Prezidente Repúblika, Francisco Guterres 'Lú Olo'. Imajen Tatoli/Egas Cristovão

DILI, 03 janeiru 2022 (TATOLI)—Iha kada selebrasaun loron nasionál sira, hanesan loron nasionál restaurasaun independénsia (20 maiu) no loron proklamasaun independénsia (28 novembru), tuir tradisaun Prezidente Repúblika ho nia poder konstitusionál fó indultu no komutasaun pena ba prizioneriu sira bazea ba proposta indultu hosi Governu liu-liu hosi Ministériu Justisa.

Tuir lei númeru 5/2016, 25 maiu, artigu 7 alínea d hateten, Ministru Justisa hato’o de’it prosesu pedidu indultu, bele mai hosi dadur, família, defeza ka kestaun ho kondisaun moras no kompeténsia atu deside mai hosi Xefe Estadu, bazea ba konstituisaun artigu 85, alinea 1 hateten Prezidente Repúblika de’it mak bele fó indultu ka hamenus kastigu, depois de rona Governu.

Indultu no hamenus kastigu haktuir iha Kódigu Penál ne’ebé aprova ho Dekretu-Lei númeru 19/2009 no Lei númeru 15/2016 mak regula kondisaun no prosedimentu atu fó indultu ka hamenus kastigu, Prezidente Repúblika halo nia kompeténsia tuir de’it lei haruka.

Ba krime organizadu, krime transnasionál, terorizmu, tráfiku umanu, korupsaun ativa maske kumpre tiha ona um tersu pena maibé lei bandu atu fó indultu.  Ba krime sira ne’ebé la grave, hafoin kumpre um tersu pena, Prezidente Repúblika bele fó indultu ho razaun umanitária ninian.

Iha tinan 2021, Prezidente Repúblika Francisco Guterres Lú Olo fó indultu no komutasaun ba pena, ba prizioneiru sira nu’udar kompeténsia eskluziva Prezidente Repúblika nian tuir artigu 85 Konstituisaun no Kódigu Penál no Lei númeru 5/2016.

PR fó indultu ba rekluzu na’in-11

Iha selebrasaun loron proklamasaun independénsia ba dala-46 (28 novembru 1975-28 novembru 2021) ne’ebé selebra iha aldeia Darsula, suku Gariuai, postu administrativu Baucau Vila, Munisípiu Baucau, Prezidente Repúblika Francisco Guterres Lú Olo ezerse nia kompeténsia hodi fó indultu ba prizioneiru ka rekluzu na’in-11 ba krime ne’ebé konsideradu menór. 

Fó indultu no komutasaun pena tenke halo tuir ninia fundamentu, nomeadamente ezijénsia pesoál, umanitária, familiár no sosiál hosi kondenadu no ezijénsia ba resosializasaun, komportamentu prizionál no esforsu ba reinsersaun sosiál, no haree mós ba komportamentu prizionál no esforsu ba reinsersaun sosiál hosi rekluzu no razaun umanitária ho kazu atu impoin.

Rekluzu na’in-11 ne’ebé hetan indultu mak hanesan Albertino Freitas Marques, Atanásio Ribeiro Belo, Domingos Gusmão Marques, Gerónimo Marques, Luis Marques, Mateus Boavida Marques, João Guterres, Abreu Ramos da Costa, Júlio Ximenes, Armindo Martins no Eliza da Conceição Gonçalves Noronha.

PR fó indultu ba prizioneriu na’in-15

Iha selebrasaun loron porklamasaun independénsia ba dala-46 (20 maiu 1975-20 maiu 2021), Prezidente Repúblika Francisco Guterres Lú Olo fó indultu ba prizioneiru na’in-neen (6) no indultu parsiál ba na’in-sia (9).

Prezidente Repúblika, Francisco Guterres Lú Olo, simu pedidu indultu hosi Governu hamutuk 61, maibé prosesu barak inkompletu ka la kumpre rekizitu obrigatóriu hosi Lei 5/2016 kona-ba konsesaun indultu no komutasaun pena liu-liu haree ba Konstituisaun RDTL artigu 85, mak PR fó de’it indultu ba prizioneiru na’in-neen (6) no fó indultu parsiál na’in-sia (9) ho totál hamutuk na’in-15.

Iha tinan rua ba kotuk, Prezidente Repúblika fó hanoin ona ba Parlamentu Nasionál atu hadi’ak Lei númeru 5/2016 hodi fó dalan ba Prezidente Repúblika atu kumpre nia knaar loloos tuir Konstituisaun RDTL artigu 85 haruka.

