Diretór Administrasaun no Finansa hosi MEJD, Antoninho Pires. Imajen TATOLI/Egas Cristóvão

DILI, 24 abril 2022 (TATOLI)–Ministériu Edukasaun Juventude no Desportu (MEJD) ezekuta ona 33% Orsamentu Jerál Estadu (OJE) 2022 iha trimestre dahuluk (janeiru-marsu).

“Ita-nia ezekusaun atuál loloos ba tinan ne’e foin mak atinje 28%, maibé haree mós ba komitmentu no obrigasaun mak aumenta ba 33%, ho nune’e ekivalénsia ba osan kuaze ezekuta ona millaun $20 resin,” Diretór Jerál Administrasaun no Finansa hosi MEJD, Antoninho Pires, hateten ba Agência Tatoli, foin lalais ne’e, iha salaun diresaun, Vila Verde.

Notísia relevante: MEJD sei hadi’a tan infraestrutura eskola 250

MEJD prevee $81.708.623 iha tinan ne’e, ne’ebé aloka ba saláriu no vensimentu $64.929.539, bens no servisu $12.103.627, transferénsia públika $2.219.798, kapitál menór $124.200, no kapitál dezenvolvimentu $2.331.469, kompara ho tinan 2021 aloka millaun $100 resin.

Iha tinan 2022, MEJD aloka osan ba programa tolu hanesan boa governasaun no jestaun institusionál ho orsamentu $7.220.129 edukasaun no formasaun ho orsamentu $74.443.494 inklui igualdade jéneru inkluzaun sosiál ho orsamentu $45.000.

“Orsamentu ne’ebé ezekuta ona bazeia ba planu prioridade tolu ne’ebé maka ministériu trasa ona. Planu no programa tolu ne’e laiha difikuldade iha ninia implementasaun maibé mosu atrazu kiiik iha área infraestrutura tanba tenke halo fali verifikasaun projetu fíziku sira hafoin foin kria planu,” nia akresenta.

Planu ezekusaun MEJD tuir mai sei fó prioridade ba infraestrutura, nune’e bele aselera prosesu ne’ebé mak atrazu.

Jornalista : Tome Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here