Ministru Ensinu Superiór Siénsia no Kultura, Longuinhos dos Santos. Imajen Tatoli/Francisco Sony

DILI, 26 abril 2022 (TATOLI)–Ministériu Ensinu Superior Siénsia no Kultura (MESSK) seidauk simu proposta hosi Instituto Nasional de Formação de Docentes e Profissionais da Educação de Timor-Leste (INFORDEPE) kona-ba graduasaun profesór sira ho nível baxarelatu.

“To’o agora ha’u seidauk simu karta hosi INFORDEPE kona-ba planu atu realiza seremónia graduasaun ba profesór baxarelatu na’in-2.000 resin ne’ebé akaba ona estudu iha Universidade Nasionál Timor-Lorosa’e (UNTL),” Ministru Ensinu Superior Siénsia no Kultura, Longuinhos dos Santos, hateten ba Agência Tatoli, iha resintu Ministériu Finansa, Aitarak-laran, tersa ne’e.

Notísia relevante: UNTL-INFORDEPE realiza judisium ba profesór baxarelatu 1.500 iha munisípiu hitu

Ministru dehan, bainhira INFORDEPE haruka ona karta mak sei prosesa hodi hatún mós despaixu.

“Normalmente bainhira karta saida de’it mak tama iha ha’u nia meza nunka atraza, maibé ha’u sei konfirma ba proposta ne’e, karik iha ona ita bele prosesa hodi hatún despaixu,” nia akresenta.

Maibé, bainhira iha prosesu sira ne’e hotu maka mosu irregularidade ruma, maka tuir lei tenke prosesa fulan-ida hodi halo verifikasaun ba dokumentu sira kona-ba graduasaun nian.

Iha fatin ketak, Prezidente INFORDEPE, Manuel Gomes, hateten, parte institutu manda ona proposta ba MESSK no hein despaxu hosi Ministru.

“Ami-nia graduasaun ne’e to’o agora la realiza hela de’it tanba Ministériu Ensinu Superior Siénsia no Kultura seidauk hatún despaxu atu fó lisensa graduasaun nian, ami hein hela to’o agora,” nia tenik.

Antes ne’e, iha loron iha dezembru 2021, INFORDEPE realiza ona seremónia judisium ba profesór ho grau akadémiku baxarelatu na’in-2.000 resin iha munisípiu hitu.

Profesór ho nível Ensinu Báziku iha na’in-2.595 maka durante ne’e hetan oportunidade hodi kontinua estudu iha UNTL atu hasa’e grau akadémiku.

Planu graduasaun ba profesór baxarelatu sira sei akontese iha janeiru 2022, maibé data graduasaun seidauk iha tanba munisípiu neen seidauk realiza seremónia judisium.

Jornalista : Tomé Amado        

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here