Komisaun Nasionál ba Eleisaun (CNE, sigla portugés), kalan ne'e iha CNE kontinua halo apuramentu ba rezultadu eleisaun foin lalais ne'e. Imajen TATOLI/Mirandolina Barros

DILI, 22 abríl 2022 (TATOLI)-Prezidente Komisaun Nasionál Eleisaun (CNE,sigla portugés), José Agostinho da Costa Belo, informa akta eleitorál husi diáspora sei to’o iha Timor-Leste iha loron 24 fulan-abríl 2022.

No prosesu apuramentu ba votu nulu no reklamadu to’o tuku 00:00 otl, iha loron 22 fulan-abríl 2022, CNE konklui ona munisípiu neen mak hanesan Aileu, Ainaro, Baucau, Bobonaro, Covalima no Dili.

Notísia Relevante :STAE konklui ona apuramentu iha nível nasionál

“Desde dadersan to’o agora, CNE konklui ona munisípiu neen tuir orden alfabétika. Aban (sábadu, 23 abril) sei kontinua halo apuramentu ba munisípiu Ermera ho sira seluk to’o loron 25 abril,”José Belo hateten ba jornalista Tatoli iha salaun CNE, sesta kalan ne’e.

Kona-ba akta eleitorál husi diáspora ne’e mai hosi sentru votasaun Portugal, Englatera, Irlanda no Korea Súl, no akta eleitorál husi Sentru votasaun sira iha Austrália to’o ona Timor-Leste iha loron 22 fulan-abril 2022.

“Diáspora nian 24 abril (domingu) mak foin to’o tanba tempu legál ne’e sei to’o dia 25 abril, portantu ita sei iha tempu hodi halo elaborasaun akta,”nia hateten.

Prosesu apuramentu nasionál ba votu nulu no reklamadu iha eleisaun segunda volta ne’e lais liu kompara ho primeira volta tanba urnas husi rai-liur to’o Timor-Leste iha loron 27 fulan-marsu tuir loloos tuir tempu legál ne’e oras 72 ka loron tolu de’it hafoin realiza eleisaun.

Maibé nia dehan, CNE sei halo prosesu apuramentu tuir tempu ne’ebé maka iha no fó oportunidade ba kandidatu rua ne’e atu hato’o reklamasaun bainhira mosu iregularidade ruma antes submete rezultadu eleisaun segunda volta ne’e ba Tribunál Rekursu.

“CNE fó biban ba kandidatu nain rua ka interesante balun hakarak hato’o rekursu ruma, karik laiha reklamasaun ruma ita sei submete ba Tribunál Rekursu hodi halo análize no valida rezultadu finál,” Prezidente CNE ne’e hateten.

Tuir lei prezidensiál, hafoin konklui kontajen inisiál iha sentru votasaun hotu-hotu iha rai-laran no mós iha rai-liur, Sekretariadu Tékniku Administrasaun Eleitorál (STAE) halo kedas rekonsiliasaun ba akta iha munisípiu ida-idak no rezultadu  tenke submete ba CNE durante oras 72 hodi halo verifikasaun ba votu válidu inklui nulu no reklamadu.

Prezidente CNE ne’e relata tuir dadus iha eleisaun segunda volta ne’e rejista de’it votu nulu hamutuk 5.000-resin husi Munisípiu 13 inklui RAEOA, kompara ho votu nulu iha eleisaun primeira volta hamutuk rihun 12-resin.

Entretantu, tuir Sekretáriadu Tékniku Administrasaun Eleitorál (STAE) konklui ona apuramentu iha nivél nasionál hafoin kontajen nível munisipál no diáspora iha loron 20 abríl 2022 hatudu kandidatu Prezidente Repúblika ho númeru sorteiu ida (1) José Ramos Horta ho votu 397,145 (62,09 %) no kandidatu ho númeru sorteiu rua (2) Francisco Guterres Lú Olo ho votu 242,440 (37,91%).

Notísia Relevante :Lú Olo simu rezultadu eleisaun no kongratula Ramos Horta

Jornalista: Afonso do Rosário

Editór: Agapito dos Santos

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here