INFORDEPE. Imajen/Espesiál

DILI, 29 dezembru 2021 (TATOLI)—Universidade Nasionál Timor-Lorosa’e (UNTL) realiza ona seremónia judisium ba profesór ho grau akadémiku baxarelatu na’in-1.500 iha munisípiu hitu, ne’ebé durante ne’e hala’o estudu iha Instituto Nacional de Formação de Docentes e Profissionais da Educação de Timor-Leste (INFORDEPE).

Prezidente INFORDEPE, Manuel Gomes, relata, profesór ho nível ensinu báziku iha na’in-2.595 maka durante ne’e hetan oportunidade hodi kontinua estuda iha UNTL atu hasa’e grau akadémiku.

“Ita-nia manorin sira finaliza ona estudu no estájiu profisionál iha munisípiu sira.  Agora sira na’in-1.500 mak simu uluk ona judisium no semana rua tan, iha janeiru tinan oin mak na’in-1.095 simu tan judisium hodi hakat ba graduasaun ho grau akadémiku baxarelatu,” Prezidente INFORDEPE informa ba Agência TATOLI, via telefónika, kuarta ne’e.

Munisípiu hitu ne’ebé realiza ona judisium ba profesór sira mak hanesan Baucau, Viqueque, Ainaro, Manufahi, Aileu, Liquiçá no Manatuto.

Notísia relevante: Graduasaun ba profesór baxarelatu hosi INFORDEPE iha faze diskusaun

Daudaun ne’e parte UNTL no INFORDEPE diskute hela atributu ba estudante sira.

“Hein katak tempu besik sira bele hetan solusaun ruma hodi garante graduasaun ba profesór baxarelatu sira. Ita seidauk hetan desizaun ida maibé ita tama ona iha diskusaun sériu atu hetan solusaun ida. Klaru katak atributu sira UNTL mak sei prepara, maibé tenke iha konkordánsia entre parte rua,” nia akresenta.

Planu graduasaun ba profesór baxarelatu sira sei akontese iha janeiru 2022, maibé data graduasaun seidauk iha tanba munisípiu neen seidauk realiza seremónia judisium.

Jornalista : Tomé Amado

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here