Governu hahú prepara karreta atu re-aloka vítima inundasaun iha Manleuana ba alojamentu provizóriu ka Kost. Imajen TATOLI/ Antonia Gusmão.

DILI, 13 dezembru 2021 (TATOLI)—Tékniku Servisu Jestaun Risku Dezastre iha Sekretária Estadu Protesaun Sívil (SEPS), Alcino Gomes, informa hosi sentru evakuasaun neen (6) iha Dili Governu re-aloka ona vítima inundasaun hamutuk 21 ba sira-nia munisípiu orijinál.

Notísia Relevante: Governu planu re-aloka vítima inundasaun iha Hera ba alojamentu provizóriu

“Iha Díli laran sentru evakuasaun iha neen ne’e, ho totál xefe familia hamutuk 130. Hosi númeru ne’e, iha xefe família 58 mak deside atu fila ba sira-nia munisípiu orijinál no na’in-72 mak sei iha prosesu nia laran. Agora daudaun Governu rezolve hela sira ne’ebé deside fila ba sira-nia munisípiu orijinál, no iha xefe familia 21 mak fila ona ba sira-nia munisípiu orijinál,” Alcino Gomes hateten ba Agênsia Tatoli, iha edifísiu Autoridade Munisípiu Dili, segunda ne’e.

Hosi xefe família 58 ne’e, iha xefe familia 21 mak fila ona ba munisípiu orijinál no restu ne’e sei prosesa hela transporte atu transporta sira ba sira-nia munisípiu.

“Hanesan Oé-Cusse, iha xefe família hamutuk 10 mak sei iha difikuldade hela kona-ba transporte tanba ita-nia ró to’o ona mai no agora ita hein de’it. Bainhira mak sira hahú operasaun,  atu nune’e ró ne’e bele lori sira ba sira-nia munisípiu,” nia dehan.

Kona-ba xefe família 72 ne’ebé mak sei iha prosesu nia laran ne’e, iha ema na’in-10 sai tiha ona no daudaun ne’e falta xefe família 62.

“Iha sentru evakuasaun Don Bosco, iha de’it xefe família 35 no rezolvidu ona. Hosi xefe familia 35 ne’e, iha xefe família 25 mak hakarak fila ba munisípiu orijinál no 10 deside hakarak hela iha Dili laran,” nia informa.

Nia hateten tuir lei no matadalan, Sekretária Estadu Protesaun Sívil nafatin fó apoia emerjénsia hodi fó apoiu foos, supermie, mina, bee no sasán halimar labarik sira nian (family kids) bainhira akontese dezastre naturál. 

“Apoiu ida-ne’e, ita bolu food (hahan) ho non food (la’ós hahan), maibé ita fó fali ba pakote rekuperasaun ita fó apoiu materiál konstrusaun hanesan zinku (kalen), besi, osan mão de obra no osan transporte nian,” nia informa.

Kona-ba osan, SEPS iha pakote rua ne’ebé fahe ba mão de obra $850 no ba transporte iha $150 kada xefe família.

“Nune’e mós ekipamentu konstrusaun hanesan simentu ne’e kada xefe família simu saka 25, zinku (kalen) tahan 50, besi lolon 22, inklui arame no pregu,” nia dehan.

Entretantu, xefe família 21 ne’ebé fila ona ba sira-nia munisípiu orijinál mak kompostu hosi sentru evakuasaun Don Bosco iha na’in-11, Real Madrid ka sentru evakuasaun Manleuana iha xefe familia na’in-hitu (7) mak fila ona no sentru evakuasaun Hera ne’e hamutuk ema na’in-tolu (3).

Notísia Relevante: Governu deside re-aloka vítima inundasaun iha Manleuana ba alojamentu provizóriu

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here