iklan

NASIONÁL, ELEISAUN, POLÍTIKA

CNE: apuramentu nasionál sei hahú aban

CNE: apuramentu nasionál sei hahú aban

Rezultadu Provisoriu Apuarementu munisipiu 12/RAEOA/DIASPORA Final iha STAE quarta 20-04-2022 18:00 Imagem: Infografista Tatoli

DILI, 21 abríl 2022 (TATOLI)–Vise Prezidente Komisaun Nasionál Eleisaun (CNE-sigla portugés), Domingos Barreto, informa aban sei halo apuramentu nasionál tanba falta munisípiu Bobonaro, Covalima no Rejiaun Administrativa Espesiál Oé-Cusse Ambeno (RAEOA) inklui diáspora mak seidauk submete urna mai nasionál.

Notísia Relevante: STAE kongratula povu Timor-Leste

“Falta Bobonaro, Covalima no RAEOA mak seidauk submete urna mai nasionál maibé ha’u hanoin orsida lorokraik tama hotu ona, nune’e aban (22/04) ita hahú halo apuramentu nasionál,” Vise Prezidente CNE, hateten ba Agência TATOLI, via telefónika, kinta ne’e.

Responsável ne’e hatutan, tuir kalendáriu ne’ebé mak iha katak apuramentu munisipál ohin ramata no aban kontinua kedas ho apuramentu nasionál.

Munisípiu sira seluk ne’ebé horisehik (kuarta, 20 abríl) submete ona urna mai nasionál mak hanesan Aileu, Ainaro, Baucau, Ermera, Dili, Lautém, Liquiça, Manufahi, Manatuto no Viqueque, agora hein tan munisípiu tolu seluk no aban ne’e ne’e bele submete ba apuramentu nasionál.

Notísia Relevante: STAE konklui ona apuramentu iha nível nasionál

Antese ne’e, Diretór Jerál STAE Acilino Manuel Branco ofisialmente deklara rezultadu provizóriu apuramentu nasionál ba eleisaun prezidente repúblika segunda volta hosi munisípiu 12 inklui Rejiaun Adminsitratuva Espesiál Oé-Cusse Ambeno (RAEOA) no diaspora iha kuarta (20/04), tuku 18h00, iha edifísiu STAE nasionál, Caicoli, Dili.

Rezultadu apuramentu munisipál hatudu katak Kandidatu prezidente Repúblika ho númeru sorteiu ida (1), José Ramos Horta, hetan votu 397.145 (62.09 %) no kandidatu Prezidente Repúblika ho númeru sorteiu rua (2), Francisco Guterres ‘Lú Olo’, halibur votu 242.440 (37.91 %), hodi termina STAE nia responsabilidade no sei submete ba VNE atu halo apuramentu nasionál.

Totál eleitór iha nivél nasionál no diáspora hamutuk 859,925, no hosi númeru ne’e eleitór ne’ebé partisipa eleisaun 559,814 (65,10%) ne’ebé kompostu hosi mane 289,758 (51,76%) no feto 270,056 (48,24%).

Notísia Relevante: Ramos Horta agradese ba povu nia konfiansa

Jornalista : Osória Marques

Editór       : Cancio Ximenes

iklan
iklan

Leave a Reply

iklan
error: Content is protected !!