Prezidente Repúblika ezerse ninia kompeténsia konstitusionál hodi fó indultu ba prizioneiru na’in-15 iha selebrasaun loron Restaurasaun Independénsia Timor-Leste ba dala-19, liuhosi Dekretu Prezidente Repúblika ne’ebé publika iha Jornal Repúblika iha 19 maiu 2021, ho númeru 25/2021, 26/2021, 27/2021, 28/2021, 29/2021, 30/2021, prizioneiru na’in-neen (6) hetan liberdade totál, prizioneiru na’in-haat (4) hetan indultu parsiál fulan-neen (6) hosi pena prizaun liuhosi Dekretu Prezidente Repúblika númeru 31/2021, no  prizioneiru na’in-lima (5) hetan indultu parsiál ho metade pena prizaun liuhosi Dekretu Prezidente Repúblika númeru 32/2021.

Xefe Estadu uza nia kompeténsia eskluziva fó liberdade totál ba Francisco de Araújo, Thomas Freitas Martinho, Anacleto dos Santos, Mário Pereira da Costa, Adolfo Assunção de Jesus no Jaime Amaral Ximenes. 

Indultu parsiál ba prizioneiru hodi hamenus pena fulan-neen (6) ba Elvis Hornai da Cruz, José Fernandes, Renato Hornai da Cruz no Tiago Soares Almeida.

Ba prizineiru Arminda Soares, Geremias Sequeira Andrade, Henrique dos Santos, Ivo Soares no José dos Santos hetan indultu parsiál ho metade pena.

Hosi prizioneiru na’in-15 ne’e, Ministériu Justisa propoin prizioneiru na’in-58 atu hetan indultu tanba dadus hirak ne’e prenxe ona rekezitu pena um terço atu bele hetan indultu, tuir lei númeru 5/2016 artigu 7 alínea d, Ministru Justisa hato’o de’it prosesu pedidu indultu, bele mai hosi dadur, família, defeza ka kestaun ho kondisaun moras no kompeténsia atu deside mai hosi Xefe Estadu.

PR promulga lei sira

Durante tinan liman hala’o nia mandatu nu’udar Xefe Estadu, Prezidente Repúblika Francisco Guterres Lú Olo promulga lei lubuk ida durante tinan 2021 nia laran ne’e. 

Iha 10 dezembru 2021, Prezidente Repúblika Francisco Guterres Lú Olo, promulga alterasaun ba dekretu-lei númeru 19/2008, 19 juñu, Subsídiu Apoiu ba Idozu no Invalidéz (SAII), ho kbiit hosi artigu 88, númeru 4, Konstituisaun RDTL.

Bainhira Dekretu-Lei ne’e hahú implementa iha tinan 13 liubá, Timor-Leste seidauk hatuur rejime seguransa sosiál, maibé diploma ne’e determina tiha ona kondisaun espesiál ida katak benefisiáriu labele simu subsídiu protesaun sosiál dala rua hosi Estadu.

Iha tinan 2016, liuhosi Lei númeru 12/2016, Estadu Timor-Leste harii Rejime Kontribuitivu Seguransa Sosiál (RKSS) no rejime foun ne’e finansia hosi parte rua, hosi kontribuisaun traballadór ida-idak nian (4% hosi nia totál saláriu fulan ida) no hosi ninia entidade empregadora (6% hosi traballador nia saláriu fulan ida).

Iha 15 dezembru 2021, Prezidente Repúblika (PR), Francisco Guterres Lú Olo, promuga alterasaun dahuluk ba dekretu-lei fundu rezerva seguransa sosiál.

Liuhusi Dekretu-Lei númeru 55/2020, 28 outubru, mak Estadu Timor-Leste harii Fundu Rezerva Sosiál no define ninia modelu jestaun, iha ámbitu rejime kontributivu foun iha Timor-Leste, Rejime Repartisaun no Fundu Rezerva.

Hafoin tetu situasaun ekonomia mundiál no indikadór ekonómiku no finanseiru, Konsellu Minstru deside foti medida balun hodi hasa’e rendimentu ba karteira Fundu Rezerva Seguransa Sosiál maibé ho risku kiik, atu nune’e fundu ne’e fó benefísiu ba beibeik ba sira-ne’ebé kontribui fulan-fulan ba rejime kontributivu foun iha Timor-Leste.

Rejime Kontribuitivu foun seguransa sosiál mak Rejime Repartisaun, obrigatóriu no kontributivu: atu hetan direitu ba benefísiu (prestasaun sosiál), traballadór tenke kontribui ba rejime (kontribuisaun sosiál).

Iha 19 novembru 2021, Prezidente Repúblika Francisco Guterres Lú Olo promulga Dekretu Parlamentu Nasionál númeru 53/V hosi Parlamentu Nasionál kona-ba alterasaun dahuluk ba Lei númeru 10/2004, Lei Sistema Saúde, no aprova medida esesionál no temporária hodi hatán vijilánsia sanitária ba pandemia moras COVID-19.

Implementasaun estadu emerjénsia uluk hala’o tanba nu’udar medida preventiva no kontrolu atu hasees sidadaun hotu-hotu hosi kalamidade públika ne’ebé bele mosu hosi COVID-19 liuhosi suspensaun ba direitu, dever no garantia balun ne’ebé konsagra ona iha Konstituisaun Repúblika Demokrátika Timor-Leste.

