Governu simu ona karta hosi PR eleitu atu konvida líder mundiál balun
DILI, 25 abríl 2022 (TATOLI)—Ministru Administrasaun Estatál (MAE), Miguel Pereira Carvalho, hateten Governu koordena ona ho ekipa susesu Prezidente eleitu atu servisu hamutuk ho ekipa tranzisaun tanba antes ne’e PR eleitu fó sai ona sei konvida bainaka espesiál no líder mundiál balun atu partisipa iha serimónia toma pose ne’e.
Notísia Relevante: Governu aloka millaun $1,6 ba serimónia toma pose PR eleitu
“Governu liuhosi komisaun organizadora simu ona karta ida hosi ekipa susesu Prezidente eleitu, pedidu rua ne’ebé importante mak primeiru husu komisaun atu servisu hamutuk ekipa tranzisaun. Segundu membru bainaka sira-ne’ebé mak Prezidente eleitu temi, atu bele inkorpora iha komisaun organizadora bele halo nomeasaun ne’ebé integra, nune’e ami diskute hela preparativu tanba sei konvida bainaka espesiál no líder mundiál balun,” Miguel Pereira Carvalho hateten ba jornalista sira hafoin ramata enkontru ho Prezidente Repúblika, Francisco Guterres ‘Lú OLo, iha Palásiu Prezidensiál Nicolau Lobato, Bairru Pite, segunda ne’e.
Nia hateten, Xefe Estadu, Xefe Governu no Prezidente Parlamentu Nasionál Timor-Leste mak sei konvida nia ómologu sira iha mundu.
Aleinde ne’e, Governante ne’e informa, serimónia toma pose ba Prezidente eleitu periódu 2022-2027 no isár bandeira ne’e Governu prevee ona orsamentu millaun $1,6.
“Ba serimónia toma pose ba Prezidente Repúblika eleitu tinan ida-ne’e, Governu planea ona orsamentu hamutuk millaun $1,6 no montante ida ne’ebé ki’ikliu kompara ho toma pose iha tinan 2012 no 2017. Hanesan ita hatene momentu ne’eba ita-nia Estadu gasta millaun $6,” nia dehan.
Biban ne’e, Ministru MAE akompaña hosi Ministra Negósiu Estranjeiru no Kooperasaun (MNEK), Adaljiza Magno, relata ba Xefe Estadu atuál kona-ba preparasaun komisaun organizadora ba serimónia toma pose PR eleitu no komemorasaun loron restaurasaun indepedensia 20 maiu 2022.
“Ami hanesan komisaun organizadora ba eventu rua mai ko’alia ho Prezidente Repúblika kona-ba komisaun planea no organiza daudaun atu realiza serimónia toma pose ba Prezidente Repúblika eleitu iha 19 maiu kalan fahe rua ne’ebé sei realiza iha Tasi-Tolu. Depois iha 20 maiu sei realiza serimónia isár bandeira iha Palásiu Prezidente,” nia hateten
Komisaun organizadora ko’alia preparativu inklui nesesidade atu koordena ho ekipa tranzisaun PR eleitu, ne’ebé haruka tiha ona karta ba PR atuál no komisaun atu bele integra hodi halo preparasaun ba eventu rua refere.
Ba preparasaun toma pose iha Tasi-Tolu la’o fulan ida ona no antes konklui kampaña eleitorál ba eleisaun prezidensiál segunda volta ne’ebé harii ona tenda ho preparativu sira seluk.
“Preparasaun agora bele atinje ona 30% no sei garante konklui antes tama ba loron serimónia toma pose ba PR eleitu,” nia hateten.
Durante sorumutu ho PR atuál, komisaun organizadora mós ko’alia kona-ba baniaka sira hosi rai-li’ur.
“Ami mós ko’alia kona-ba konvidadu sira atu tuir selebrasaun toma pose no informasaun detallu sei informa ba ita bo’ot sira iha tempu tuir mai. Tan ne’e, fiar katak iha semana ne’e nia laran konvite sei fó sai ona,” nia dehan.
Enkuantu komemorasaun 20 maiu ne’e, komisaun organizadora aloka orsamentu rihun $400 hodi realiza serimónia isár bandeira iha Dili no munisípiu sira iha Timor-Leste.
Jornalista : Nelson de Sousa
Editór : Cancio Ximenes
