Preparasaun atu transporta materiál eleisaun ba sentru votasaun estabelesidu iha Viqueque, segunda (18/04). Imajen TATOLI/Vitorino Lopes da Costa

VIQUEQUE, 18 abril 2022 (TATOLI)—Sekretariadu Tékniku Administrasaun Eleitorál (STAE) hamutuk ho Komisaun Nasionál Eleisaun (CNE, sigla portugés), segunda ne’e, distribui ona materiál eleisaun prezidensiál segunda volta ba estasaun votu 110 iha sentru votasaun 92 estabelesidu iha munisípiu Viqueque.

“Ohin iha territóriu tomak inklui munisípiu Viqueque ita hahú distribui materiál eleisaun segunda volta nian. Tanba ne’e, materiál ne’ebé ita distribui tenki didi’ak, tanba iha mós materiál sensitivu,” Diretór STAE Viqueque, Humberto Fernandes, hateten ba Agência TATOLI iha seremónia abertura distribuisaun materiál eleisaun, sengunda ne’e.

Notísia relevante: STAE munisipál distribui ona materiál eleisaun segunda volta

Ba kestaun ne’e, Brigada STAE no Ofisiál CNE ho akompañmentu hosi Polísia Nasionál Timor-Leste (PNTL) esforsu hodi materiál sira bele to’o sentru votasaun iha suku 36 iha Viqueque ho di’ak.

“Dalan sira ne’ebé a’at no karreta susar atu asesu, tratór boot sei akompaña hodi ajuda karreta atu labele mout iha dalan. Ita akompaña dalan ne’ebé a’at hanesan rai-kuak barak mak hanesan postu Lacluta no dalan ba sentru votasaun Uaibobo postu Ossu,” nia akresenta.

Distribuisaun materiál sensitivu no la sensitivu uza karreta aluger hamutuk 15, hosi parte Patrimóniu Estadu apoiu karreta 11 no karreta hosi munisípiu Viqueque iha 20, nune’e karreta hamutuk 46 mak transporta materiál eleisaun to’o sentru votasaun.

Nune’e, Diretór STAE Viqueque husu eleitór sira bainhira partisipa votasaun tenke kumpre regra hanesan uza maskára no fase liman ho sabaun ka hand sanitizer molok tama sentru votasaun.

Tuir dadus, númeru eleitór eleisaun prezidensiál 2022 iha munisípiu Viqueque hamutuk 58.421, kompostu hosi mane 29.675 (51%) no feto 28.746 (49%), partisipa eleisaun 43.252 (74,73%).

Iha eleisaun primeira volta iha loron 19 marsu iha munisípiu Viqueque, eleitór ne’ebé la partisipa eleisaun hamutuk 14.629, nune’e CNE esforsu hodi fahe informasaun liuhosi meiu komunikasaun hodi sidadaun sira  ne’ebé la partisipa eleisaun primeira volta bele partisipa fali.

Jornalista : Vitorino Lopes da Costa

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here