Iha Lei númeru 10/2004, 24 novembru, prevee ona, aleinde ezisténsia sistema vijilánsia epidemolójika, medida vijilánsia sanitária. Lei ne’e sei konsolida kuadru normativu ne’ebé fó-sai iha Lei Sistema Saúde, hodi haforsa kapasidade ordenamentu jurídiku atu hatán ho efikásia ba ejizénsia ba nesesidade protesaun vida no sidadaun ida-idak nia saúde.

Redasaun foun ba artigu 10 hosi Lei Sistema Saúde, Parlamentu Nasionál atribui kompeténsia foun ba autoridade saúde nian relasiona ho vijilánsia epidemiolójika.

Nune’e, lei ne’e fó dalan ba autoridade kompetente relasiona ho vijilánsia epidemiolójika bele halo ezame médiku ba ema sé de’it, rekolla amonstra biolójiku no korrespondente teste laboratoriál, restreiu ba kontaktu no vijilánsia no monitorizasaun, hanesan mós inspesiona balada no produtu biolójiku sira.

Ba kestaun vijilánsia epidemiolójika, sidadaun ida-idak no profisionál no instituisaun saúde, públiku no privadu tenke kolabora ba fornesimentu dadus relevante iha aplikasaun rekomendasaun hosi autoridade kompetente.

Artigu 11 númeru 1 ko’alia kona-ba vijilánsia sanitária ho asaun sira atu elimina, diminui no prevene risku ba saúde públika no interven iha problema sanitária, produsaun no sirkulasaun ba bens no prestasaun servisu ho interrese saúde abranje vasinasaun, kontrolu sanitáriu bens no servisu, lokál, edifisiu, portu, aeroportu no fronteira, deskontaminasaun no desinfektasaun, apreensaun ba produtu no suspensaun atividade ne’ebé prejudika risku ba saúde públika.

Diploma ne’e hetan aprovasaun ho unanimidade iha Parlamentu Nasionál, iha 03 novembru 2021.

Iha 13 setembru 2021, Prezidente Repúblika Francisco Guterres Lú Olo promulga alterasaun dahuluk ba Dekretu-Lei kona-ba Estatutu Instituto para a Qualidade de Timor-Leste, I.P. (IQTL).

Alterasaun dahuluk ba Dekretu-Lei nee hala’o ba kompozisaun orgaun sira no rekizitu sira-neebé kesi IQTL, aumenta númeru membru sira no konkretiza kompeténsia sira-ne’ebé pertense ba orgaun sira IQTL ninian.

Nune’e mós, hala’o armonizasaun ekiparasaun ba kategoria siratitulár kargu sira iha orgaun sira IQTL nian no kláuzula Estatutu IQTL ne’ebé sai parte integrante hosi Dekretu-Lei ne’ebé kria institutu ne’e mós sai sujeitu ba alterasaun.

Entre artigu sira-ne’ebé hetan alterasaun mak artigu 3 ne’ebé dehan katak IQTL bele hala’o servisu territorialmente deskonsentradu. Ministru Turismu, Komérsiu no Indústria mak sei tutela no iha kompeténsia nomea no ezonera Konsellu Administrasaun no Konsellu Fiskal IQTL, I.P (iha kazu nomeasaun no ezonerasaun Konsellu Fiskal, Ministru Finansa mak tenke propoin).

Konsellu Administrasaun sei kompostu hosi prezidente ida, sekretáriu ida no vogál na’in-tolu (3), nomeadu hosi Ministru ne’ebé tutela. Molok ida-nee, Konsellu Administrasaun kompostu hosi prezidente no vogal nain-rua (2), nomeadu hosi Konsellu Ministru, bazeadu ba proposta hosi Ministru tutela.

Konsellu Fiskal sei kompostu hosi membru na’in-tolu (3), nomeadu hosi Ministru tutela, bazeadu ba proposta hosi Ministru Finansa. Molok ida-nee, Konsellu Fiskal kompostu hosi membru nain-rua, nomeadu hosi Konsellu Ministru (ida indikadu hosi Ministru Finansa no ida seluk hosi Ministru Turizmu, Komérsiu no Indústria ne’ebé tutela ba institutu públiku ne’e).

Instituto Para a Qualidade de Timor-Leste, I.P sei organiza tuir departamentu haat: Departamentu Administrasaun, Departamentu Normalizasaun, Departamentu Metrolojia no Departamentu Kualifikasaun no Asuntus Internasionais. Dirijente sira22:46:00 hosi kada departamentu sei ekiparadu ho Xefe Departamentu. Molok alterasaun ne’e, dirijente sira-nee ekiparadu ho Diretór Nasionál sira.

