DILI, 23 abríl 2022 (TATOLI)–Governu liuhosi Ministériu Administrasaun Estatál (MAE) hala’o ona preparasaun ba serimónia tomada pose ba Prezidente repúblika eleitu, José Ramos Horta, hodi prepara fatin iha Tasi-Tolu ne’ebé hahú hala’o iha loron ikus kampaña eleitorál ba eleisaun segunda volta foin lalais ne’e.
Notísia Relevante: PNTL-MAE hala’o preparasaun seguransa ba serimónia toma pose PR foun
Vise-Ministru Administrasaun Estatál (MAE), Lino de Jesus Torrezão, informa ba serimónia toma pose ne’e Governu aloka orsamentu millaun $1,6 hodi fasilita atividade isar bandeira ne’ebé sei realiza iha 20 maiu 2022.
“Ba tomada pose ida-ne’e ami tau osan milla $1,6 no ba isar bandeira iha komemorasaun loron restaurasaun independénsia, 20 maiu 2022 nian ne’e, ho osan hamutuk $400,000,” Lino de Jesu Torrezão, hateten ba Agência TATOLI, iha nia knar fatin, Colmera, Dili, sesta ne’e.
Ho orsamentu hirak ne’e, daudaun ne’e, komisaun organizadora halo ona preparasaun ba serimómia toma pose ba Prezidente Repúblika eleitu iha Tasi-Tolu hodi hahú ho prosesu dada lona no tuir planu sei harii tenda boot lima hotu bele fó mahon ba bainaka Verry Important Person (VIP) sira hosi rai-li’ur.
“Kona-ba serimónia pose nian, ami prepara loron 20 maiu 2022 nian mak iha 16-17 maiu ne’e ekipa isar bandeira sei ensaiu no depois loron 18 maiu ne’e, sei iha misa agradesimentu iha Igreja Katedral Dili,” nia informa.
Programa
Iha loron 19 maiu 2022, hahú tuku 18h00-19h00 konsertu múzika iha Tasi-Tolu, tuku 19h00-20h00 konvidadu sira to’o iha fatin, tuku 20h00-21h00 divertimentu Colosál (live palku muzikál), tuku 21h00-21h20 titulares hosi órgaun soberania Estadu nian no entidade altu sira (espesiál), iha oras 21h20-21h25 Prezidente Repúblika eleitu sei to’o iha fatin refere.
Hafoin, iha tuku 21h25-21h30 Prezidente Repúblika, Francisco Guterres “Lú Olo” sei to’o, iha tuku 21h30-23h00 inisíu ba sesaun prelimináriu solene hosi Parlamentu Nasionál (Segundo guia do PN) atu fó pose ba Prezidente Repúblika períodu 2022-2027 no iha tuku 23h00-02h00 sei halo konsertu muzikál.
Iha loron 20 maiu, 08h00-12h00 hahú hala’o isar bandeira iha Palásiu Prezidente Nicolau Lobato, Bairru Pite, Dili, no iha parte lorokraik iha tuku 17h00-17h30 sei iha atividade hatun bandeira RDTL.
Notísia Relevante: PM: Governu hala’o hela preparasaun ba serimónia toma pose PR eleitu
Jornalista : Osória Marques
Editór : Cancio Ximenes
