Ministru Edukasaun, Juventude no Desportu, Armindo Maia, ho Embaixadór Nova Zelándia iha Timor-Leste, Philip Hewitt, estabelese akordu kooperasaun kona-ba HANDS II, kinta (08/07). Imajen Tatoli/Egas Cristovão

DILI, 08 jullu 2021 (TATOLI) – Ministériu Edukasaun, Juventude no Desportu (MEJD) hatuur planu implementasaun programa HANDS II bá tinan lima hamutuk ho autoridade lokál sira iha munisípiu hodi haforsa liután edukasaun pre-eskolár.

Notísia Relevante : MEJD-Nova Zelándia kontinua programa HANDS II iha edukasaun pre-eskolár

Asesór Seniór Ligasaun MEJD, Pedro Ximenes, esplika katak programa HANDS II ne’e iha ona orientasaun atu loke tan espasu tanba sistema governativa nian sempre fó kompeténsia mós bá autoridade lokál sira atu ejerse sira-nia funsaun.

“Iha HANDS II ne’e aspetu importante liu mak ita sei servisu hamutuk ho autoridade lokál sira iha munisípiu atu bele haforsa no haboot liután edukasaun pre-eskolár iha munisípiu sira,” Pedro Ximenes informa bá jornalista sira iha Ministériu Edukasaun Vila Verde, kinta ne’e.

Magnífiku Reitór Institute of Business (IOB) ne’e afirma nu’udar ema ne’ebé involve an iha programa HANDS I no II konsidera estudante edukasaun pre-eskolár ninia abilidade lahanesan ho estudante ensinu báziku ka ensinu sekundária sira.

Programa HANDS ne’e atu prepara labarik sira hodi hakat bá edukasaun ensinu báziku. Maibé iha evidénsia balun hatudu hosi relatóriu Banku Mundiál nian katak labarik-sira depois remata edukasaun pre-eskolár tama bá ensinu báziku iha abilidade lee di’ak liu. Nune’e, kontinuasaun HANDS ne’e atu mellora liután progresu labarik sira nia.

Embaixadór Nova Zelándia mai Timor-Leste, Philip Hawitt afirma Governu Nova Zelándia nu’udar parseiru MEJD nian, sempre apoiu programa ne’e dezde 2015 to’o agora. Orsamentu bá Programa HANDS I&II ne’e montante hanesan. Kada tinan Nova Zelándia sempre apoiu fundus ho montante $10,000.

Dadus hosi implementasaun programa HNADS I ne’ebé Ministériu Edukasaun rekolla durante tinan lima depois implementa programa ne’e iha 2015-2020 maka hosi 2002 edukasaun pre-esklár iha territóriu nasionál hamutuk 57, iha 2010 sa’e bá 142 depois 2013 aumenta bá 236 no 2016 kontinua aumenta bá 307.

Dadus ida ne’e mak korresponde bá númeru rejista nu’udar eskola akreditadu to’o 2020 ho totál edukasaun pre-eskolár purvolta 558 ne’ebé kompostu hosi edukasaun pre-eskolár públiku, katóliku no privadu iha 428 no Edukasaun pre-eskolár komunidade suporta hosi UNICEF no ONG hamutuk 132.

Jornalista : Tomé Amado

Editór        : Francisco Simões

HAKEREK NO HATÁN

Please enter your comment!
Please enter your name here