PR altera dahuluk Lei Resensiamentu eleitorál

Iha 03 setembru 2021, Prezidente Repúblika Francisco Guterres Lú Olo promulga alterasaun dahuluk ba Lei Resensiamentu Eleitoral tanba dekretu foun ne’e haktuir ona Konstituisaun RDTL.

Dekretu ida uluk aprovadu iha 28 juñu 2021, hosi Parlamentu Nasional no Prezidénsia Repúblika simu iha 06 jullu 2021 ne’e, iha artigu balun ne’ebé Prezidente Repúblika konsidera la haktuir Konstituisaun RDTL no tanba razaun ne’e mak haruka ba Tribunal Rekursu atu tetu no foti desizaun.

Prezidente Repúblika hato’o pedidu ba Tribunal Rekursu hodi halo fiskalizasaun preventiva ba konstitusionalidade ba alínea k) hosi númeru 1 artigu 13 no númeru 2 artigu 17 no númeru 4 artigu 29.

Akórdaun Tribunal Rekursu deklara katak artigu 17 númeru 2 hosi Dekretu Parlamentu Nasionál mak inkonstitusionál tanba la respeita direitu ema nian ne’ebé previstu iha artigu 38 Konstituisaun RDTL kona-ba fó-sai dadus pesoál.

Tanba Akórdaun husi Tribunal Rekursu mak konsidera artigu 17, númeru 2 inkonstitusionál mak Prezidente Repúblika tenke foti desizaun veta Dekretu ne’e no haruka fila ba Parlamentu Nasional iha 9 agostu 2021, akompaña ho kópia Akórdaun nian.

Parlamentu Nasionál halo fali apresiasaun ba Dekretu vetadu hosi Prezidente Repúblika no deside hasai tiha artigu 17, númeru 2) no haruka mai Prezidente Repúblika iha 31 agostu 2021.

Tanba laiha ona inkonstitusionalidade, Prezidente Repúblika promulga, iha 3 setembru 2021, Dekretu Parlamentu Nasionál ho númeru 43/V.

Iha 27 agostu 2021, Prezidente Repúblika Francisco Guterres Lú Olo promulga Dekretu-Lei kona-ba apoiu estraordináriu ba insersaun iha merkadu traballu hodi tulun traballadór sira-ne’ebé sai dezempregu, tanba impaktu sosio-ekonómiku hosi implementasaun medida prevensaun hodi kombate pandemia COVID-19.

Implementasaun medida prevensaun no kombate pandemia COVID-19 lori impaktu ba atividade ekonómiku ne’ebé menus, númeru dezempregu aumenta no risku sai ki’ak, no situasaun ne’e hetok iha impaktu boot liután ho inundasaun ne’ebé akontese iha 4 abril 2021, tanba ne’e Estadu halo aprovasaun ba medida apoiu ba empregu liuhusi Lei númeru 8/2021, 3 maiu.

Liuhusi Programa “trabalho contra remuneração” iha ámbitu “Supporting Flood Response and Recovery Project” ho apoiu finanseiru hamutuk $1.000.000 jere hosi Programa Nasaun Unida ba Dezenvolvimentu (PNUD) no ho koordenasaun ho Sekretária Estadu Formasaun Profisionál no Empregu (SEFOPE) sei benefisia traballadór besik 5000 iha aldeia 50.

Programa ne’e sei lori impaktu liután liuhuoi promove insersaun traballadór sira iha merkadu traballu no insentiva partisipasaun setór privadu hodi fó apoiu finanseiru ba empreza no traballadór sira.

Dekretu-Lei fó dalan ba Governu atu fó apoiu ba empregu liuhosi pagamentu ba empreza to’o 70% hosi kustu remunerasaun ba nia traballadór sira, livre hosi dever atu selu kontribuisaun ba seguransa sosial no pagamentu ba súbsidiu estraordináriu dezempregu no promove manutensaun postu traballu, kontratasaun traballadór no hala’o fila-fali atividade ekonómika.

PR promulga alterasaun daruak Dekretu-lei Suplementu remuneratóriu

Iha 23 agostu 2021, Prezidente Repúblika Francisco Guterres Lú Olo promulga altersaun daruak ba dekretu-lei suplementu remunetrátoriu ba liña frente sira, ne’ebé mak halo atividade profísionál iha situasuan pandemia COVID-19.

Proposta alterasaun daruak ba diploma ne’ebé hetan promulgasaun hosi Prezidente Repúblika, Francisco Guterres Lú Olo, fó-hatene katak pagamentu suplementu remuneratóriu relasiona ho COVID-19, ne’ebé hahú iha marsu 2020 sei implementa to’o dezembru 2021 bainhira orsamentu Jerál Estadu (OJE) 2021 mós ramata, karik presiza hatutan suplementu ne’e ba tinan 2022, presiza iha fali Dekretu-Lei foun ida.

