Ekipa IGE,I.P normaliza hela estrada área suku Oe-leu, postu administrativu Bobonaro liga ba postu administrativu Lolotoe munisípiu Bobonaro. Imajen IGE Maliana.

BOBONARO, 22 abríl 2022 (TATOLI) – Institutu Jestaun Ekipamentu, Institutu Públiku (IGE,I.P, sigla portugés) normaliza ona fatin estragu tolu iha munisípiu Bobonaro, ne’ebé kauza hosi dezastre natruál iha fulan hirak liubá.

Xefe Ekipa IGE, I.P Munisípiu Bobonaro, Costódio Perreira, informa estragu hirak-ne’e akontese iha área manu-tén dodok, suku Leolima, postu administrativu Balibo no ida seluk mak estrada kotu iha área suku Oe-leu, postu administrativu Bobonaro liga hosi postu administrativu Maliana no postu administrativu Lolotoe ba to’o munisípiu Covalima.

“Ami hahú serbisu emerjénsia ne’e iha fulan-fevereiru konsege normaliza ona estrada rua, ida maka tesik mai Balibo, Leolima rai monu taka estrada ne’e, depois estrada Fatuk Kakae Balibo nian no  ida mak dalan kotu iha suku Oe-leu nian,” nia informa ba Agência TATOLI, iha Maliana, sesta ne’e.

Nia salienta, daudaun ne’e ekipa sira kontinua serbisu iha terrenu hodi aselera normalizasaun estrada kotu iha área Galisapulu, suku Lahomea, ne’ebé liga hosi postu administrativu Maliana, ba Bobonaro no postu administrativu Lolotoe tanba provizóriu karreta liuliu kamioneta ne’ebé tula sasán ho kuantidade boot labele ultrapasa.

“Ami sei koordena ho servisu Obra Públika Rejionál atu haruka EDTL atu muda rin eletrisidade hodi ami-nia ekipa bele aselera daudaun serbisu ne’e hodi fasilita ita-nia komunidade sira halo viajen ba mai tanba horikalan ami ba haree estrada tiha ona,” nia hateten.

IGE mobiliza ekipamentu pezadu halo intervensaun emerjénsia foka de’it ba kondisaun estrada sira, tanba ne’e kona-ba ponte Bilimau, postu administrativu Cailaco liga ba postu administrativu Hatulia, munisípiu Ermera sei fó prioridade iha fulan-jullu mai tanba daudaun ne’e volume bee mota sei boot.

Tanba ne’e husu ba líder komuntária sira, bainhira akontese dezastre natruál rezultadu estrada kotu, rai monu no presiza ateru estrada, tenke hato’o lalais pedidu ba IGE,I.P nasionál nune’e bele enkamiña ba Ministru Obras Públika Abel Pires, hodi hetan aprovasaun atu ba rezolve imediata.

“Ami labele kontrola suku sira tomak entaun presiza lideransa komuntáriu sira mak kolaborasaun serbisu atu ita bele aselera serbisu ne’e antes udan mai maka’as tán,” nia hateten.

Daudaun ne’e ekipamentu pezadu IGE,I.P ne’ebé destaka iha terrenu mak hanesan buldozer ida, eskavatór modelu 130 ne’e rua, loader ida no  kamioneta tolu no tanki mina ida, maibé ekipamentu sira-ne’e balu kondisaun presiza halo manutensaun tanba uza tinan barak ona.

Notisia relevante: Kondisaun estrada impede konstrusaun eskola lima iha Baucau

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here