Ekipa U-23 treinu iha kampu Sime Darby FC, Kuala Lumpur, domingu (24/04). Imajen Tatoli/Hortencio Sanchez

KUALA LUMPUR, 24 abril 2022 (TATOLI)—Ekipa selesaun nasionál Timor-Leste Under 23 (U-23), iha domingu ne’e, hahú treinamentu ba loron daruak, iha kampu Sime Darby FC, Kuala Lumpur, hodi prepara atleta partisipa ba eventu multidesportivu.

Ekipa selesaun nasionál U-23 hamutuk na’in-22 ne’ebé daudaun iha Malázia, sei partisipa Jogu Sudeste Aziátiku (SEA Games, sigla inglés) ba dala-31 tinan 2021, ne’ebé sei hala’o iha Hanoi, Vietname, hahú loron 12 to’o 23 maiu 2022.

Treinadór selesaun nasionál U-23, Fabio Maciel da Silva, hateten, treinamentu lao di’ak tebes tanba atleta futeból sira kompriende no desiplina durante treinu iha kampu.

“Treinamentu ohin ne’e hanesan faze rekuperasaun, maibé la hanesan ho horiseik, ohin sira halai oituan no treinu tátika foun oinsá kaer bola halo kontra-atake ba malu,” Treinadór informa ba Agência Tatoli, hafoin ramata fó treinu ba ekipa iha kampu.

Nune’e, hahú loron 23 to’o 27 abril, atleta sira sei treinu maka’as iha tuku 17:00 lokál, ne’ebé iha loron 29 abril sei iha jogu amigável kontra ekipa selesaun nasionál U-23 Malázia.

Notísia relevante: Treinadór U-23 enkoraja atleta partisipa jogu amigável hodi prepara kompetisaun

Ekipa U-23 sei sai hosi Malázia arranka bá Vietname iha loron 02 maiu hodi partisipa iha SEA Games, ne’ebé tuir oráriu iha jogu futeból, Timor-Leste sei kontra Filipina, Vietname, Myanmar no Indonézia.

Eventu multidesportivu ne’e, sei partisipa hosi atleta hamutuk 5.467, ho kompetisaun hamutuk 526 hosi desportu 40, ne’ebé antes ne’e Komisaun Organizadora hosi Komité Olímpiku Vietname halo ona evaluasaun no bazeia mós hosi regra Southeast Asian Games Federation (SEAGF).

Eventu ne’e sei partisipa hosi ema maizumenus 10.000, kompostu hosi atleta, ofisiál, delegasaun no mídia ne’ebé sei halo kobertura. 

SEA Games tinan 2021, tuir loloos realiza iha 21 novembru to’o 02 dezembru 2021, maibé ikus mai adia ba maiu 2022.

Asembleia Nasionál Vietname iha fulan kotuk aprova ona millaun $33 hodi organiza eventu multidesportivu ne’ebé partisipa hosi nasaun 11 hanesan Brunei Darusalam, Cambódia, Indonézia, Malázia, Myanmar, Laos, Singapura, Filipina, Timor-Leste, Tailándia no Vietname.

Jogu ne’ebé sei aprezenta iha eventu ne’e regula hosi Federasaun Jogu Sudeste Aziátiku ho supervizaun hosi Komité Olímpiku Internasionál (IOC, sigla inglés) no Konsellu Olímpiku Ázia (OCA, sigla inglés).

Jornalista : Hortencio Sanchez

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here