Traballadór sira iha liña frente tenke hala’o sira-nia atividade profisionál iha servisu prevensaun no kontrolu COVID-19 no iha situasaun risku hetan kontájiu hosi vírus kauza moras COVID-19, Governu Timor-Leste, ne’ebé haktuir Konstituisaun RDTL no Estatutu Funsaun Públika, submete ba Prezidente Repúblika Dekretu-Lei ida hodi hadi’ak Dekretu-Lei ho númeru 17/2020, hodi rekompensa traballadór efetivu ida-idak temi iha kraik.

Pesoál saúde sira. Imajen hosi dr. Herculano Seixas dos Santos.

Dekretu-Lei kona-ba suplementu ne’e define katak profisionál sira-ne’ebé elijível ba direitu hetan suplementu remuneratóriu mak médiku,  efermeiru,  auxiliár ba asaun médika, parteiru/a sira, téniku análiza laboratóriu, tékniku saúde públika, tékniku radiolojia, sira-ne’ebé ezerse funsaun iha sala situasaun Centro Integrado de Gestão de Crises (CIGC-sigla portugés), motorista veíkulu, responsável sira-ne’ebé lori ema ba izolamentu obrigatóriu, elementu Forsa Defeza Timor-Leste (F-FDTL) no ajente Polísia Nasionál Timor-Leste (PNTL) ne’ebé envolve iha prevensaun no kontrolu COVID-19.

Nune’e mós, traballadór sira iha Autoridade de Inspeção e Fiscalização da Atividade Económica, Sanitária e Alimentar, Direção Nacional de Quarentena e Biosegurança, Serviço de Migração e da Autoridade Aduaneira, Serviço Nacional de Inteligência,  Direção Nacional da Segurança do Património Público, no servisu autoridade ka administrasaun munisipál,  responsável ba halibur, lori no  soe lixu, sira-ne’ebé halo parte servisu autoridade ka administrasaun munisipál,  servisu munisipál ba fornesimentu bee-moos, koveiru sira no sira-ne’ebé integra iha ekipa ne’ebé hala’o servisu iha Rejiaun Adminstrativa Espesial Oé-Cusse Ambeno.

Uluk liu, Prezidente Repúblika promulga Dekretu-Lei ho númeru 17/2020, iha 30 abril, hodi fó direitu ba traballadór liña frente atu ida-idak simu mós suplementu remuneratóriu ida, ho efeitu hosi marsu 2020. Iha setembru 2020, Dekretu-Lei ne’e hetan alterasaun dahuluk.

Dekretu-Lei ida-ne’e akomoda hotu ona preokupasaun ne’ebé Prezidente Repúblika hato’o ba Governu liuhosi mensájen iha 24 juñu 2021, nune’e Dekretu-Lei ne’e hetan aprovasaun hosi Konsellu Ministru iha 4 agostu, Governu haruka mai Prezidénsia iha 11 agostu 2021 no Prezidente Repúblika promulga iha 23 agostu 2021. 

Iha 03 abríl 2021, Prezidente Repúblika Francisco Guterres Lú Olo promulga Dekretu Parlamentu Nasionál númeru 34/V refere ba alterasaun dahuluk Lei Orsamentu Jerál Estadu ba tinan-2021 no Aprovasaun Medidas Apoiu Sosiu-ekonómiku.

Prezidente Repúblika konklui katak Dekretu Parlamentu Nasionál ne’e tuir presupostu no rekezitu sira-ne’ebé iha konformidade ho dispozisaun aplikáveis Konstituisaun Repúblika no nia Lei sira, no mós kondisaun polítika ba nesesidade, konveniénsia no preménsia no nune’e, promulga Lei Orsamentu Jerál Estadu ba tinan-2021.

Parlamentu Nasionál aprova alterasaun dahuluk ba Orsamentu Jerál Estadu ne’ebé lori mudansa ba Orsamentu Administrasaun Sentrál ho valór osan $1.932.543.312 hetan aumentu $135, 300.000, Fundu COVID-19 ho valór osan $287.641.793, hetan aumentu $256.641.793, Fundu Kontinjénsia $65.151.800, hetan aumentu $41.388.428.

Reseita hosi órgaun no servisu Administrasaun Sentrál hosi alterasaun Orsamentu Jerál Estadu ba tinan-2021 sa’e ba millaun $1.932,5, reseita petrolíferu estimada hosi Fundu Petrolíferu mak millaun $ 1.377,6. Maske iha aumentu hosi reseita, alterasaun ba Orsamentu Jerál Estadu mantein nafatin Rendimentu Sustentavel Estimadu ho valór millaun $ 547,9.

Alterasaun lejislativa prinsipál hosi Dekretu Parlamentu Nasionál iha relasaun ho Lei aprovasaun Orsamentu Jerál Estadu ba tinan-2021, iha dezembru 2020 tanba medida apoiu estensiva hodi hamenus efeitu negativu hosi COVID-19, mota no bee-sa’e iha 2020 no inundasaun iha 4 abril 2021.

