Prosesu aprendizajen iha ESJ Calixa Viqueque. Imajen/Espesiál

DILI, 31 janeiru 2022 (TATOLI)—Kada tinan Eskola Sekundáriu Jerál (ESJ) Calixa iha Beobe Uma-Quic, postu Viqueque villa, munisípiu Viqueque, sempre hasoru difikuldade iha prosesu aprendizajen tanba falta karteira eskolár ba estudante kuaze 500.  

“Durante ne’e difikuldade ne’ebé eskola hasoru maka falta karteira eskolár, tanba estudante agora hamutuk na’in-490 sei ativa hela, ne’ebé la sufisiente hodi estudante sira tuur,” Diretór ESJ Calixa, Rosito Soares, Agência TATOLI, via telefónika, segunda ne’e.

Tuir Dirijente eskola, karteira eskolár ne’ebé ho kondisaun di’ak hamutuk 200-resin, nune’e parte eskola sosa kadeira no meza masa provizóriu hodi estudante sira bele simu matéria ho di’ak.

“Ami hato’o ona proposta ba edukasaun munisípiu Viqueque kuaze tinan tolu ona, maibé to’o agora seidauk iha resposta ruma. Aleinde ne’e, odomatan no janela iha eskola ne’e mós laiha,” nia akresenta.

Notísia relevante: Eskola 17 iha Viqueque tama projetu komunitáriu hadi’a sala aula

Tuir dadus estudante foun ESJ Calixa tinan 2022 ba klase I hamutuk na’in-145, klase II na’in-165 kompostu hosi siénsia teknolojia na’in-93 no siénsia sosiál hamutuk na’in-72 no klase III hamutuk na’in-180 kompostu hosi siénsia teknólojia hamutuk na’in-112 no siénsia sosiál hamutuk na’in-68, nune’e totál estudante Calixa tinan akadémiku 2022 hamutuk na’in-490.

Estudante Calixa ne’ebé liu ezame nasionál tinan 2021 hamutuk na’in-215, kompostu hosi siénsia teknólojia hamutuk na’in 143 no siénsia sosiál hamutuk na’in-72.

Iha tinan 2022, eskola ne’e sai benefisiáriu mós ba projetu komunitáriu, ne’ebé kobre ba sala aula tolu no toilet ida, ho totál orsamentu $58.000, tuir planu sei halo konstrusaun iha fulan-fevereiru ne’e.

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here