Estudante Edukasaun Pre-Eskolár Raifun, postu administrativu Maliana, munisípiu Bobonaro, halo animasaun dansa hodi demostra kreatividade ba Ministru Edukasaun, Juventude no Desportu, Armindo Maia no komitiva. Imajen Tatoli/Sergio da Cruz

DILI, 26 abril 2022 (TATOLI)–Governu Nova Zelándia liuhosi ninia Embaixada iha Timor-Leste, tersa ne’e, lansa distribuisaun materiál eskolár ba estudante 28.857 iha Edukasaun Pre-Eskolár hamutuk 540 ne’ebé estabelese iha territóriu nasionál.

Inisiativa ne’e atu reforsa programa hosi Ministériu Edukasaun Juventude no Desportu (MEJD) hanaran HANDS (Halimar, Apreende no Deskobre Susesu).

“Seremónia lansamentu ne’e hanesan eventu importante atu hahú prosesu distribuisaun materiál aprendizajen ba edukasaun Pre-Eskolár hamutuk 540, ne’ebé kompostu hosi Edukasaun Pre-Eskolár komunitária 103 no públiku hamutuk 437,” Primeiru Sekretáriu Embaixada Nova Zelándia, Nick Borthawick, informa durante seremónia, iha edifísiu MEJD, Vila Verde.

Notísia relevante: MEJD reforsa programa HANDS II ho autoridade lokál sira

Aleinde ne’e, liuhosi fundu apoiu Governu Nova Zelándia, aloka mós orsamentu hamutuk $239.500 ba implementasaun projetu HANDS daruak ba tinan-lima.

“Orsamentu ne’e sei utiliza ba aprovizionamentu materiál aprendizajen, pakotamentu, distribuisaun no treinamentu ba profesór sira kona-ba utilizasaun no rai materiál hirak ne’e ho di’ak,” Reprezentante Embaixada ne’e akresenta.

Programa HANDS mai hosi Governu Timor-Leste, ne’ebé forma hosi MEJD no hetan apoiu hosi Governu Nova Zelándia, ho objetivu atu hadi’a asesu kualidade no jestaun Pre-Eskolár iha Timor-Leste.

Programa ne’e hahú implementasaun dahuluk iha tinan 2015 to’o 2020 no hetan fiar hosi Governu Nova Zelándia, nune’e kontinua estende tempu ba tinan-lima, hahú hosi tinan 2021 to’o 2025.

Konseitu programa HANDS atu prepara labarik sira hakat ba edukasaun Ensinu Báziku, tanba hosi relatóriu Banku Mundiál nian katak labarik sira hafoin ramata Edukasaun Pre-Eskolár no tama ba Ensinu Báziku, iha abilidade lee di’ak liu, nune’e implementasaun programa ne’e atu mellora liután progresu labarik sira.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here