Promulgasaun Lei Orsamentu Jerál Estadu no Aprovasaun Medida Apoiu sei fó kbiit ba Governu atu fó apoiu empregu, subsídiu ba traballadór sira, emprezariu sira, traballadór servisu doméstiku nian no jerente no administadór sira, kontribuisaun sosiál no dispensa kontributiva, subsídiu estraórdináriu ba dezempregu, subsídiu estraordináriu ba eletrisidade, subsídiu estraordináriu ba renda, subsídiu ba estudante, moratóriu ba kréditu no seguransa alimentár.

PR dekreta estadu emerjénsia

Hahú hosi 01 masru 2021 to’o iha fulan outubru 2021 ne’e, Prezidente Repúblika Francisco Guterres Lú Olo dekreta estadu emerjénsia ba dala-XI to’o estadu emerjénsia ba dala-XIX.

Iha 01 marsu 2021, Prezidente Repúblika Francisco Guterres Lú Olo dekreta Estadu Emerjénsia dala-XI ba loron tolu-nulu (30), hahú hosi tuku 00.00 iha loron 04 fulan marsu tinan 2021 (kinta-feira) no ramata iha tuku 23.59 iha sesta-feira loron 02 fulan abril tinan 2021.

Família matebian hamutuk ho CIGC no servisu saúde Covaima haloot mate-sin Norberto Inácio Ximenes iha simetériu públiku Ai-Oan, Lalawa, Tilomar, Covalima. Imajen Tatoli/Celestina Teles.

Prezidente dekreta Estadu Emerjénsia ne’e tanba haree ba númeru kazu pozitivu ho COVID-19 ne’ebé aumenta babeibeik iha rai vziñu Indonézia, no tanba detekta kazu pozitivu iha Aldeia Clau-Halec, Suku Bee Lulik Leten, hosi sidadaun sira-ne’ebé halo pasajen ilegál hosi fronteira rai-maran, Governu dekreta serka sanitária iha 15 fevereiru 2021 ba Munisípiu Covalima no Bobonaro.

Liuhosi Dekretu Prezidensiáll ba estadu emerjénsia ba dasanuluk-resin-ida, Prezidente Repúblika husu atu Forsas Armadas bele haforsa Polísia Nasionál Timor-Leste no Departamentu.

Prezidente Repúblika dekreta Estadu Emerjénsia hafoin pedidu estensaun aprova iha Parlamentu Nasionál ho votu a-favór 53 no abstensaun 12. Molok ne’e, iha 24 fevereiru, Prezidente Repúblika rona uluk Konsellu Superior Defeza no Seguransa no Konsellu Estadu nia hanoin molok haruka pedidu autorizasaun ba Parlamentu Nasionál hodi deklara estensaun Estadu Emerjénsia ba dasanuluk-resin-ida.

Iha 01 marsu 2021, Prezidente Repúblika, Francisco Guterres Lú Olo, dekreta Estadu Emerjénsia dala-XII ba loron tolu-nulu (30), hahú hosi tuku 00.00 iha loron 04 fulan marsu tinan 2021 (kinta-feira) no ramata iha tuku 23.59 iha sesta-feira loron 02 fulan abril tinan 2021.

Prezidente Repúblika dekreta Estadu Emerjénsia hafoin pedidu estensaun aprova iha Parlamentu Nasionál ho votu a-favór 53 no abstensaun 12. Molok ne’e, iha 24 fevereiru, Prezidente Repúblika rona uluk Konsellu Superior Defeza no Seguransa no Konsellu Estadu nia hanoin molok haruka pedidu autorizasaun ba Parlamentu Nasionál hodi deklara estensaun Estadu Emerjénsia bad ala-XII.

Iha 02 juñu 2021, Prezidente Repúblika, Francisco Guterres Lú Olo, liuhusi Dekretu Prezidente Repúblika númeru 35/2021 iha 28 maiu 2021, dekreta Estadu Emerjénsia  ba dala-XIV ba loron 30,  hahú hosi tuku 00.00 iha kuarta (02 juñu 2021) no termina iha tuku 23.59 iha kinta (01 jullu 2021).

Prezidente Repúblika dekreta Estadu Emerjénsia ne’e hafoin pedidu estensaun aprova iha Parlamentu Nasionál, maibé antes Konsellu Superior Defeza no Seguransa no Konsellu Estadu husu Prezidente Repúblika haruka pedidu autorizasaun ba Parlamentu Nasionál estensaun Estadu Emerjénsia ba dala-XIV

Iha 03 jullu 2021, Prezidente Repúblika (PR), Francisco Guterres Lú Olo, liuhosi Dekretu númeru 39/2021, 30 juñu, dekreta Estadu emerjénsia ba dala-XV ba loron tolu-nulu (30), hahú hosi sesta tuku 00.00 iha 2 jullu 2021 no termina iha sábadu tuku 23.59 iha 31 jullu 2021, tanba haree ba númeru kazu COVID-19 ne’ebé aumenta, Estadu kontinua foti medida prevensaun no kombate kontájiu virus SAR-CoV-2.

