Prizioneiru na’in- 472 no Guarda Prizionál nain-172 ezerse direitu votu iha Sentru Votasaun Prizaun Becora, munisípiu Dili. Imajen/Natalino Costa

DILI, 19 abríl 2022 (TATOLI)— Estabelesimentu Prizionál tolu hanesan Prizaun Becora, Suai no Gleno-Ermera, submete ona lista naran Prizioneiru na’in-28 ba Ministériu Justisa (MJ) hodi hetan indultu hosi Prezidente Repúblika Francisco Guterres Lú Olo, iha loron 20 maiu tinan ne’e.

Proposta ne’e ho baze ba konstume iha kada selebrasaun loron nasionál sira hanesan loron nasionál ba restaurasaun independénsia (20 maiu) no loron Proklamasaun independénsia (28 novembru), Prezidente Repúblika ho nia podér konstitusionál fó indultu no komutasaun pena ba prizioneiru sira bazea ba proposta indultu hosi Governu liuliu Ministériu Justisa.

Tuir lei númeru 5/2016, 25 maiu, artigu 7 alínea d hateten, Ministru Justisa hato’o de’it prosesu pedidu indultu, bele mai hosi dadur, família, defeza ka kestaun ho kondisaun moras no kompeténsia atu deside mai hosi Xefe Estadu, bazea ba konstituisaun artigu 85, númeru 1 hateten Prezidente Repúblika de’it mak bele fó indultu ka hamenus kastigu, hafoin rona Governu.

“Iha prizaun Becora, ami propoin prizioneiru nain-14 ba Governu atu hetan indultu hosi Prezidente Republika iha 20 Maio tinan ne’e,” Diretór Estabelesimentu Prizionál Becora, João Domingos, hateten ba Jornalista sira  iha Prizaun Becora, tersa ne’e.

Lista naran prizioneiru nain-14 ne’ebé mak atu hetan indultu hosi Prezidente Repúblika iha loron 20 maiu ne’e, haruka ona ba Ministériu Justisa.

Iha fatin ketak, Diretór Estabelesimentu Prizionál Gleno, Nito da Costa, hateten nia parte mós submete ona lista naran prizioneiru nain-13 atu hetan indultu hosi Prezidente Republika iha tinan ne’e.

“Ami haruka ona lista ba iha Governu ho dadur nain-13 maka ami propoin atu hetan indultu hosi Prezidente Republika iha 20 maiu tinan ne’e,” nia afirma.

Entretantu, Diretór Estabelesimentu Prizionál Suai, Júlio Dias Ximenes, mós afirma propoin ona prizioneiru ida atu hetan indultu hosi Prezidente Repúblika.

Indultu no hamenus katigu haktuir iha Kódigu Penál ne’ebé aprova ho Dekretu-Lei númeru 19/2009 no Lei Númeru 15/2016 mak regula kondisaun no prosedimentu atu fó indultu ka hamenus kastigu, Prezidente Repúblika halo nia kompeténisa tuir lei haruka.

Ba krime organizadu, krime transnasionál, terorizmu, tráfiku umanu, korrupsaun ativa, maske kumpre tiha ona metade ka um tersu pena, maibé lei bandu atu fó indultu. Ba Krime sira ne’ebé la grave, hafoin kumpre um tersu pena, Prezidente Repúblika bele fó indultu ho razaun umanitária ninian.

Iha tinan 2021, Prezidente Repúblika Francisco Guterres Lú Olof ó indultu no komutasaun ba pena, ba prizioneiru sira nu’udar kompeténsia eskluziva Prezidente Repúblika nian tuir artigu 85 konstituisaun no Kódigu Penál no Lein númeru 5/2016.

Notísia relevante:  Kaleidoskópiu 2021: PR fó indultu ba prizioneiru na’in-26

Jornalista: Natalino Costa

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here