Ekipa selesaun nasionál U-23 Timor-Leste hala’o hela treinamentu antes arranka ba Vietname iha fulan ma’iu nia hahú. Imajen Tatoli/Hortencio Sanches.

MALÁZIA, 23 abríl 2022 (TATOLI)–Treinadór prinsipal ekipa selesaun nasional Timor-Leste U-23, Fabio Maciel da Silva hateten, treinamentu preparasaun loron dahuluk nian ne’e hodi halo rekuperasaun ba jogadór sira-nia kolen hafoin halo viajen naruk hosi Dili mai Malázia.

Nia hateten, treinamentu iha Malázia ne’e hanesan parte ida hosi preparasaun tékniku no fiziku antes atu arranka no partisipa iha Sea Games ne’ebé sei hala’o iha Vietname, iha fulan-maiu tinan 2022.

Notísia Relevante: Ekipa selesaun nasionál U-23 arranka bá Malázia

“Ohin, hotu-hotu treinu foku liu ba rekuperasaun ba jogadór sira tanba horisehik sira halo viajen dook, entaun sira kolen. Ohin ne’e, halo rekuperasaun ba sira-nia kolen de’it,” Treinadór ne’e hateten ba Agência TATOLI iha kampu PKNS Malázia, sábadu ne’e.

Ekipa selesaun nasionál U-23 Timor-Leste hala’o hela treinamentu antes arranka ba Vietname iha fulan ma’iu nia hahú. Imajen Tatoli/Hortencio Sanches.

Iha Malázia, nia dehan, ekipa selesaun nasionál U-23 ne’e sei kontinua halo treinamentu iha Malazia durante semana ida-resin hodi aproveita tempu halo jogu amigavel ho selesaun nasionál U-23 Malázia nian atu koko ekipa Timor-Leste nia forsa, antes ba tuir jogu iha Sea Games.

Treinamentu ne’e, hanesan meiu ida atu haforsa jogadór sira-nia enerjia no tékniku halimar bola iha kampu sai di’ak liután, antes sira hatudu jogu bonitu iha kompetisaun.

“Jogadór sira-nia preparasaun ne’e atu halo sira fresku, nune’e iha kompetisaun sira bele hatudu jogu ne’ebé di’ak,” nia dehan.

Totál ekipa selesaun nasionál U-23 hosi Timor-Leste ne’ebé hala’o hela treinamentu iha Malázia ne’e hamutuk ema na’in-22 ne’ebé kompostu hosi guarda rede na’in-tolu (3).

Tuir planu, selesaun nasionál U-23 ne’e sei arranka ba Vietname iha domingu (02 maiu 2022) hodi partisipa iha jogu Sea Games.

Tuir oráriu jogu ne’ebé komisaun organizadora Sea Games fó sai katak, Timor-Leste sei kontra Filipina, Vietname, Myanmar no Indonézia.

Jornalista : Hortencio Sanchez

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here