Kandidatu Prezidente Repúblika (PR) períodu 2022-2027 ho númeru sorteiu ida (1), José Ramos Horta koalia ba jornalista sira hafoin ezerse nia direitu votu, iha tuku 07:10 OTL, iha sentru votasaun, sede suku Metiaut, Dili, tersa (19/04/2022). Foto Tatoli/Antonio Daciparu

DILI, 19 abril 2022 (TATOLI) –Kandidatu Prezidente Repúblika (PR) períodu 2022-2027 ho númeru sorteiu ida (1), José Ramos Horta, sei fó prioridade restaura ordem konstitusional estadu bainhira manán iha Eleisaun Prezidensial (Elpres).

Kandidatu José Ramos Horta hatete hafoin ezerse nia direitu votu, tersa ohin, iha tuku 07:10 OTL, iha sentru votasaun, sede suku Metiaut, Dili.

José Ramos Horta afirma komprimisu ho Partidu Congresso Nacional para a Reconstrução de Timor-Leste (CNRT) hodi disolve Parlamentu laiha relasaun ho pozisaun nu’udar Premiadu Nobel da Páz maibé hanesan responsabilidade nu’udar Prezidente Repúblika.

“Atu dissolve ka la’e, la’os tanba Nobel da Páz. Tanba eleitu Prezidente ho nia responsabilidade.  Prioridade ida ba ha’u,  mak restaura ordem konstitusional estadu de direitu, respeitu ba konstituisaun, nu’udar prosesu ida ne’e la siginifika tenke liu husi disolve parlamentu, ne’ebé liu husi dialogu ho bankada sira,” hateten Ramos Horta.

Notisia relevante : Horta otimista alkansa vitória iha eleisaun prezidensiál

Eis-Prezidente Repúblika hateten, dialogu ne’ebé halo la’os ba deit partidu CNRT no partidu ne’ebé apoia nia maibé inklui mos partidu sira seluk hanesan Fretilin para hamutuk hare’e ba oin oinsa bele servisu   para garante estabilidade paz iha rai laran.

Horta akresenta katak votus ne’ebé eleitór sira fo ba nia signifika resolve ona problema boot ne’ebé iha Prezidente Repúblika no sei kontinua halo dialogu buka solusaun ba problema iha Parlamentu Nasionál no Governu.

Notisia relevante : Rezultadu provizóriu eleisaun Prezidensial 2022-2027, Ramos Horta kontinua lidera  

“Tanba ohin povu ba vota sei hili karik ha’u signifika resolve ona problema bo’ot ne’ebé Prezidente Lú Olo halo ho violasaun konstituisaun, problema seluk kontinua iha Parlamentu no Governu, mais ne’e ita buka ho dialogu. Dialogu ida ho respeitu ho bankada sira hotu, Primeiru Ministru, Membru Governu sira para hare’e saida mak diak liu ba rai ida ne’e,” nia salienta.

Maske nune’e, Kandidatu ho númeru sorteiu ida ne’e prontu hodi simu rezultadu Elpres daruak hanesan dezisaun povu nian no nafatin agradese ba Partidu CNRT inklui partidu seluk no personalidade sira ne’ebé apoiu ona nia iha festa demokrasia ne’e.

“Manán karik agradese ba eleitoradu hotu no povu tomak, agradese ba Maub boot Xanana, CNRT no partidu hotu ne’ebé apoia. Ha’u pronto atu manán no pronto atu lakon, respeitu ba eleitór sira, respeitu ba povu ne’ebé soberanu halo ezersisiu ida ne’e kada tinan lima, direitu bo’ot ida sira nian ne’e duni kualker kandidatu ba ha’u tenke kolia nune’e prontu para manán no pronto para lakon,” nia aumenta.

Sentru votasaun rua iha suku Metiaut hetan observasaun husi observadór nasionál, internasionál, fiskál husi kandidatu sira, brigadista, ofisiál eleitorál husi STAE no Komisaun Nasionál Eleisaun (CNE-sigla portugés) no hetan seguransa másima husi Polísia Nasionál Timor-Leste (PNTL).

Totál votante husi sentru votasaun iha suku Metiaut hamutuk 1.309. Sekretariadu Tékniku Administrasaun Eleitorál (STAE) rejista 859.613 eleitór elejível iha territóriu nasionál no diáspora 852.500 rejista iha nível nasionál no 7.113 iha estranjeiru.

Jornalista: Cidalia Fátima

Editor     : Armandina Moniz

 

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here