DILI, 21 abríl 2022 (TATOLI)—Primeiru-Ministru, Taur Matan Ruak, kongratula kandidatu Prezidente Repúblika períodu 2022-2027, José Ramos Horta, ne’ebé re-eleitu iha eleisaun prezidensiál 2022 nu’udar Prezidente Timor-Leste ba dalimak.
Notísia Relevante: Ramos Horta agradese ba povu nia konfiansa
“Aproveita kongratula kandidatu mais votadu, José Ramos Horta, ne’ebé eleitu sai Prezidente Repúblika,” Primeiru Ministru Taur Matan Ruak hateten ba jornalista sira hafoin ramata enkontru semanál ho Prezidente Repúblika, Francisco Guterres Lú Olo, iha Palásiu Prezidensiál Nicolau Lobato Bairru Pite, Dili, kinta ne’e.
Nune’e mós, Xefe Governu ne’e kongratula povu Timor-Leste tomak nia partisipasaun iha eleisaun prezidensiál segunda volta.
“Parabeniza ita-nia populasaun tomak sira-nia kontribuisaun partisipasaun iha eleisaun prezidensiál segunda volta,” nia dehan.
Imagem: Infografista Tatoli
Enkuantu, tuir Sekretáriadu Tékniku Administrasaun Eleitorál (STAE) konklui ona apuramentu iha nivél nasionál hafoin kontajen nível munisipál no diáspora iha loron 20 abríl 2022 hatudu kandidatu Prezidente Repúblika ho númeru sorteiu ida (1), José Ramos Horta, ho votu 397,145 (62,09 %) no kandidatu ho númeru sorteiu rua (2), Francisco Guterres Lú Olo, ho votu 242,440 (37,91%).
Nune’e, STAE haruka ona rezultadu materiál apuramentu nasionál provizóriu ba Komisaun Nasionál Eleisaun (CNE) hodi verfika apuramentu nasionál iha CNE durante oras 72 molok submete ba Tribunál Rekursu hodi foti desizaun ikus tuir lei ne’ebé vigora iha Timor-Leste.
Antes ne’e, Ramos Horta kandidata an dahuluk ba eleisaun prezidensiál 2007 no konsege halakon nia adversáriu Francisco Guterres Lú Olo iha eleisaun prezidensiál segunda volta. Prezidente reeleitu Jose Manuél Ramos Horta ne’ebé moris iha 26 dezembru 1949 ne’e, eleitu sai Prezidente Repúblika Timor-Leste ne’ebé simu pose iha 20 maiu 2007 no hakotu nia mandatu iha 20 maiu 2012.
Jornalista : Nelson de Sousa
Editór : Cancio Ximenes