Iha 29 jullu 2021, Prezidente Repúblika, Francisco Guterres Lú Olo, liuhusi Dekretu Prezidente Repúblika númeru 56/2021, 27 jullu, dekreta Estadu Emerjénsia ba dala-XVI ba loron 30 tan, hahú husi tuku 00.00 iha domingu (01/08) no termina tuku 23.59 iha segunda (30/08).

Deklarasaun estadu emerjénsia ne’e sei abranje territóriu nasionál tomak ho fundamentu iha subsisténsia ba situasaun kalamidade públika. Estadu emerjénsia parsialmente suspende direitu ba sirkulasaun internasionál, liberdade sirkulasaun no fixasaun rezidénsia, direitu reuniaun no manifestasaun sira, liberdade ba kultu, direitu ba edukasaun no direitu propriedade, direitu ba rezisténsia, no inisiativa ekonómika privada.

Timor-Leste presiza fó atensaun liután tanba iha ona ema na’in-haat (4) ne’ebé tama mai territóriu nasionál iha fulan juñu nia rohan no inísiu jullu 2021, ne’ebé kontajiozu ho variante foun Delta hosi SARS-Cov-2.

Iha 24 agostu 2021, Parlamentu Nasionál (PN) tersa ne’e autoriza Prezidente Repúblika, Francisco Guterres Lú Olo, dekreta estadu emerjénsia ba dala-XVII iha territóriu nasionál tanba sei iha subsisténsia situasaun kalamidade públika.

Durasaun hosi renovasaun deklarasaun estadu emerjénsia ba loron 30 ne’e, hahú hosi 00:00 iha loron 31 agostu 2021 (tersa-feira) no termina iha oras 23:59 iha loron 29 setembru 2021 (kinta-feira).

Renovasaun deklarasaun estadu emerjénsia ba dala-XVII ne’e autorizada hosi Parlamentu Nasionál ho rezultadu votasaun nominál a-favór 38, kontra 0 no abstensaun 16.

Projetu-lei 32/2021 pasa, nune’e Parlamentu Nasionál autoriza renovasaun deklarasaun estadu emerjénsia. Signifika apoiu no kolaborasaun hosi Parlamentu Nasionál nian ba Governu nia esforsu luta hasoru COVID-19 no variante sira hotu inklui esforsu asegura no kombate krime organizadu iha área fronteira.

Iha 28 setembru 2021, Parlamentu Nasionál (PN) ne’e autoriza Prezidente Repúblika dekreta estadu emerjénsia ba dala-XVIII iha territóriu nasionál tanba sei iha subsisténsia situasaun kalamidade públika.

Durasaun hosi renovasaun deklarasaun estadu emerjénsia ba loron 30 ne’e, hahú hosi 00:00 iha loron 30 setembru 2021 (kinta-feira) no termina iha oras 23:59 iha loron 29 outubru 2021 (sesta-feira).

Iha 26 outubru 2021, Parlamentu Nasionál (PN) autoriza Prezidente Repúblika dekreta estadu emerjénsia ba dala-XIX iha territóriu nasionál tanba ho situasaun kalamidade saúde públika.

Durasaun hosi renovasaun deklarasaun estadu emerjénsia ba loron 30 ne’e, hahú hosi 00:00 iha 30 outubru (sábadu) no termina iha oras 23:59 iha loron 28 novembru 2021 (domingu).

Razaun Prezidente Repúblika husu autorizasaun ba Parlamentu Nasionál tanba situasaun COVID-19 iha Timor-Leste kazu ativu konfirmadu hamutuk 63, hosi totál 19.770 dezde inisíu rejista kazu no ema na’in-121 mak mate ho COVID-19.

Prezidente Repúblika veta

Tuir Konstituisaun Repúblika Demokrátika Timor-Leste (KRDTL), Prezidente Repúblika iha kbiit atu promulga ka veta dekretu ne’ebé Parlamentu Nasionál aprova iha ninia sesaun plenária ka Dekretu-Lei ne’ebé Governu aprova liuhosi Konsellu Ministru.

PR veta dekretu kona-ba estatutu majistradu judisiál

Iha 15 dezembru 2021, Prezidente Repúblika Francisco Guterres Lú Olo veta dekretu hosi PN kona-ba estatutu majistradu judisiál ne’ebé Parlamentu Nasionál haruka Prezidente Repúblika iha loron 16 novembru 2021.

Hafoin tetu klean Dekretu ne’e, Prezidente Repúblika deside veta no haruka fila diploma ne’e ba Parlamentu Nasionál tuir artigu 88.o no 1 Konstituisaun Repúblika.

Prezidente Repúblika husu ba deputadu sira atu hadi’a Dekretu ne’e iha mós ámbitu Lei kona-ba Organizasaun Judisiária. Lei ida-ne’e promulga ona hosi Prezidente Repúblika no publika ona iha Jornál Repúblika, iha 2 dezembru 2021.

