Prezidente Repúblika, Francisco Guterres Lú Olo, hala'o enkontru ho Prezidente eleitu Jose Ramos Horta, iha Palásiu Prezidente Nicolau Lobato, Bairru Pite, kuarta (27/04). Imajen Tatoli /Egas Cristóvão.

DILI, 27 abríl 2022 (TATOLI)-Prezidente Repúblika eleitu ba periódu 2022-2027, José Ramos Horta, husu ba Prezidsente Repúblika, Francisco Guterres Lú Olo atu promove no halo diálogu ho líder nasionál sira atu hakle’an demokrasia iha Timor-Leste.

Notisia Relevante: Horta sei konvida eis Prezidente Amérika-Portugal partisipa serimónia toma pose

“Ha’u mós husu Prezidente Repúblika, Francisco Guterres Lú Olo, nia apoiu ita buka halo diálogu ho lidér nasionál sira, partidu sira iha Parlamentu Nasionál no líder sira seluk iha li’ur, oinsá ita hakle’an demokrásia no hametin dame,” Prezidente Eleitu ne’e hateten ba jornalista sira hafoin ramata enkontru ho atuál Xefe Estadu, Francisco Guterres Lú Olo, iha Palásiu Prezidensiál Nicolau Lobato, Bairu Pite, Dili, kuarta ne’e.

Bainhira simu ona pose hodi hala’o knar hanesan Prezidente Repúblika, Ramos Horta hato’o nia admirasaun no respeitu Prezidente Lú Olo atu ba oin sei konsulta ho PR sesante atu rona no diskute kestaun nasionál no internasionál.

Laureadu Prémiu Nobel ba Pás ne’e hateten, kestaun atuál haree oinsa dezenvolve fila-fali ekonómia lao ba oin ne’e importante tebes mezmu la’ós knaar PR nian maibé bainhira haree krize ekonomiku ruma, krize sosiál no umanitária.

“Prezidente iha autoridade mobiliza Governu, Parlamentu, komunidade internasionál hodi ita fó resposta,” nia dehan.

Ba kestaun ne’e, Ramos Horta mós halo ona kontaktu ho lidér nasionál Kay Rala Xanana Gusmão no sei halo kontaktu ho lidér seluk hodi halo diálogu.

Enkuantu tuir rezultadu eleisaun prezidensiál segunda volta kandidatu Prezidente Repúblika, José Ramos Horta hetan votu 398.028 (62,1%) no Francisco Guterres Lú Olo hetan votu 242.939 (37,9%).

Nune’e Prezidente repúblika eleitu simu pose mak atuál Xefe Estadu Francisco Guterres Lú Olo sei termina mós nia mandatu iha 20 maiu 2022.

Antes ne’e, Ministru Administrasaun Estatál (MAE), Miguel Ferreira Carvalo, hateten Governu liu hosi MAE no entidade relevante sira seluk nu’udar komisaun organizadora ba eventu rua hanesan serimónia pose PR eleitu no komemorasaun loron restaurasaun indepedensia 20 maiu tinan ne’e, daudaun ne’e la’o hela no garante preparadu hodi realiza serimónia ofisiál Estadu nian ne’e.

Atu realiza serimónia toma pose ne’e hetan susesu, Governu Timor-Leste aloka orsamentu millaun $1,6 ba realizasaun atividade simu pose no selebrasaun loron restaurasaun independénsia ba dala-XX (20 maiu 2022-20 maiu 2022) ne’e.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here