Kandidatu Prezidente Repúblika períodu 2022-2027 ho númeru sorteiu rua (2), Francisco Guterres Lú Olo, ho ninia forsa polítika agradewse no kongratula Prezidente Repúblika eleitu, José Ramos Horta, liuhosi koneferénsia imprensa ne’ebé hala’o iha Lúz Clarita, Dili, sesta ne’e. Imajen Tatoli/António Dasiparu.

DILI, 22 abríl 2022 (TATOLI)—Kandidatu Prezidente Repúblika períodu 2022-2027 ho númeru sorteiu rua (2), Francisco Guterres Lú Olo, simu rezultadu derrota iha eleisaun prezidensiál segundu volta no kongratula ninia adversáriu José Ramos Horta ne’ebé povu fó konfiansa sai Prezidente Repúblika períodu 2022-2027.

Kandidatu Prezidente Repúblika períodu 2022-2027 ho númeru sorteiu rua (2), Francisco Guterres Lú Olo. Imajen Tatoli/António Dasiparu.

“Rezultadu eleisaun prezidensiál hatudu ona Jose Ramos Horta sai Prezidente Repúblika ba períodu 2022-2027 mak vontade povu liuhosi eleisaun direitu no demokrátika ne’ebé garante iha konstitusaun. Ha’u simu rezultadu eleisaun demokrátiku ho laran hakmatek, nune’e ha’u hato’o parabéns ba Prezidente eleitu,” kandidatu Prezidente Repúblika, Francisco Guterres Lú Olo, hateten ba jornalista sira liu hosi konferénsia imprensa iha Luz Clarita, sedta ne’e.

Nia espera, PR eleitu koopera ho Parlamentu Nasionál no órgaun soberania seluk hodi servisu hamutuk no hatudu konkista ne’ebé Timor-Leste hetan ona iha tinan lima liu ba, atu kontinua.

Biban ne’e, Lú Olo agradese ba apoiu hotu hosi partidu Fretilin hosi estrutura nasionál to’o baze ne’ebé durante ne’e servisu makaas ba nia kandidatura hodi re-kandidata an.

Nune’e mós, apoiu forsa polítika hosi Partidu Libertasaun Populár (PLP), Kmanek Haburas Unidade Nasionál Timoroan (KHUNTO), Os Verdes, Frente Mudansa, órganizasaun arte marsiál no órganizasaun rezisténsia ho sira seluk iha eleisaun segunda volta.

“Aproveita hodi agradese ba Sekretáriu Jerál Partidu Fretilin, Mari Alkatiri ho estrutura hotu esforsu no dedikasaun tomak iha ha’u-nia kandidatura. No, ha’u kontente tebes iha eleisaun segunda volta partisipa direta iha kampaña hosi Prezidente Partidu PLP, Taur Matan Ruak no Konsilleiru Másimu Partidu Khunto ninian,” nia hateten.

Kandidatu hosi partidu Fretilin ne’e kongratula mós povu Timor-Leste ne’ebé hatudu maturidade boot hodi kria pás no estabilidade iha tempu kampaña no eleisaun 19 abríl ne’e la’o ho hakmatek tebes.

“Parabeniza ba povu tomak hatudu maturidade pás no dame, mezmu iha insidente ki’ik balun maibé ita bele sente iha ambitu hakmatek no demokrátiku,” nia dehan.

Nia agradese mó ba servisu hosi órgaun eleitorál Sekretáriadu Tékniku Administrasaun Eleitorál (STAE), Komisaun Nasionál Eleisaun (CNE, siglá portugés) ne’ebé organiza prosesu eleisaun tomak la’o di’ak, ho mós Polísia Nasionál Timor-Leste (PNTL), FALINTIL Forsa Defeza Timor-Leste (F-FDTL) asegura seguransa hodi garante pás no estabilidade iha prosesu tomak.

Atuál Prezidente Repúblika ne’e nafatin apela ba povu tomak hodi kria pás no estabilidade hodi prontu simu rezultadu eleisaun ne’ebé iha tanba prosesu demokrásia la’o hanesan ne’e.

Enkuantu, nia  dehan, naturalmente lakon iha prosesu demokrátiku ne’e partidu rasik sempre iha avaliasaun iha tempu oin mai.

Sekretáriu Jerál Partidu Fretilin, Mari Alkatiri, reafirma nia admirasaun ba kandidatu hosi partidu Fretilin ne’ebé korajen ho dignidade atu aseita rezultadu ida-ne’e.

“Ha’u laiha liafuan, sei marka loron ida mak ko’alia maibé hanesan Sekretáriu Jerál Fretilin, ha’u bele dehan Fretilin hein hela ita boot (Lú Olo),” nia dehan.

Prezidente Partidu PLP, Taur Matan Ruak, hateten estrutura partidu PLP kontente hodi servisu hamutuk ho kandidatu Prezidente Repúblika Francisco Guterres Lú Olo iha prosesu eleisaun segunda volta ne’e.

“Tanba previlejiu ne’ebé ami ho servisu hamutuk no ami kontente loos bele partila momentu sira hanesan ne’e, hodi haburas demokrásia no hametin estabilidade, pás iha ita-nia rain,” nia hateten.

Nune’e, atuál Primeiru-Ministru oitavu Governu hakarak parabeniza povu ba konkista ida-ne’e no parabeniza kandidatu mais votadu no mós kandidatu Lú Olo rasik.

Reprezenta Konselleiru Másimu Partidu KHUNTO, Nicolau Lino Freitas, hateten kandidadu ema ne’ebé pasiensia rona hodi pasiénsia simu, nune’e KHUNTO suporta nafatin no prosesu demokrásia mak la’o nune’e no nafatin kontribui ba pás no estabilidade.

Entertantu, iha komferénsia imprensa ne’e partisipa mó hosi Prezidente Os Verdes, Antonio Lelahuno Cruz ho Prezidente Interinu Partidu Frente Mudansa, Igídio ‘La Manas la Malirin’.

Enkuantu, tuir Sekretáriadu Tékniku Administrasaun Eleitorál (STAE) konklui ona apuramentu iha nivél nasionál hafoin kontajen nível munisipál no diáspora iha loron 20 abríl 2022 hatudu kandidatu Prezidente Repúblika ho númeru sorteiu ida (1) José Ramos Horta ho votu 397,145 (62,09 %) no kandidatu ho númeru sorteiu rua (2) Francisco Guterres Lú Olo ho votu 242,440 (37,91%).

Nune’e, STAE haruka ona rezultadu materiál apuramentu nasionál provizóriu ba Komisaun Nasionál Eleisaun (CNE) hodi verfika apuramentu nasionál iha CNE durante oras 72 molok submete ba Tribunál Rekursu hodi foti desizaun ikus tuir lei eleisaun prezidensiál.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here