iklan

NASIONÁL, EKONOMIA

Tinan ne’e, Governu prevee kuaze millaun $8 ba programa merenda eskolár

Tinan ne’e, Governu prevee kuaze millaun $8 ba programa merenda eskolár

Ministru Administrasaun Estatál, Miguel Pereira de Carvalho. Imajen TATOLI/Francisco Sony.

DILI, 09 fevereiru 2022 (TATOLI)—Governu liuhosi Ministériu Administrasaun Estatál (MAE), iha tinan ne’e prevee orsamentu pruvolta millaun $8 ba programa merenda eskolár.

“Ba tinan ne’e, ita prevee orsamentu ba programa merenda eskolár provulta millaun $8,” Ministru Administrasaun Estatal (MAE), Miguel Pereira de Carvalho, informa ba jornalista sira, iha Palásiu Governu, Díli, kuarta ne’e.

Tuir Governante ne’e, programa merenda eskolár ba tinan ida-ne’e infelizmente Orsamentu Jerál Estadu (OJE) la to’o atu finansia programa merenda eskolár ba loron 191, maibé natoon de’it atu finansia ba loron 100-resin iha eskola hotu-hotu.

“Ne’ebé, ohin loron Administradór Munisípiu sira prosesa ona transférensia orsamentu merenda eskolár ba eskola hotu-hotu iha Timor-Leste. Nune’e, ami mós hadi’a ona nia ezekusaun atu orsamentu ba merenda eskolár ne’e sai hanesan subvensaun públika ida ba eskola sira hotu-hotu, bainhira Administradór sira transfere ba. Purtantu osan ne’e sei utiliza iha eskola sira, hafoin relatóriu sira hela iha eskola sira ba futuru editória,” nia dehan.

Nune’e, ezekusaun programa merenda eskolár tinan ne’e sei la’o di’ak, tanba iha loron 100 resin ba programa merenda eskolar mak MAE aloka ba eskola hotu-hotu iha Timor-Leste, maibé nia ideál ne’e iha loron 191.

Programa merenda eskolár deskonsentra ona ba munisípiu sira

Antes ne’e implementasaun programa merenda eskolár iha tinan 2021 ezekuta ho di’ak ba estudante 320.000, tanba ne’e Governu sentrál deside deskonsentra programa ne’e ba munisípiu sira, atu kada munisípiu mak sei jere orsamentu ba programa ne’e, ne’ebé antes ne’e programa ne’e diretamente jere hosi Ministériu Edukasaun Juventude no Desportu (MEJD) sentrál.

“Kolaborasaun ministériu rua ba programa merenda eskolár efetivu hela, tanba ne’e MEJD halo ona deskonsentrasaun programa ne’e ba munisípiu 12 no MAE aloka ona orsamentu $15.000 ba munisípiu sira-ne’e,” Ministru Administrasaun Estatál, Miguel Pereira de Carvalho, informa iha iha Parlamentu Nasionál (PN), iha sesta (03 dezembru 2021).

Ministru Miguel ko’alia asuntu ne’e tanba Deputadu hosi Komisaun G ne’ebé trata asuntu Edukasaun, Kultura, Juventude, Desportu no Sidadania, husu ministériu rua koordena ho di’ak no tau atensaun maka’as ba programa edukasaun ne’e, nune’e bele garante alunu sira iha tinan ne’e bele hetan atendimentu merenda eskolár ho lalais.

Orsamentu ba merenda eskolár bazea ba númeru estudante ne’ebé iha, ne’e duni prevee millaun $7-resin ba estudante 281.418 hosi pre-eskolár no ensinu báziku.

Loloos orsamentu ne’e tenke mantein millaun $15 hodi responde ba loron 191 merenda eskolár, maibé tanba limitasaun orsamentu, entaun munisípiu sira hamenus orsamentu merenda eskolár.

Maske eskola balun iha Covalima, Lautém no Dili, iha tinan ne’e la hetan merenda eskolár, maibé eskola seluk kontinua programa ne’e ho di’ak

“Iha Dili tanba implementasaun konfinamentu obrigatóriu, entaun sira-nia ezekusaun orsamentu kiik hela, maibé iha munisípiu sira seluk di’ak. Tanba ne’e, Parlamentu Nasionál sujere tinan 2022 implementasaun programa merenda eskolár ba estudante ensinu báziku sira iha territóriu nasionál tenke efetivu, ne’e duni ministériu rua tenke iha liña koordenasaun di’ak,” nia dehan.

Jornalista : Nelia Fernandes

Editór       : Cancio Ximenes

iklan
iklan

Leave a Reply

iklan
error: Content is protected !!