postu administrative Metinaro, munisípiu Dili, Antoninho da Silva, husu Governu aselera fó apoiu ba vítima inundasaun 04 abril iha Hera tanba vítima sira presiza apoia.
Notísia Relevante: Governu re-aloka ona vítima inundasaun 21 ba munisípiu orijinál
Nia husu Governu liu-liu Ministériu Solidariedade Sosiál no Inkluzaun (MSSI), Sekretáriu Estadu Protesaun Sívil no Autoridade Munisípiu Dili atu tau atensaun ba vítima dezatre naturál no inundasaun ne’ebé akontese liu tiha ona ne’e.
“Durante 04 abril akontese dezastre naturál ka inundasaun ne’e, vítima sira lakon buat barak no agora daudaun sira mai hela iha NGO Haburas no Eskola fatin. Purtantu, ba sira atu buka moris mós susar, tanba ne’e ita husu ba Governu karik bele aselera lalais ajuda buat ruma, atu nune’e sira bele sai hosi fatin ne’e atu sira bele buka moris ho di’ak,” Antoninho da Silva hateten ba Agência Tatoli, via telefónika, kuarta ne’e.
Vítima 04 abril ne’ebé hela iha Hera ne’e, to’o agora labele fila-fali ba sira-nia hela fatin tanba fatin ne’ebé uluk sira hela ba ne’e fatin risku ba dezastre naturál no vítima balun nia hela fatin mota sobu totál.
“Ita-nia Governu mós hateten katak atu harii uma ba sira, maibé to’o agora ita seidauk rona,” nia dehan,
Vítima 04 abril iha Hera ne’ebé agora hela iha sentru evakuasaun iha fatin rua, hanesan iha sentru evakuasaun Haburas iha uma-kain 26 no iha eskola Bázika Hera iha uma-kain sia (9).
“Agora daudaun, ita-nia vítima sira hein hela bee-moos no hahan, tanba ne’e sira sujere ba ami atu informa ba Postu Administrativu atu haree asuntu ne’e,” nia dehan.
Ho preukupasaun ne’e, Xefe Suku Hera informa ona ba administradór Cristo Rei maibé to’o agora seidauk iha rezultadu.
“Ita diretamente kuandu sira hato’o sira-nia preokupasaun, ita hato’o ba postu administrativu, maibé to’o agora seidauk iha informasaun,” nia hateten.
Entaun, nia dehan, ho problema bee-moos ne’e, vítima sira buka meiu ba kuru fali bee-moos iha komunidade sira-nia hela fatin, hodi utiliza ba nesesidade loro-loron maibé ba hahan ne’e to’o fulan ida mak Governu fó dala ida.
Administradór Cristo Rei, munisípiu Dili, Venancio Tavares, hateten nia parte simu ona informasaun kona-ba preukupasaun vítima inundasaun 04 abril Hera, nune’e nia parte informa ona ba Autoridade Munisípiu Dili atu haree asuntu ne’e.
“Informasaun sira-ne’e ha’u informa ona ba munisípiu Dili, maibé tanba ligasaun ho preparasaun eleisaun Prezidente Repúblika tanba ne’e seidauk resolve. Maibé hau sei esforsu atu rezolve preukupasaun ne’e,” nia dehan.
Prezidente Autoridade Munisípiu (PAM) Dili, Guilhermina Filomena Saldanha Ribeiro “MARGI”, esplika, asuntu emerjénsia iha ninia faze, iha loron dahuluk mak protesaun sívil mak fó apoia.
Maibé, liu ida ne’e sira atu ambienta ho sira-nia situasaun, entaun Sosiál liuhosi Autoridade Munisípiu Dili fó apoia tuir saida mak iha, maibé kuandu liu ona fulan tolu normálmente labele bolu ona situasaun emerjénsia, entaun hakarak ka lakohi ba subsisténsia sira idak-idak mak buka.
“Se iha problema ruma, sira hato’o mai ami saida mak ami bele halo liuhosi asisténsia sosiál. Maibé, dehan fulan-fulan ami tenke fó asisténsia sosiál, ha’u hanoin ita iha mós komunidade balun ne’ebé mak kbiit la’ek sira mós presiza. Entaun, ita bele dehan la justu maibé se iha situasaun balun presiza tebes hato’o pedidu mai, saida mak ami haree no saida mak ami bele fó, maibé atu fó fulan-fulan ha’u hanoin ida-ne’e ami labele fó,” nia esplika.
Jornalista : Nelia Fernandes
Editór : Cancio Ximenes