Tuir lei organizasaun judisiária, juíz sira iha Tribunál Administrativu, Fiskál no Kontas haktuir Estatutu Majistratura Judisiál no haktuir mós jurisdisaun hosi Konsellu Superior Majistratura Judisiál.

Dekretu kona-ba Estatutu Majistradu Judisiál sira tenke haktuir regra sira tama ona iha Lei Organizasaun Judisiária.

Iha mensájen haruka ba Parlamentu Nasional, iha 10 dezembru 2021, Prezidente Repúblika fó-hatene mós fundamentu sira seluk relasiona ho ninia desizaun veta Dekretu kona-ba Estatutu Majistradu Judisiál. 

Parlamentu Nasional sei tetu fundamentu hotu-hotu hato’o hosi Prezidente Repúblika iha sesaun Plenária iha loron 90 nia laran, hahú sura hosi loron ne’ebé órgaun soberania ne’e simu dekretu ne’e ho mensájen prezidensiál kona-ba veto.

Parlamentu Nasionál bele hili dalan tolu:

  1. Bele halo konfirmasaun ba votu ho deputadu, mínimu na’in 33. Ho votu a-favór hosi maiória absoluta ne’e, Parlamentu Nasionál bele haruka fila-fali ba Prezidente Repúblika hodi promulga Dekretu ne’e iha prazu loron ualu nia laran, tuir artigu 88.ono 2 Konstituisaun Repúblika;
  2. Bele halo expurgasaun ka alterasaun ba Dekretu ne’e tuir fundamentu sira-ne’ebé Prezidente Repúblika hato’o liuhosi nia mensájen;
  3. Parlamentu Nasionál la halo reuniaun to’o prazu loron 90 ramata. Se Parlamentu Nasional hili dalan ida-ne’e, Dekretu ne’e kaduka ka mate.

PR veta alterasaun dahuluk ba lei resenseamentu eleitorál

Iha 12 agostu 2021, Prezidente Repúblika (PR) Francisco Guterres “Lú Olo”  uza nia kompeténsia konstitusionál, veta alterasaun dahuluk ba lei resenseamentu eleitorál ne’ebé Tribunál Rekursu deklara inkonstitusionalidade ba artigu 17 númeru 2, Dekretu Parlamentu Nasionál númeru 43/V-Primeira alterasaun ba Lei númeru 6/2016, 25 maiu, Lei Resenseamentu Eleitorál.

Liuhosi analiza ba Dekretu Parlamentu Nasionál ne’e, iha 23 jullu, Prezidente Repúblika Francisco Guterres “Lú Olo”, hato’o pedidu ba Tribunal Rekursu halo fiskalizasaun preventiva ba konstitusionalidade Dekretu Parlamentu Nasionál.

Nune’e, iha 6 agostu 2021, Tribunál Rekursu deklara artigu 17 númeru 2 hosi Dekretu Parlamentu Nasionál mak Inkonstitusionál.

Akórdaun Tribunal Rekursu hateten katak artigu 17 númeru 2 hosi Dekretu Parlamentu Nasionál konfronta ho artigu 38 hosi Konstituisaun, viola direitu ba klarifikasaun kona-ba finalidade ba dadus sira,  enkuantu hakat liu direitu ba koñesimentu ba dadus pesoa, ne’e viola prinsípiu ba espesifikasaun ba finalidade no limitasaun ba uzu, ne’ebé hateten iha artigu 38 hosi Konstituisaun, introdús restrisaun ne’ebé bele vulnera, ho dalan injustifikadu no ho forma la proporsionál,  tuir direitu ne’ebé previstu iha artigu 38 Konstituisaun.

Akórdaun Tribunal Rekursu nian deside katak  artigu 17 númeru 2  husi Dekretu Parlamentu ne’ebé hateten  Diretór Jerál STAE autoriza komunikasaun dadus konstante hosi Baze de Dadus Resenseamentu Eleitorál ho instituisaun bankária, finanseira no telekomunikasaun ne’ebé hetan lisensa iha territóriu nasionál, ba efeitu verifikasaun identidade, rezidénsia, inskrisaun iha Baze de Dadus Resenseamentu Eleitorál, no númeru kartaun eleitór hosi kliente, no iha ámbitu operasaun no prosedimentu kontrolu internu ba identifikasaun kliente sira no ba prevensaun brankamentu kapitál no hosi finansiamentu terrorizmu.

Dekretu Parlamentu Nasionál númeru 43/V- Primeira alterasaun Lei Resenseamentu Eleitorál, iha Sesaun Plenária Parlamentu Nasionál aprova ho unanimidade ho votu 62 iha loron 28 juñu 2021.

Jornalista   : Nelson de Sousa/Osória Marques

Editór        : Cancio Ximeness

PUBLISIDADEiklan

HAKEREK NO HATÁN

Please enter your comment!
Please enter your name here